ਮੈਲਬੌਰਨ, 26 ਮਾਰਚ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਦੇ ਕਾਰਨ ਜੋ ਲੋਕ ਅਸਥਾਈ ਵੀਜ਼ਿਆਂ ਵਾਲੇ ਹਨ ਅਤੇ ਇਥੇ ਫਸ ਚੁੱਕੇ ਹਨ, ਆਸਟ੍ਰੇਲੀਆ ਦੀ ਸਰਕਾਰ ਉਨ੍ਹਾਂ ਦੀ ਵਿੱਤੀ ਤੰਗੀ ਬਾਰੇ ਸੋਚ ਕਰ ਰਹੀ ਹੈ ਕਿ ਇਸ ਤਰ੍ਹਾਂ ਉਨ੍ਹਾਂ ਲੋਕਾਂ ਦੀ ਵੀ ਮਦਦ ਕੀਤੀ ਜਾਵੇ। ਇਹ ਮਹਾਂਮਾਰੀ ਸਮੇਂ ਇਥੇ ਫਸੇ ਆਰਜ਼ੀ ਪ੍ਰਵਾਸੀਆਂ ਲਈ ਵਿਸ਼ੇਸ਼ ਭਲਾਈ ਭੁਗਤਾਨ 'ਤੇ ਵਿਚਾਰ ਕੀਤੀ ਜਾ ਰਹੀ ਹੈ। ਸਮਾਜਿਕ ਸੇਵਾਵਾਂ ਮੰਤਰੀ ਐਨੀ ਰੁਸਟਨ ਨੇ ਪੁਸ਼ਟੀ ਕੀਤੀ ਹੈ ਕਿ ਸਰਕਾਰ ਇਹ ਤੈਅ ਕਰਨ ਲਈ ਸੋਚ ਰਹੀ ਕਿ ਇਨ੍ਹਾਂ ਵੀਜ਼ਾ ਧਾਰਕਾਂ ਦੀ ਮਦਦ ਲਈ ਕਿਹੜੇ ਬਦਲ ਹਨ।
ਐਨੀ ਰੁਸਟਨ ਨੇ ਕਿਹਾ ਕਿ ਬਹੁਤ ਸਾਰੇ ਲੋਕਾਂ ਦੀਆਂ ਨੌਕਰੀਆਂ ਜਾ ਚੁੱਕੀਆਂ ਹਨ ਅਤੇ ਪ੍ਰਹੁਣਾਚਾਰੀ ਅਤੇ ਸੈਰ ਸਪਾਟਾ ਵਿਭਾਗ ਬੰਦ ਹੋ ਚੁੱਕਾ ਹੈ। ਫਿਰ ਵੀ ਉਹ ਕੁਝ ਕਰਨਗੇ। ਇਥੇ ਅੰਦਾਜ਼ਨ 15 ਲੱਖ ਲੋਕ ਸਰਕਾਰੀ ਸੇਵਾਵਾਂ ਤੋਂ ਬਿਨਾਂ ਅਸਥਾਈ ਵੀਜ਼ੇ 'ਤੇ ਹਨ। ਉਨ੍ਹਾਂ ਦੱਸਿਆ ਕਿ ਉਹ ਆਪਣੇ ਢੰਗ ਨਾਲ ਕੰਮ ਕਰਦੇ ਹਨ ਕਿ ਕਿਸ ਤਰ੍ਹਾਂ ਉਨ੍ਹਾਂ ਲੋਕਾਂ ਦੀ ਮਦਦ ਕੀਤੀ ਜਾਵੇ। ਆਸਟੇ੍ਰਲੀਆ ਦੇ ਪ੍ਰਵਾਸੀ ਕੌਂਸਲ ਦੀ ਸੀ ਈ ਓ ਨੇ ਕਿਹਾ ਕਿ ਇਸ ਸਮੇਂ ਅਸਥਾਈ ਵੀਜ਼ਾ ਵਾਲੇ ਲੋਕਾਂ ਨੂੰ ਵਧੇਰੇ ਸੁਰੱਖਿਆ ਦੇਣ ਦੀ ਲੋੜ ਹੈ। ਉਨ੍ਹਾਂ ਲੋਕਾਂ ਲਈ ਮੈਡੀਕਲ ਅਤੇ ਵਿੱਤੀ ਸਹਾਇਤਾ ਦੀ ਦੇਣੀ ਚਾਹੀਦੀ ਹੈ।