ਬੰਗਾ, 27 ਮਾਰਚ (ਪੋਸਟ ਬਿਊਰੋ)- ਗੌਤਮ ਜੈਨ ਐੱਸ ਡੀ ਐੱਮ ਬੰਗਾ ਨੇ ਇਥੇ ਇੱਕ ਮੀਟਿੰਗ ਵਿੱਚ ਦੱਸਿਆ ਕਿ ਬੰਗਾ ਬਲਾਕ ਦੇ ਪਿੰਡ ਪਠਲਾਵਾ ਵਿੱਚ ਕੋਰੋਨਾ ਵਾਇਰਸ ਦਾ ਇੱਕ ਹੋਰ ਕੇਸ ਪਾਜਿ਼ਟਿਵ ਆਉਣ ਮਗਰੋਂ ਸਿਹਤ ਵਿਭਾਗ ਨੇ ਸਖਤੀ ਕਰਦਿਆਂ ਇਲਾਕੇ ਦੇ 15 ਪਿੰਡਾਂ ਨੂੰ ਸੀਲ ਕਰ ਦਿੱਤਾ ਹੈ।
ਇਸ ਸੰਬੰਧ ਵਿੱਚ ਗੌਤਮ ਜੈਨ ਨੇ ਦੱਸਿਆ ਕਿ ਇਲਾਕੇ ਦੇ ਪਠਲਾਵਾ, ਝਿੱਕਾ ਲਧਾਣਾ ਦੇ ਮਰੀਜ਼ ਪਾਜਿ਼ਟਿਵ ਹ ਿਪਾਏ ਗਏ। ਸਭ ਤੋਂ ਵੱਧ ਮਰੀਜ਼ ਪਿੰਡ ਪਠਲਾਵਾ ਦੇ ਹਨ। ਉਨ੍ਹਾਂ ਕਿਹਾ ਕਿ ਸਿਹਤ ਵਿਭਾਗ ਨੇ ਗਿਆਨੀ ਬਲਦੇਵ ਸਿੰਘ ਦੇ ਸੰਪਰਕ ਵਾਗੇ 200 ਦੇ ਕਰੀਬ ਲੋਕਾਂ ਦੀ ਸੂਚੀ ਬਣਾਈ ਹੈ। ਇਸ ਕੜੀ ਹੇਠ ਅੰਮ੍ਰਿਤਸਰ ਅਤੇ ਪਟਿਆਲਾ ਦੀ ਸਿਹਤ ਵਿਭਾਗ ਟੀਮ ਵੱਲੋਂ ਪਿੰਡ ਪਠਲਾਵਾ, ਝਿੱਕਾ ਲਧਾਣਾ, ਸੁੱਜੋਂ, ਉਚਾ ਲਧਾਣਾ ਦੇ ਲਗਾਤਾਰ ਸੈਂਪਲ ਲਏ ਜਾ ਰਹੇ ਹਨ ਅਤੇ ਕਈ ਲੋਕਾਂ ਦੀ ਰਿਪੋਰਟ ਨੈਗੇਟਿਵ ਵੀ ਆਈ ਹੈ। ਉਨ੍ਹਾਂ ਕਿਹਾ ਕਿ ਪਿੰਡ ਮਾਹਿਲ ਗਹਿਲਾ, ਭੌਰਾ, ਸੁੱਜੋਂ, ਹੀਉਂ, ਲਧਾਣਾ ਝਿੱਕਾ, ਪੱਦੀ ਮਟ ਵਾਲੀ, ਗੁਜਰਪੁਰ, ਗੋਬਿੰਦਪੁਰ, ਪੱਲੀ ਉਚੀ, ਸੂਰਾਪੁਰ, ਹੀਉਂ ਆਦਿ ਪਿੰਡਾਂ ਦੇ ਲੋਕਾਂ ਦਾ ਦੂਸਰੇ ਪਿੰਡਾਂ 'ਚ ਦਾਖਲਾ ਰੋਕ ਦਿੱਤਾ ਹੈ। ਪ੍ਰਸ਼ਾਸਨ ਨੇ ਸਾਰੇ ਪਿੰਡ 'ਚ ਸਪਰੇਅ ਕਰਵਾਈ ਹੈ। ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਅੱਗੇ ਤੋਂ ਬਾਹਰ ਨਾ ਨਿਕਲਣ ਤੇ ਆਪਸ ਵਿੱਚ ਦੂਰੀ ਰੱਖਣ। ਜਿਹੜੇ ਵਿਅਕਤੀ ਡੇਰਾ ਗਿਆਨੀ ਬਲਦੇਵ ਸਿੰਘ ਪਠਲਾਵਾ ਦੇ ਸੰਪਰਕ 'ਚ ਰਹੇ ਹਨ, ਉਨ੍ਹਾਂ ਦੀ ਜਾਣਕਾਰੀ ਪ੍ਰਸ਼ਾਸਨ ਨੂੰ ਦਿੱਤੀ ਜਾਵੇ।