ਓਨਟਾਰੀਓ, 31 ਅਕਤੂਬਰ (ਪੋਸਟ ਬਿਊਰੋ) : ਟੈਰੀ ਕੌਲਿਨਜ਼ ਇੱਕ ਦਹਾਕੇ ਪਹਿਲਾਂ ਹੀ ਕ੍ਰੈਕ ਕੋਕੀਨ ਦੀ ਬੁਰੀ ਲਤ ਤੋਂ ਛੁਟਕਾਰਾ ਪਾ ਚੁੱਕਿਆ ਹੈ ਤੇ ਉਦੋਂ ਤੋਂ ਹੀ ਸਥਾਈ ਕੰਮ ਦੀ ਭਾਲ ਵਿੱਚ ਹੈ।
ਪਰ 52 ਸਾਲਾ ਕੌਲਿਨ ਨੇ ਆਖਿਆ ਕਿ ਕਈ ਸਾਲਾਂ ਦੀ ਨਸ਼ੇ ਦੀ ਲਤ ਕਾਰਨ ਉਸ ਦੇ ਕ੍ਰਿਮੀਨਲ ਰਿਕਾਰਡ, ਡਰਾਈਵਰ ਲਾਇਸੰਸ ਦੀ ਕਮੀ ਤੇ ਵਿਦਿਆਰਥੀ ਲੋਨ ਜਿਸ ਕਾਰਨ, ਉਹ ਆਪਣੇ ਹੁਨਰ ਨੂੰ ਨਿਖਾਰਨ ਲਈ ਉਹ ਵਾਪਿਸ ਕਾਲਜ ਵੀ ਨਹੀਂ ਜਾ ਸਕਦਾ। ਉਸ ਨੇ ਦੱਸਿਆ ਕਿ ਵੱਖ ਵੱਖ ਕਮਿਊਨਿਟੀ ਟਰੇਨਿੰਗ ਪ੍ਰੋਗਰਾਮਾਂ ਰਾਹੀਂ ਉਹ ਆਪਣੀ ਜਿ਼ੰਦਗੀ ਬਿਹਤਰ ਬਣਾਉਣ ਦੀ ਕੋਸਿ਼ਸ਼ ਕਰ ਰਿਹਾ ਹੈ। ਪਰ ਪੁਰਾਣੀਆਂ ਗਲਤੀਆਂ ਉਸ ਦਾ ਖਹਿੜਾ ਹੀ ਨਹੀਂ ਛੱਡ ਰਹੀਆਂ।
ਜੀਐਮ ਅਸੈਂਬਲੀ ਲਾਈਨ ਦੇ ਸਾਬਕਾ ਵਰਕਰ ਜੋ ਕਿ ਪਿਛਲੇ 20 ਸਾਲਾਂ ਤੋਂ ਕਦੇ ਵੈਲਫੇਅਰ ਲੈਂਦਾ ਹੈ ਤੇ ਕਦੇ ਨਹੀਂ ਅਤੇ ਆਪਣੀ ਦੋ ਵਕਤ ਦੀ ਰੋਟੀ ਲਈ ਫੂਡ ਬੈਂਕਜ਼ ਉੱਤੇ ਨਿਰਭਰ ਕਰਦਾ ਹੈ, ਸੋਸਲ ਸਰਵਿਸ ਮੰਤਰੀ ਲੀਜ਼ਾ ਮੈਕਲਿਓਡ ਦੇ ਸੋਸ਼ਲ ਅਸਿਸਟੈਂਸ ਨੂੰ ਮੁੜ ਨੰਵਿਆਏ ਜਾਣ ਦੇ ਉਪਰਾਲੇ ਦੇ ਨਤੀਜੇ ਦੀ ਇੰਤਜ਼ਾਰ ਕਰ ਰਿਹਾ ਹੈ, ਜੋ ਕਿ 8 ਨਵੰਬਰ ਨੂੰ ਆਉਣ ਦੀ ਉਮੀਦ ਹੈ। ਕੌਲਿਨਜ਼ ਟੋਰਾਂਟੋ ਦੇ ਉਨ੍ਹਾਂ 100 ਫੀ ਸਦੀ ਫੂਡ ਬੈਂਕ ਯੂਜ਼ਰਜ਼ ਵਿੱਚੋਂ ਇੱਕ ਹੈ ਜੋ ਕਿ ਸੋਸ਼ਲ ਅਸਿਸਟੈਂਸ ਉੱਤੇ ਨਿਰਭਰ ਕਰਦੇ ਹਨ।
ਡੇਲੀ ਬ੍ਰੈੱਡ ਫੂਡ ਬੈਂਕਜ਼ ਦੀ ਸਾਲਾਨਾ ਰਿਪੋਰਟ ਵਿੱਚ ਆਖਿਆ ਗਿਆ ਹੈ ਕਿ ਪਿਛਲੇ ਸਾਲ 45 ਸਾਲ ਦੀ ਉਮਰ ਤੋਂ ਵੱਧ ਦੇ ਬਾਲਗਾਂ ਦੀ ਵੱਡੀ ਗਿਣਤੀ ਵੱਲੋਂ ਫੂਡ ਬੈਂਕ ਦਾ ਦੌਰਾ ਕੀਤਾ ਗਿਆ। ਇਸ ਉਮਰ ਵਰਗ ਦੇ ਲੋਕ ਫੂਡ ਬੈਂਕ ਦੀ ਵਰਤੋਂ ਕਰਨ ਵਾਲਿਆਂ ਦਾ 37 ਫੀ ਸਦੀ ਹਿੱਸਾ ਬਣਦੇ ਹਨ। ਕੌਲਿਨਜ਼ ਨੇ ਆਖਿਆ ਕਿ ਸਾਨੂੰ ਲੱਗਦਾ ਹੈ ਕਿ ਅਜਿਹੇ ਲੋਕਾਂ ਲਈ ਸੋਸ਼ਲ ਅਸਿਸਟੈਂਸ ਵਿੱਚ ਵਾਧਾ ਹੋਣਾ ਚਾਹੀਦਾ ਹੈ ਜਿਹੜੇ ਇੱਕ ਕਮਰੇ ਵਾਲੇ ਘਰ ਵਿੱਚ ਰਹਿ ਕੇ ਕਿਰਾਇਆ ਭਰਨ ਮਗਰੋਂ 570 ਡਾਲਰ ਪ੍ਰਤੀ ਮਹੀਨੇ ਉੱਤੇ ਗੁਜ਼ਾਰਾ ਕਰਦੇ ਹਨ।
ਇਹ ਵੀ ਪਤਾ ਲੱਗਿਆ ਹੈ ਕਿ ਟੋਰਾਂਟੋ ਵਿੱਚ ਫੂਡ ਬੈਂਕ ਦੀ ਵਰਤੋਂ ਵਿੱਚ 2016-17 ਦਰਮਿਆਨ ਲੱਗਭਗ 5 ਫੀ ਸਦੀ ਦੀ ਕਮੀ ਆਈ। ਪਰ 2008 ਵਿੱਚ ਆਏ ਆਰਥਿਕ ਮੰਦਵਾੜੇ ਨਾਲੋਂ ਵੀ ਇਹ ਇਸ ਸਮੇਂ 14 ਫੀ ਸਦੀ ਵੱਧ ਹੈ। ਡੇਲੀ ਬ੍ਰੈੱਡ ਦੇ ਸੀਈਓ ਨੀਲ ਹੈਦਰਿੰਗਟਨ ਨੇ ਆਖਿਆ ਕਿ ਡੱਗ ਫੋਰਡ ਦੀ ਪੀਸੀ ਸਰਕਾਰ ਵੱਲੋਂ ਓਨਟਾਰੀਓ ਸੋਸ਼ਲ ਅਸਿਸਟੈਂਸ ਸਿਸਟਮ ਨੂੰ ਓਵਰਹਾਲ ਕਰਨ ਤੋਂ ਹਫਤਾ ਪਹਿਲਾਂ ਹੀ ਜਾਰੀ ਵਿਸ਼ਲੇਸ਼ਣ ਸੋਚ ਸਮਝ ਕੇ ਕਰਵਾਇਆ ਗਿਆ ਹੈ।