ਨਵੀਂ ਦਿੱਲੀ, 26 ਮਾਰਚ (ਪੋਸਟ ਬਿਊਰੋ)- ਉਸਾਰੀ ਦੇ ਕੰਮਾਂ ਵਿੱਚ ਲੱਗੇ ਮਜ਼ਦੂਰ, ਰੇਹੜੀ-ਪਟੜੀ ਅਤੇ ਖੋਖੇ ਵਾਲੇ ਤੇ ਰਿਕਸ਼ਾ ਚਲਾਉਣ ਵਾਲੇ ਮਜ਼ਦੂਰਾਂ ਦਾ ਇੱਕ ਵੱਡਾ ਵਰਗ ਰੋਜ਼ ਕਮਾਉਂਦਾ ਹੈ ਤੇ ਪਰਵਾਰ ਦਾ ਪੇਟ ਭਰਦਾ ਹੈ, ਪਰ ਕੋਰੋਨਾ ਵਾਇਰਸ ਦੇ ਕਾਰਨ ਹੋਏ ਲਾਕਡਾਊਨ ਦੇ ਬਾਅਦ ਅਜਿਹੇ ਲੱਖਾਂ ਦਿਹਾੜੀ ਮਜ਼ਦੂਰਾਂ ਦੇ ਸਾਹਮਣੇ ਰੋਟੀ ਦਾ ਸੰਕਟ ਖੜ੍ਹਾ ਹੋ ਗਿਆ ਹੈ। ਕੋਰੋਨਾ ਮਹਾਮਾਰੀ ਨੂੰ ਹੋਰ ਫੈਲਣ ਤੋਂ ਰੋਕਣ ਲਈ ਦੇਸ਼ ਵਿੱਚ ਤਿੰਨ ਹਫਤੇ ਦਾ ਬੰਦ ਜਾਰੀ ਹੈ ਤੇ ਪੂਰੇ ਦੇਸ਼ ਦੀ ਰਫਤਾਰ ਰੁਕ ਗਈ ਹੈ। ਲੋਕ ਘਰਾਂ ਵਿੱਚ ਬੰਦ ਹਨ। ਉਚ ਅਤੇ ਮੱਧਮ ਵਰਗੀ ਪਰਵਾਰਾਂ ਦੇ ਸਾਹਮਣੇ ਰੋਟੀ ਬਾਰੇ ਇੰਨਾ ਵੱਡਾ ਸੰਕਟ ਨਹੀਂ, ਪਰ ਗੈਰ ਸੰਗਠਿਤ ਖੇਤਰ ਦਾ ਮਜ਼ਦੂਰ ਵਰਗ ਇਸ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਤ ਹੈ।
ਸਰਕਾਰੀ ਅੰਕੜਿਆਂ ਅਨੁਸਾਰ ਭਾਰਤ ਵਿੱਚ ਗੈਰ ਸੰਗਠਿਤ ਖੇਤਰ ਵਿੱਚ ਕਰੀਬ 42 ਕਰੋੜ ਲੋਕ ਕੰਮ ਕਰਦੇ ਹਨ। ਇਨ੍ਹਾਂ ਵਿੱਚ ਖੇਤਾਂ ਵਿੱਚ ਕੰਮ ਵਾਲੇ ਮਜ਼ਦੂਰ ਸ਼ਾਮਲ ਹਨ। ਪਰਵਾਰ ਦੀ ਰੋਜ਼ੀ ਲਈ ਇੱਕ ਵੱਡਾ ਵਰਗ ਪਿੰਡ ਤੋਂ ਦੂਰ ਆਪਣਾ ਘਰ ਵਸਾਉਂਦਾ ਹੈ, ਪਰ ਅਜਿਹੇ ਕਈ ਲੋਕ ਸੜਕ ਅਤੇ ਰੇਲ ਗੱਡੀ ਬੰਦ ਹੋਣ ਕਾਰਨ ਉਥੇ ਫਸ ਗਏ ਹਨ। ਉਨ੍ਹਾਂ ਨੂੰ ਆਪਣੇ ਪਿੰਡ ਵਿੱਚ ਰਹਿੰਦੇ ਜੀਆਂ ਬਾਰੇ ਵੀ ਚਿੰਤਾ ਹੈ। ਸੰਕਟ ਦੇ ਦਿਨਾਂ ਦੀ ਗਿਣਤੀ ਕੋਈ ਨਹੀਂ ਜਾਣਦਾ। ਕਿਸੇ ਨੂੰ ਹਾਲਾਤ 'ਚੋਂ ਉਭਰਨ ਦਾ ਸਹੀ ਵਕਤ ਨਹੀਂ ਪਤਾ।
ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਮੰਗਲਵਾਰ ਸ਼ਾਮ ਗੈਰ ਸੰਗਠਿਤ ਖੇਤਰ ਦੇ ਮਜ਼ਦੂਰਾਂ ਲਈ 1000 ਰੁਪਏ ਦੀ ਇਕੱਠੀ ਮਦਦ ਦਾ ਐਲਾਨ ਕੀਤਾ ਹੈ। ਇਨ੍ਹਾਂ ਮਜ਼ਦੂਰਾਂ ਲਈ ਇਹ ਮਦਦ ਕਾਫੀ ਤਾਂ ਨਹੀਂ, ਪਰ ਸਮੇਂ ਸਿਰ ਉਨ੍ਹਾਂ ਤੱਕ ਪਹੁੰਚ ਗਈ ਤਾਂ ਥੋੜ੍ਹੀ ਰਾਹਤ ਦੇ ਸਕਦੀ ਹੈ। ਉੱਤਰ ਪ੍ਰਦੇਸ਼ ਵਿੱਚ ਯੋਗੀ ਆਦਿੱਤਿਆਨਾਥ ਦੀ ਸਰਕਾਰ ਨੇ ਸਭ ਤੋਂ ਪਹਿਲਾਂ ਸੂਬੇ ਵਿੱਚ ਕਰੀਬ 35 ਲੱਖ ਮਜ਼ਦੂਰਾਂ ਲਈ 100 ਰੁਪਏ ਦੀ ਮਦਦ ਦਾ ਐਲਾਨ ਕੀਤਾ ਸੀ।