* ਸਪੇਨ ਵਿੱਚ ਮੌਤਾਂ ਦੀ ਗਿਣਤੀ 4 ਹਜ਼ਾਰ ਤੋਂ ਟੱਪੀ
* ਸੰਸਾਰ ਵਿੱਚ ਮੌਤਾਂ ਦੀ ਗਿਣਤੀ ਸਵਾ ਪੰਜ ਲੱਖ ਤੋਂ ਲੰਘੀ
ਮੈਡਰਿਡ, 27 ਮਾਰਚ, (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਦੇ ਕਹਿਰ ਨਾਲ ਯੂਰਪ ਵਿਚ ਇਟਲੀ ਦੇ ਬਾਅਦ ਸਪੇਨ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੈ। ਇਸ ਦੇਸ਼ ਵਿਚ ਬੀਤੇ 24 ਘੰਟਿਆਂ ਵਿਚ 655 ਹੋਰ ਮਰੀਜ਼ਾਂ ਦੀ ਮੌਤ ਹੋ ਗਈ ਹੈ, ਜਿਸ ਨਾਲ ਮਰਨ ਵਾਲਿਆਂ ਦੀ ਗਿਣਤੀ ਚਾਰ ਹਜ਼ਾਰ ਤੋਂ ਟੱਪ ਗਈ ਹੈ।
ਅੱਜ ਸਪੇਨ ਦੇ ਪ੍ਰਧਾਨ ਮੰਤਰੀ ਪੈਡਰੋ ਸਾਂਚੇਜ ਨੇ ਕਿਹਾ ਕਿ 1936 ਤੋਂ 1939 ਤਕ ਚੱਲੇ ਗ੍ਰਹਿ ਯੁੱਧ ਮਗਰੋਂ ਦੇਸ਼ ਲਈ ਇਹ ਸਭ ਤੋਂ ਵੱਡੀ ਮੁਸ਼ਕਲ ਘੜੀ ਹੈ। ਪੈਡਰੋ ਦੀ ਪਤਨੀ ਵੀ ਕੋਰੋਨਾ ਨਾਲ ਪੀੜਤ ਹੋਈ ਹੈ। ਸਪੇਨ ਦੀ ਪਾਰਲੀਮੈਂਟ ਵੱਲੋਂ 12 ਅਪ੍ਰੈਲ ਤਕ ਐਮਰਜੈਂਸੀ ਵਧਾਉਣ ਦੇ ਮਤੇ ਦੀ ਪ੍ਰਵਾਨਗੀ ਮਿਲਣ ਪਿੱਛੋਂ ਇਸ ਦੇਸ਼ ਵਿਚ ਵੀਰਵਾਰ ਲਾਕਡਾਊਨ ਦਾ ਦਾਇਰਾ ਵਧਾ ਦਿੱਤਾ ਗਿਆ ਅਤੇ ਜ਼ਰੂਰੀ ਕੰਮਾਂ ਨੂੰ ਛੱਡ ਕੇ ਲੋਕਾਂ ਨੂੰ ਘਰਾਂ ਵਿੱਚ ਰਹਿਣ ਲਈ ਕਿਹਾ ਗਿਆ ਹੈ। ਸਪੇਨ ਵਿਚ 14 ਮਾਰਚ ਨੂੰ 15 ਦਿਨਾਂ ਲਈ ਐਮਰਜੈਂਸੀ ਐਲਾਨ ਕੀਤੀ ਗਈ ਸੀ। ਯੂਰਪ ਵਿਚ ਇਟਲੀ ਤੋਂ ਬਾਅਦ ਸਭ ਤੋਂ ਵੱਧ ਮੌਤਾਂ ਸਪੇਨ ਵਿਚ ਹੋਈਆਂ ਹਨ। ਇਟਲੀ ਵਿਚ ਮ੍ਰਿਤਕਾਂ ਦੀ ਗਿਣਤੀ ਅੱਠ ਹਜ਼ਾਰ ਤੋਂ ਵੱਧ ਹੋ ਚੁੱਕੀ ਹੈ।
ਇਸ ਦੌਰਾਨ ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰਾਂ ਨੇ ‘ਅਣਦਿੱਸਦੇ ਦੁਸ਼ਮਣ` ਦੇ ਖ਼ਿਲਾਫ਼ ਜੰਗ ਦਾ ਐਲਾਨ ਕੀਤਾ ਤੇ ਕਿਹਾ ਕਿ ਅਸੀਂ ਜੰਗ ਵਿਚ ਹਾਂ ਅਤੇ ਮਹਾਮਾਰੀ ਦਾ ਸਾਹਮਣਾ ਕਰ ਰਹੇ ਹਾਂ। ਇਸ ਕਰ ਕੇ ਮੈਂ ਫ਼ੌਜੀ ਆਪ੍ਰੇਸ਼ਨ ਸ਼ੁਰੂ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਫਰਾਂਸ ਵਿਚ ਕੋਰੋਨਾ ਵਾਇਰਸ ਦੇ 29 ਹਜ਼ਾਰ ਤੋਂ ਵੱਧ ਕੇਸਾਂ ਦੀ ਪੁਸ਼ਟੀ ਹੋ ਚੁੱਕੀ ਹੈ ਅਤੇ 1,696 ਮੌਤਾਂ ਹੋ ਚੁੱਕੀਆਂ ਹਨ। ਓਧਰ ਈਰਾਨ ਨੇ ਕੋਰੋਨਾ ਦੇ ਕਹਿਰ ਉੱਤੇ ਰੋਕ ਲਈ ਸ਼ਹਿਰਾਂ ਵਿੱਚ ਆਵਾਜਾਈ ਉੱਤੇ ਰੋਕ ਲਾ ਦਿੱਤੀ ਅਤੇ ਸਾਰੇ ਸਰਕਾਰੀ ਅਤੇ ਗ਼ੈਰ-ਸਰਕਾਰੀ ਇਕੱਠਾਂ ਉੱਤੇ ਰੋਕ ਸਣੇ ਕਈ ਕਦਮਾਂ ਦਾ ਐਲਾਨ ਕੀਤਾ ਹੈ। ਚੀਨ ਵਿਚ ਬੀਤੇ ਅੱਠ ਦਿਨਾਂ ਵਿਚ ਛੇਵੀਂ ਵਾਰ ਸਥਾਨਕ ਪੱਧਰ ਉੱਤੇ ਇਨਫੈਕਸ਼ਨ ਦਾ ਨਵਾਂ ਕੇਸ ਨਹੀਂ ਆਇਆ, ਪਰ ਵੀਰਵਾਰ ਨੂੰ ਛੇ ਪੀੜਤਾਂ ਦੀ ਮੌਤ ਹੋ ਗਈ ਹੈ। ਸਿੰਗਾਪੁਰ ਵਿਚ ਤਿੰਨ ਸਾਲਾ ਭਾਰਤੀ ਕੁੜੀ ਕੋਰੋਨਾ ਦੀ ਲਪੇਟ ਵਿਚ ਆ ਗਈ ਹੈ। ਇਸ ਦੇਸ਼ ਵਿਚ 73 ਨਵੇਂ ਕੇਸਾਂ ਦੀ ਪੁਸ਼ਟੀ ਹੋਣ ਨਾਲ ਕੋਰੋਨਾ ਪ੍ਰਭਾਵਤ ਲੋਕਾਂ ਦੀ ਗਿਣਤੀ ਵਧ ਕੇ 631 ਹੋ ਗਈ ਹੈ। ਏਥੇ ਦੋ ਪੀੜਤਾਂ ਦੀ ਮੌਤ ਹੋ ਚੁੱਕੀ ਹੈ।
ਕੋਰੋਨਾ ਬਾਰੇ ਤਾਜ਼ਾ ਅੰਕੜਿਆਂ ਮੁਤਾਬਕ ਭਾਰਤ ਵਿੱਚ ਸ਼ੁੱਕਰਵਾਰ ਸਵੇਰ ਹੋਣ ਤੱਕ ਸੰਸਾਰ ਦੇ 198 ਦੇਸ਼ਾਂ ਵਿੱਚ ਕੁੱਲ 5,29,613 ਕੇਸ ਸਾਹਮਣੇ ਆ ਚੁੱਕੇ ਹਨ ਅਤੇ ਮੌਤਾਂ ਦੀ ਗਿਣਤੀ 23,976 ਹੋ ਚੁੱਕੀ ਹੈ। ਸਭ ਤੋਂ ਵੱਧ ਇਟਲੀ ਤੋਂ 8215 ਮੌਤਾਂ ਦੀ ਖਬਰ ਹੈ, ਜਿਨ੍ਹਾਂ ਵਿੱਚੋਂ 712 ਲੋਕ ਇੱਕੋ ਦਿਨ ਮਾਰੇ ਗਏ ਹਨ। ਇਸ ਦੇ ਬਾਅਦ ਸਪੇਨ ਵਿੱਚ 4,365 ਮੌਤਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਦਿਨ ਵਿੱਚ 715 ਲੋਕਾਂ ਦੀ ਜਾਨ ਗਈ ਹੈ। ਚੀਨ 3,287 ਮੌਤਾਂ ਹੋਈਆਂ ਹਨ ਤੇ ਈਰਾਨ ਮੌਤਾਂ ਦੀ ਗਿਣਤੀ 2,234 ਹੋ ਗਈ ਹੈ, ਜਿਨ੍ਹਾਂ ਵਿੱਚੋਂ ਇੱਕੋ ਦਿਨ ਹੋਈਆਂ 157 ਮੌਤਾਂ ਸ਼ਾਮਲ ਹਨ। ਫਰਾਂਸ ਦੀ ਹਾਲਤ ਵੀ ਚੰਗੀ ਨਹੀਂ, ਏਥੇ 1,696 ਮੌਤਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚ ਬੀਤੇ ਚੌਵੀ ਘੰਟਿਆਂ ਵਿੱਚ ਮਾਰੇ ਗਏ 365 ਲੋਕ ਸ਼ਾਮਲ ਹਨ। ਅਮਰੀਕਾ ਵਿੱਚ 1,209 ਮੌਤਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚੋਂ 182 ਲੋਕਾਂ ਦੀ ਮੌਤ ਪਿਛਲੇ ਇੱਕ ਦਿਨ ਵਿੱਚ ਹੋਈ ਹੈ। ਏਥੇ ਨਿਊ ਯਾਰਕ ਸਭ ਤੋਂ ਵੱਧ ਪ੍ਰਭਾਵਤ ਹੈ, ਜਿੱਥੇ 366 ਮੌਤਾਂ ਹੋਈਆਂ ਹਨ। ਬ੍ਰਿਟੇਨ ਵਿੱਚ ਮੌਤਾਂ ਦੀ ਗਿਣਤੀ 578 ਹੋ ਚੁੱਕੀ ਹੈ ਤੇ ਪਿਛਲੇ ਚੌਵੀ ਘੰਟਿਆਂ ਦੌਰਾਨ 115 ਲੋਕਾਂ ਦੀ ਮੌਤ ਹੋਈ ਹੈ। ਜਰਮਨੀ ਵਿੱਚ 267 ਮੌਤਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚੋਂ 61 ਮੌਤਾਂ ਇੱਕੋ ਦਿਨ ਹੋਈਆਂ ਹਨ। ਸਵਿਟਜ਼ਰਲੈਂਡ ਵਿੱਚ 191 ਮੌਤਾਂ ਹੋਈਆਂ ਹਨ, ਜਿਨ੍ਹਾਂ ਵਿੱਚੋਂ 38 ਮੌਤਾਂ ਪਿਛਲੇ ਇੱਕੋ ਦਿਨ ਵਿੱਚ ਹੋ ਗਈਆਂ ਹਨ।