ਪੁਣੇ, 24 ਮਾਰਚ, (ਪੋਸਟ ਬਿਊਰੋ)- ਇੰਡੀਅਨ ਕੌਂਸਲ ਫਾਰ ਮੈਡੀਕਲ ਰਿਸਰਚ (ਆਈ ਸੀ ਐੱਮ ਆਰ) ਨੇ ਕੋਰੋਨਾ ਵਾਇਰਸ ਟੈਸਟ ਲਈ ਭਾਰਤ ਵਿੱਚ ਬਣਾਈ ਗਈ ਪਹਿਲੀ ਟੈਸਟ ਕਿੱਟ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਪੁਣੇ ਵਿਚਲੀ ਫਰਮ ਮਾਈਲੈਬ ਨੂੰ ਇਹ ਜ਼ਿੰਮੇਵਾਰੀ ਦਿੱਤੀ ਗਈ ਹੈ।
ਵਰਨਣ ਯੋਗ ਹੈ ਕਿ ਮਾਈਲੈਬ ਨੇ ਇਕ ਹਫਤੇ ਵਿਚ 1 ਲੱਖ ਕਿੱਟਾਂ ਬਣਾਉਣ ਦਾ ਵਾਅਦਾ ਕੀਤਾ ਹੈ। ਇਸ ਕੰਪਨੀ ਦਾ ਦਾਅਵਾ ਹੈ ਕਿ ਇਕ ਕਿੱਟ ਨਾਲ 100 ਮਰੀਜ਼ਾਂ ਦੀ ਜਾਂਚ ਕੀਤੀ ਜਾ ਸਕਦੀ ਹੈ। ਪੁਣੇ ਦੀ ਇਸ ਲੈਬ ਵਿੱਚ ਹਰ ਹਫ਼ਤੇ 1 ਲੱਖ ਕਿੱਟਾਂ ਬਣਾਈਆਂ ਜਾ ਸਕਦੀਆਂ ਹਨ। ਜਿਹੜੀ ਕਿੱਟ ਮਾਈਲੈਬ ਬਣਾਵੇਗੀ, ਵਿਦੇਸ਼ ਤੋਂ ਆਉਂਦੀ ਕਿੱਟ ਦੇ ਚੌਥਾਈ ਹਿੱਸੇ ਦੀ ਲਾਗਤ ਆਵੇਗੀ। ਮਾਈਲੈਬ ਪੈਥੋਡੈਕਟੈਕਟ ਅਸਲ ਵਿੱਚ ਕੋਰੋਨਾ ਵਾਇਰਸ ਦੇ ਕੁਆਲਿਟੀ ਚੈੱਕ ਵਾਲੀ ਪਹਿਲੀ ਕਿੱਟ ਹੈ, ਜਿਹੜੀ ਵਪਾਰਕ ਤੌਰ ਉੱਤੇ ਮਨਜ਼ੂਰ ਕੀਤੀ ਗਈ ਹੈ। ਇਸ ਨੂੰ ਭਾਰਤ ਦੇ ਕੇਂਦਰੀ ਡਰੱਗ ਸਟੈਂਡਰਡਜ਼ ਕੰਟਰੋਲ ਆਰਗੇਨਾਈਜ਼ੇਸ਼ਨ ਨੇ ਮਨਜ਼ੂਰੀ ਦਿੱਤੀ ਹੈ। ਇਸ ਤੋਂ ਇਲਾਵਾ ਮਾਈਲਾਬ ਇਕੱਲੀ ਭਾਰਤੀ ਕੰਪਨੀ ਹੈ, ਜਿਸ ਨੇ ਆਈ ਸੀ ਐਮ ਆਰ ਦੇ ਮੁਲੰਕਣ ਵਿਚ 100 ਫੀਸਦੀ ਸੈਂਸੇਟਿਵਿਟੀ ਅਤੇ ਸਪੈਸ਼ਲਾਈਜ਼ੇਸ਼ਨ ਹਾਸਲ ਕੀਤੀ ਹੈ।
ਇਸ ਸੰਬੰਧ ਵਿੱਚ ਮਾਈਲੈਬ ਡਿਸਕਵਰੀ ਸਲਿਊਸ਼ਨਜ਼ ਦੇ ਡਾਇਰੈਕਟਰ ਜਨਰਲ ਹਸਮੁਖ ਰਾਵਲ ਨੇ ਦੱਸਿਆ: ‘ਸੀ ਓ ਵੀ ਆਈ ਡੀ-19 ਦੇ ਟੈਸਟ ਲਈ ਇਹ ਕਿੱਟ ਮੇਕ ਇਨ ਇੰਡੀਆ ਦੇ ਅਧੀਨ ਰਾਜ ਅਤੇ ਕੇਂਦਰ ਸਰਕਾਰ ਦੇ ਸਹਿਯੋਗ ਨਾਲ ਰਿਕਾਰਡ ਸਮੇਂ ਵਿੱਚ ਭਾਰਤ ਵਿੱਚ ਬਣਾਈ ਗਈ ਹੈ। ਇਸ ਨੂੰ ਕੇਂਦਰੀ ਫਾਰਮਾਸਿਊਟੀਕਲ ਸਟੈਂਡਰਡਜ਼ ਕੰਟਰੋਲ ਆਰਗੇਨਾਈਜ਼ੇਸ਼ਨ ਦੀ ਮਨਜ਼ੂਰੀ ਮਿਲੀ ਹੈ।’