ਲਖਨਊ, 26 ਮਾਰਚ (ਪੋਸਟ ਬਿਊਰੋ)- ਮੱਕਾ ਤੋਂ ਉਮਰਾ ਕਰ ਕੇ ਮੁੜੇ ਇੱਕ ਜਥੇ ਵਿੱਚ ਸ਼ਾਮਲ 37 ਲੋਕਾਂ ਨੇ ਜੋ ਕੀਤਾ, ਉਹ ਹੈਰਾਨ ਕਰ ਦੇਣ ਵਾਲਾ ਹੈ। ਹੱਥਾਂ 'ਤੇ ਲੱਗੀ ਆਈਸੋਲੇਟ ਸਟੰਪ ਪਹਿਲਾਂ ਖਾਸ ਪਰਫਿਊਮ ਨਾਲ ਮਿਟਾਈ ਅਤੇ ਫਿਰ ਚਕਮਾ ਦੇ ਕੇ ਆਪਣੇ ਘਰ ਪਹੁੰਚ ਗਏ।
ਪੀਲੀਭੀਤ ਦੇ ਇਸ ਮਾਮਲੇ ਦਾ ਖੁਲਾਸਾ ਤਦ ਹੋਇਆ, ਜਦ ਜਥੇ ਵਿੱਚ ਸ਼ਾਮਲ ਇੱਕ ਮਹਿਲਾ ਦੀ ਸਿਹਤ ਖਰਾਬ ਹੋ ਗਈ। ਬਾਅਦ ਵਿੱਚ ਪਤਾ ਲੱਗਾ ਕਿ ਮਹਿਲਾ ਕੋਰੋਨਾ ਪਾਜ਼ੀਟਿਵ ਹੈ। ਅੱਗੋਂ ਉਸ ਦਾ ਬੇਟਾ ਵੀ ਕੋਰੋਨਾ ਪਾਜ਼ੀਟਿਵ ਹੋ ਗਿਆ ਹੈ। ਪੀਲੀਭੀਤ ਵਿੱਚ ਅਮਰੀਆ ਤਹਿਸੀਲ ਦੇ ਕਰੀਬ ਅੱਧੇ ਦਰਜਨ ਪਿੰਡਾਂ ਤੋਂ 37 ਲੋਕ ਕੁਝ ਦਿਨ ਪਹਿਲਾਂ ਉਮਰਾ ਕਰਨ ਗਏ ਸਨ। 25 ਲੋਕ ਇੱਕੋ ਪਿੰਡ ਹਰਾਰਪੁਰ ਦੇ ਸਨ। ਮੱਕਾ ਤੋਂ ਮੁੰਬਈ ਹੁੰਦੇ ਹੋਏ 19 ਮਾਰਚ ਨੂੰ ਸਾਰੇ ਘਰ ਮੁੜੇ ਸਨ। ਮੁੰਬਈ ਏਅਰਪੋਰਟ 'ਤੇ ਸਾਰਿਆਂ ਦੇ ਹੱਥਾਂ ਉਤੇ ਆਈਸੋਲੇਟ ਦੀ ਮੋਹਰ ਲਾਈ ਗਈ, ਪਰ ਨਾਲ ਲਿਆਂਦੇ ਵਿਦੇਸ਼ੀ ਪਰਫਿਊਮ ਨਾਲ ਉਨ੍ਹਾਂ ਨੇ ਸਟੰਪ ਨੂੰ ਮਿਟਾ ਦਿੱਤਾ ਤਾਂ ਕਿ ਕਿਸੇ ਨੂੰ ਪਤਾ ਨਾ ਲੱਗੇ। ਮੁੰਬਈ ਤੋਂ ਲਖਨਊ ਫਲਾਈਟ ਫੜਨ 'ਤੇ ਫਿਰ ਜਾਂਚ ਵਿੱਚ ਉਲਝਣ ਦਾ ਡਰ ਹੋਣ ਕਾਰਨ ਜੱਥੇ ਵਿਚ ਸ਼ਾਮਲ ਲੋਕ ਟਰੇਨ ਰਾਹੀਂ ਆਏ ਸਨ। ਲਖਨਊ ਪਹੁੰਚਣ ਦੇ ਬਾਅਦ ਸਾਰੇ ਬਸ ਰਾਹੀਂ ਪੀਲੀਭੀਤ ਦੇ ਪਿੰਡਾਂ ਵਿੱਚ ਆਪਣੇ ਘਰ ਗਏ। ਵਾਪਸੀ ਵੇਲੇ ਜਥੇ ਵਿੱਚ ਸ਼ਾਮਲ ਹਰਾਰਪੁਰ ਦੀ ਮਹਿਲਾ ਦੀ ਹਾਲਤ ਵਿਗੜ ਗਈ ਤਾਂ ਉਸ ਨੂੰ ਜ਼ਿਲਾ ਹਸਪਤਾਲ ਲਿਆਂਦਾ ਗਿਆ। ਵਿਦੇਸ਼ ਤੋਂ ਆਈ ਹੋਣ ਦੇ ਕਾਰਨ ਡਾਕਟਰਾਂ ਨੂੰ ਕੋਰੋਨਾ ਦਾ ਸ਼ੱਕ ਹੋਇਆ ਤਾਂ ਨਮੂਨਾ ਮੈਡੀਕਲ ਕਾਲਜ ਲਖਨਊ ਭੇਜਿਆ ਗਿਆ। 22 ਮਾਰਚ ਨੂੰ ਆਈ ਜਾਂਚ ਰਿਪੋਰਟ ਤੋਂ ਪਤਾ ਲੱਗਾ ਕਿ ਉਸ ਨੂੰ ਕੋਰੋਨਾ ਹੈ। ਮਹਿਲਾ ਦੇ ਪਰਵਾਰ ਦੇ ਬਾਕੀ ਮੈਂਬਰਾਂ ਦਾ ਵੀ ਟੈਸਟ ਹੋਇਆ। ਬਾਅਦ ਵਿੱਚ ਪਤਾ ਲੱਗਾ ਕਿ ਬੇਟੇ ਨੂੰ ਵੀ ਕੋਰੋਨਾ ਹੋਇਆ ਹੈ। ਉਹ ਵੀ ਮਾਂ ਦੇ ਨਾਲ ਉਮਰਾ ਕਰਨ ਮੱਕਾ ਗਿਆ ਸੀ।