ਪੇਈਚਿੰਗ, 26 ਮਾਰਚ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਕਾਰਨ ਜਦੋਂ ਭਾਰਤ, ਅਮਰੀਕਾ, ਇਟਲੀ ਤੇ ਦੁਨੀਆ ਭਰ ਦੇ ਹੋਰ ਦੇਸ਼ ਲਾਕਡਾਊਨ ਦੀ ਸਥਿਤੀ ਵਿੱਚ ਹਨ, ਓਦੋਂ ਇਸ ਮਹਾਮਾਰੀ ਦੇ ਕੇਂਦਰ ਚੀਨ 'ਚ ਹਾਲਾਤ ਸੁਧਰਦੇ ਦਿੱਸ ਰਹੇ ਹਨ। ਚੀਨ ਵਿੱਚ ਇੱਕ ਵਾਰ ਫਿਰ ਕੰਪਨੀਆਂ ਦੇ ਤਾਲੇ ਖੁੱਲ੍ਹਣ ਲੱਗੇ ਅਤੇ ਉਤਪਾਦਨ ਸ਼ੁਰੂ ਹੋ ਰਿਹਾ ਹੈ।
ਹੌਂਡਾ, ਨਿਸਾਨ, ਟੋਇਟਾ ਅਤੇ ਫਾਕਸਵੈਗਨ ਵਰਗੀਆਂ ਕਾਰ ਕੰਪਨੀਆਂ ਵੱਲੋਂ ਚੀਨ ਵਿੱਚ ਫਿਰ ਉਤਪਾਦਨ ਚਾਲੂ ਕਰ ਦਿੱਤਾ ਗਿਆ ਹੈ। ਇਹੀ ਨਹੀਂ, ਚੀਨ ਦੇ ਹੁਬੇਈ ਸੂਬੇ ਦੇ ਵੂਹਾਨ ਸ਼ਹਿਰ ਵਿੱਚ ਵੀ ਲੋਕ ਕੰਮ 'ਤੇ ਪਰਤਣ ਲੱਗੇ ਹਨ, ਜਿੱਥੇ ਕੋਰੋਨਾ ਵਾਇਰਸ ਦੀ ਸ਼ੁਰੂਆਤ ਹੋਈ ਸੀ। ਬੀਤੇ ਮਹੀਨੇ ਚੀਨ ਵਿੱਚ ਕਾਰਾਂ ਦੀ ਸੇਲ ਇਤਿਹਾਸਕ ਹੇਠਲੇ ਪੱਧਰ 'ਤੇ ਪਹੁੰਚ ਗਈ ਸੀ। ਕੋਰੋਨਾ ਦੇ ਅਸਰ ਦੇ ਰੁਕਣ ਨਾਲ ਹਾਲਾਤ ਸੁਧਰ ਰਹੇ ਹਨ। ਚੀਨ ਦੇ ਇੱਕ ਆਟੋ ਇੰਡਸਟਰੀ ਗਰੁੱਪ ਨੇ ਕਿਹਾ ਕਿ ਲੋਕ ਹੌਲੀ-ਹੌਲੀ ਸ਼ਾਪਿੰਗ ਵੱਲ ਪਰਤ ਰਹੇ ਹਨ। ਇੱਕ ਵਿਸ਼ਲੇਸ਼ਕ ਨੇ ਕਿਹਾ ਕਿ ਮੌਜੂਦਾ ਸਥਿਤੀ ਦੱਸਦੀ ਹੈ ਕਿ ਚੀਨ 'ਚ ਉਦਯੋਗਿਕ ਗਤੀਵਿਧੀਆਂ ਫਿਰ ਸ਼ੁਰੂ ਹੋ ਗਈਆਂ ਹਨ। ਇਹੀ ਨਹੀਂ, ਦੁਨੀਆ ਦੀ ਸਭ ਤੋਂ ਵੱਧ ਆਬਾਦੀ ਵਾਲੇ ਦੇਸ਼ ਦੇ ਹਵਾਈ ਸੈਕਟਰ ਵਿੱਚ ਵੀ ਸੁਧਾਰ ਹੋ ਰਿਹਾ ਹੈ। ਇੱਕ ਸਮੇਂ ਗਿਰਾਵਟ ਕਾਰਨ ਹਵਾਈ ਕਾਰੋਬਾਰ ਪੁਰਤਗਾਲ ਵਰਗੇ ਛੋਟੇ ਦੇਸ਼ ਤੋਂ ਵੀ ਘਟ ਗਿਆ ਸੀ, ਪਰ ਫਲਾਈਟਸ ਫਿਰ ਚਾਲੂ ਹੋ ਗਈਆਂ ਹਨ। ਬੀਤੇ ਹਫਤੇ ਉਸ ਤੋਂ ਪਹਿਲਾਂ ਵਾਲੇ ਹਫਤੇ ਦੇ ਮੁਕਾਬਲੇ ਐਵੀਏਸ਼ਨ ਸੈਕਟਰ ਵਿੱਚ 2.4 ਫੀਸਦੀ ਦੀ ਗ੍ਰੋਥ ਦੇਖਣ ਨੂੰ ਮਿਲੀ। ਇਸ ਤੋਂ ਇਲਾਵਾ ਚੀਨ ਵਿੱਚ ਰਿਵਾਈਵਲ ਦਾ ਸੰਕੇਤ ਵੀ ਇਸ ਤੋਂ ਮਿਲਦਾ ਹੈ ਕਿ ਸਬਵੇਅ ਟਰੈਫਿਕ ਵਿੱਚ ਬੀਤੇ ਹਫਤੇ 21 ਫੀਸਦੀ ਦਾ ਵਾਧਾ ਹੋਇਆ ਹੈ। ਫਰਿੱਜ, ਵਾਸ਼ਿੰਗ ਮਸ਼ੀਨ ਵਰਗੇ ਵੱਡੇ ਉਪਕਰਨਾਂ ਦੀ ਖਰੀਦ ਵੀ ਵਧੀ ਹੈ।
ਵਰਨਣ ਯੋਗ ਹੈ ਕਿ ਜਨਵਰੀ ਦੇ ਆਖਰੀ ਹਫਤੇ ਤੋਂ ਚੀਨ ਦੇ ਬਹੁਤੇ ਹਿੱਸਿਆਂ ਵਿੱਚ ਲਾਕਡਾਊਨ ਦੀ ਸਥਿਤੀ ਸੀ। ਖਾਸ ਤੌਰ 'ਤੇ ਹੁਬੇਈ ਸੂਬੇ 'ਚ ਕਰਫਿਊ ਦੀ ਸਥਿਤੀ ਸੀ, ਜਿੱਥੇ ਦੇ ਵੁਹਾਨ ਤੋਂ ਕੋਰੋਨਾ ਦੀ ਬਿਮਾਰੀ ਫੈਲੀ ਸੀ।