ਕਾਹਨੂੰਵਾਨ, 27 ਮਾਰਚ (ਪੋਸਟ ਬਿਊਰੋ)- ਸਮੁੱਚੇ ਭਾਰਤ ਵਿੱਚ ਲਾਕਡਾਊਨ ਦੇ ਮਾਹੌਲ ਵਿੱਚ ਪੰਜਾਬੋਂ ਬਾਹਰ ਗਈਆਂ ਲੰਬੀ ਦੂਰੀ ਦੀਆਂ ਭਾੜਾ ਵਾਹਕ ਟਰਾਂਸਪੋਰਟ ਗੱਡੀਆਂ ਨੂੰ ਵੱਡੀਆਂ ਮੁਸਾਬਤਾਂ ਅਤੇ ਸੰਤਾਪ ਹੰਢਾਉਣਾ ਪੈ ਰਿਹਾ ਹੈ। ਉਨ੍ਹਾਂ ਦੇ ਡਰਾਈਵਰਾਂ ਆਦਿ ਨੂੰ ਪੰਜਾਬ ਵਿੱਚ ਪਰਤਣ 'ਤੇ ਜਿੱਥੇ ਪੰਜਾਬ ਪੁਲਸ ਦੇ ਗਾਲੀ ਗਲੋਚ ਦਾ ਸਾਹਮਣਾ ਕਰਨਾ ਪੈਂਦਾ ਹੈ, ਓਥੇ ਉਨਹਾਂ ਨੇ ਪੰਜਾਬ ਪੁਲਸ 'ਤੇ ਨਾਜਾਇਜ਼ ਵਸੂਲੀ ਦੇ ਵੀ ਦੋਸ਼ ਲਾਏ ਹਨ।
ਇਸ ਸੰਬੰਧੀ ਗੱਲਬਾਤ ਦੌਰਾਨ ਆਪਣਾ ਨਾਂਅ ਗੁਪਤ ਰੱਖਣ ਦੀ ਸ਼ਰਤ ਉਤੇ ਇੱਕ ਟਰੱਕ ਚਾਲਕ ਨੇ ਦੱਸਿਆ ਕਿ ਉਹ ਕਾਂਡਲਾ ਤੋਂ ਸ੍ਰੀਨਗਰ ਲਈ ਮਾਲ ਭਰ ਕੇ ਤੁਰੇ ਸੀ, ਪਰ ਇਸ ਦੌਰਾਨ ਪੂਰੇ ਭਾਰਤ ਵਿੱਚ ਲਾਕਡਾਊਨ ਦਾ ਮਾਹੌਲ ਬਣ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਕਰਫਿਊ ਕਾਰਨ ਢਾਬੇ ਬੰਦ ਹੋ ਗਏ ਅਤੇ ਉਨ੍ਹਾਂ ਨੂੰ ਦੋ ਦਿਨ ਰੋਟੀ ਵੀ ਨਹੀਂ ਮਿਲੀ। ਉਨ੍ਹਾਂ ਦੱਸਿਆ ਕਿ ਉਹ ਗੁਜਰਾਤ ਅਤੇ ਰਾਜਸਥਾਨ 'ਚੋਂ ਪੁਲਸ ਅਫਸਰਾਂ ਅਤੇ ਨਾਕਿਆਂ ਤੋਂ ਮਿੰਨਤ ਤਰਲਾ ਕਰ ਕੇ ਲੰਘਦੇ ਰਹੇ, ਪਰ ਕਿਸੇ ਨੇ ਉਨ੍ਹਾਂ ਨਾਲ ਦੁਰ ਵਿਹਾਰ ਜਾਂ ਪੈਸੇ ਮੰਗਣ ਦੀ ਹਿਮਾਕਤ ਨਹੀਂ ਕੀਤੀ, ਜਦੋਂ ਪੰਜਾਬ ਆਏ ਤਾਂ ਇਸ ਦੇ ਬਾਰਡਰ 'ਤੇ ਹੀ ਉਨ੍ਹਾਂ ਨਾਲ ਪੰਜਾਬ ਪੁਲਸ ਨੇ ਵੱਡੇ ਪੱਧਰ 'ਤੇ ਦੁਰ ਵਿਹਾਰ ਕੀਤਾ ਅਤੇ ਗਾਲੀ ਗਲੋਚ ਵੀ ਕੀਤਾ ਹੈ। ਇਥੇ ਹੀ ਬਸ ਨਹੀਂ ਜਿਹੜੀ ਗੱਡੀ ਦਾ ਮਾਲਕ ਜਾਂ ਚਾਲਕ ਪੁਲਸ ਵਾਲਿਆਂ ਦੀ ਮੁੱਠੀ ਗਰਮ ਕਰਦਹਾ ਸੀ ਤਾਂ ਉਸ ਨੂੰ ਉਹ ਉਸੇ ਵੇਲੇ ਹੀ ਛੱਡ ਦਿੰਦੇ ਸਨ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਦੇ ਬਾਰਡਰ ਕੱਲਰ ਖੇੜਾ ਤੋਂ ਅੰਮ੍ਰਿਤਸਰ ਤੱਕ ਫਿਰੋਜ਼ਪੁਰ ਮਖੂ ਅਤੇ ਹਰੀਕੇ ਪੱਤਣ ਦੇ ਨਾਕਿਆਂ 'ਤੇ ਉਨ੍ਹਾਂ ਤੋਂ ਪੁਲਸ ਨੇ ਮਨਮਰਜ਼ੀ ਨਾਲ ਵਸੂਲੀ ਕੀਤੀ। ਉਨ੍ਹਾਂ ਨੇ ਦੁੱਖ ਨਾਲ ਕਿਹਾ ਕਿ ਉਨ੍ਹਾਂ ਨੂੰ ਕਈ ਦਿਨ ਚੱਲਦਿਆਂ ਰਸਤੇ ਵਿੱਚ ਰੋਟੀ ਵੀ ਨਸੀਬ ਨਹੀਂ ਹੋਈ, ਪਰ ਉਨ੍ਹਾਂ ਨਾਲ ਹਮਦਰਦੀ ਦੀ ਥਾਂ ਪੰਜਾਬ ਦਾ ਇਹ ਚਿਹਰਾ ਵੇਖ ਕੇ ਉਹ ਅੰਦਰ ਤੱਕ ਮਾਨਸਿਕ ਤੌਰ 'ਤੇ ਦੁਖੀ ਹਨ।