-ਅਜੈ ਕੁਮਾਰ
ਅਗਲੀਆਂ ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਦੀ ਤਿਆਰੀ ਲਈ ਖਾਓ-ਪੀਓ ਨੈਸ਼ਨਲ ਫਰੰਟ ਦੇ ਰਾਜਸੀ ਵਿੰਗ ਖਾਸ ਆਦਮੀ ਪਾਰਟੀ ਨੇ ਇੱਕ ਗੁਪਤ ਮੀਟਿੰਗ ਸਤਲੁਜ ਦਰਿਆ ਦੇ ਕੰਢੇ ਆਮ ਤੌਰ 'ਤੇ ਪੁਲਸ ਨਾਲ ਰਲ ਕੇ ਚੋਰੀ ਰੇਤਾ ਕੱਢਣ ਵਾਲੇ ਬਿੱਟੂ ਲੁੱਚੇ ਦੇ ਘਰ ਕੀਤੀ, ਜਿਸ ਵਿੱਚ ਅਗਲੀਆਂ ਵਿਧਾਨ ਸਭਾ ਚੋਣਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਪਾਰਟੀ ਨੇ ਦੋ ਸੂਤਰੀ ਪ੍ਰੋਗਰਾਮ ਉੱਤੇ ਅਮਲ ਕਰਨ ਲਈ ਪਾਰਟੀ ਦੇ ਹਰ ਵਰਕਰ ਨੂੰ ਲਾਮਬੰਦ ਹੋਣ ਲਈ ਕਿਹਾ। ਜ਼ਿਕਰ ਯੋਗ ਹੈ ਕਿ ਚੋਣਾਂ ਤੋਂ ਪਹਿਲਾਂ ਦੋ ਸੂਤਰੀ ਪ੍ਰੋਗਰਾਮ ਦੇ ਤਹਿਤ ਪਹਿਲਾ ਕੰਮ ਵੱਡੇ ਤੋਂ ਵੱਡਾ ਝੂਠ ਬੋਲ ਕੇ ਵੋਟਰ ਨੂੰ ਫਸਾਉਣਾ ਅਤੇ ਫੁਸਲਾਉਣਾ, ਦੂਜਾ ਕੰਮ ਇਮਾਨਦਾਰਾਂ ਨੂੰ ਛੱਡ ਕੇ ਉਸ ਬੰਦੇ ਤੋਂ ਚੰਦਾ ਲੈਣਾ, ਜਿਹੜਾ ਪੰਜਾਬ ਨੂੰ ਬਰਬਾਦ ਕਰ ਸਕਣ ਦੀ ਤਮੰਨਾ ਰੱਖਦਾ ਹੋਵੇ। ਮੀਟਿੰਗ ਵਿੱਚ ਇਹ ਵੀ ਤੈਅ ਕੀਤਾ ਗਿਆ ਕਿ ਸੱਤਾ ਆਉਣ ਪਿੱਛੋਂ ਇਸੇ ਤਰ੍ਹਾਂ ਪਾਰਟੀ ਦੇ ਸਿਰਫ ਦੋ ਸੂਤਰੀ ਪ੍ਰੋਗਰਾਮ 'ਤੇ ਕੰਮ ਕੀਤਾ ਜਾਵੇਗਾ। ਪਹਿਲਾ ਕੰਮ ਰੱਜ ਕੇ ਲੁੱਟਣਾ ਅਤੇ ਦੂਜਾ ਕੰਮ ਖਿਲਾਫ ਬੋਲਣ ਵਾਲੇ ਨੂੰ ਕੁੱਟਣਾ ਹੋਵੇਗਾ। ਇਸ ਮੀਟਿੰਗ ਵਿੱਚ ਤੈਅ ਕੀਤਾ ਗਿਆ ਕਿ ਸਰਕਾਰ ਆਉਣ ਉੱਤੇ ਰੇਤਾ, ਸ਼ਰਾਬ, ਦੜੇ-ਸੱਟੇ ਦਾ ਠੇਕਾ ਨਵੇਂ ਬੰਦਿਆਂ ਨੂੰ ਦੇਣ ਦੀ ਥਾਂ ਮੌਜੂਦਾ ਬੰਦਿਆਂ ਤੋਂ ਪਾਰਟੀ ਫੰਡ ਦੇ ਨਾਂਅ 'ਤੇ 10 ਗੁਣਾ ਵੱਧ ਰੇਟ ਵਧਾ ਕੇ ਸੈਟਿੰਗ ਕੀਤੀ ਜਾਵੇਗੀ ਤਾਂ ਜੋ ਪੰਜਾਬੀਆਂ ਦੀ ਪੂਰੀ ਤਰ੍ਹਾਂ ਅਕਲ ਟਿਕਾਣੇ ਲਿਆਂਦੀ ਜਾ ਸਕੇ।
ਮੀਟਿੰਗ ਦੌਰਾਨ ਸੀਨੀਅਰ ਉਪ ਪ੍ਰਧਾਨ ਪਿੰਕੇ ਦਿਮਾਗੀ ਨੇ ਕਿਹਾ ਕਿ ਸਾਡੀ ਪਾਰਟੀ ਦੀ ਸਰਕਾਰ ਆਉਣ ਉਤੇ ਅਸੀਂ ਗਰੀਬੀ ਦੂਰ ਕਰਨ ਦੀ ਥਾਂ ਗਰੀਬਾਂ ਨੂੰ ਟਿਕਾਣੇ ਲਾਉਣ ਦਾ ਕੰਮ ਕਰਾਂਗੇ ਤੇ ਅਜਿਹੇ ਸਖਤ ਕਾਨੂੰਨ ਲੈ ਕੇ ਆਵਾਂਗੇ ਕਿ ਗਰੀਬ ਬੰਦਾ ਆਪੇ ਪੰਜਾਬ ਛੱਡ ਕੇ ਕਿਸੇ ਹੋਰ ਪਾਸੇ ਖਿਸਕ ਜਾਵੇਗਾ। ਪਾਰਟੀ ਦੀ ਜਨਰਲ ਸਕੱਤਰ ਰੇਖਾ ਚਤਰ ਨੇ ਦੱਸਿਆ ਕਿ ਪੰਜਾਬ ਦੇ ਹਰ ਪਿੰਡ ਦੀਆਂ ਸੱਥਾਂ ਅਤੇ ਸ਼ਹਿਰ ਦੀਆਂ ਸਾਰੀਆਂ ਗਲੀਆਂ ਤੇ ਮੁੱਖ ਚੌਰਾਹਿਆਂ 'ਤੇ ਪਾਰਟੀ ਦੇ ਚੋਣ ਨਿਸ਼ਾਨ ‘ਜੁੱਤੀ’ ਦੇ ਵੱਡੇ ਹੋਰਡਿੰਗ ਤੇ ਪੋਸਟਰ ਦੋ ਦਿਨਾਂ ਦੇ ਅੰਦਰ ਲਾ ਦਿੱਤੇ ਜਾਣਗੇ ਤਾਂ ਜੋ ਲੋਕਾਂ ਦੇ ਦਿਲੋ-ਦਿਮਾਗ 'ਤੇ ਪਾਰਟੀ ਦਾ ਚੋਣ ਨਿਸ਼ਾਨ ‘ਜੁੱਤੀ’ ਛਾ ਜਾਵੇ ਅਤੇ ਵੋਟਾਂ ਦੀ ਗਿਣਤੀ ਵੇਲੇ ਈ ਵੀ ਐੱਮ ਮਸ਼ੀਨ ਵੀ ਜੁੱਤੀ ਨੂੰ ਪਈਆਂ ਵੋਟਾਂ ਗਿਣਦੀ-ਗਿਣਦੀ ਥੱਕ ਜਾਵੇ।
ਇਸ ਮੀਟਿੰਗ 'ਚ ਇਮਾਨਦਾਰ ਅਫਸਰਾਂ ਬਾਰੇ ਗਹਿਰੀ ਚਿੰਤਾ ਪ੍ਰਗਟ ਕੀਤੀ ਗਈ ਤੇ ਨਾ ਵਿਕਣ ਵਾਲੇ ਵੋਟਰਾਂ ਦਾ ਵੀ ਖਾਸਾ ਫਿਕਰ ਕੀਤਾ ਗਿਆ। ਰੇਖਾ ਵਿਹਲੀ ਨੇ ਪਾਰਟੀ ਦੇ ਪਿਛਲੇ 15 ਸਾਲਾਂ ਦਾ ਹਿਸਾਬ ਦੇ ਕੇ ਦੱਸਿਆ ਕਿ ਪਾਰਟੀ ਦੇ ਲੀਡਰਾਂ ਅਤੇ ਵਰਕਰਾਂ ਨੇ ਕਈ ਸਾਲਾਂ ਤੋਂ ਕਦੇ ਵੀ ਪਾਣੀ ਅਤੇ ਬਿਜਲੀ ਦਾ ਬਿੱਲ ਨਹੀਂ ਤਾਰਿਆ ਅਤੇ ਨਾ ਕਿਸੇ ਤੋਂ ਉਧਾਰ ਲੈ ਕੇ ਮੋੜਿਆ ਹੈ, ਜਿਸ ਨਾਲ ਪਾਰਟੀ ਦਾ ਮਾਣ ਦਿਨ ਦੁੱਗਣਾ ਰਾਤ ਚੌਗੁਣਾ ਵਧ ਰਿਹਾ ਹੈ। ਇਸ ਮੌਕੇ 'ਤੇ ਬੇਸੁਰਾ ਗਾਇਕ ਸ਼ੱਮੀ ਕਊਏ ਦੀ 18 ਗਾਣਿਆਂ ਦੀ ਡੀ ਵੀ ਡੀ ਜਾਰੀ ਕੀਤੀ ਗਈ, ਜਿਸ ਦਾ ਟਾਈਟਲ ਗੀਤ ‘ਗਰੀਬਾਂ ਦੇ ਜੁੱਤੀ ਵਰ੍ਹਨੀ ਚਾਹੀਦੀ’ ਨੂੰ ਪਾਰਟੀ ਦੇ ਲੀਡਰਾਂ ਅਤੇ ਪੱਤਰਕਾਰਾਂ ਨੇ ਬਹੁਤ ਸਰਾਹਿਆ।
ਇਸ ਮੌਕੇ ਪਾਰਟੀ ਨੇ ਉਨ੍ਹਾਂ ਖਾਸ ਵਰਕਰਾਂ ਨੂੰ ਵੀ ਸਨਮਾਨਤ ਕੀਤਾ ਜਿਹੜੇ ਲੋਕਾਂ ਨੂੰ ਕੁੰਡੀ ਪਾ ਕੇ ਬਿਜਲੀ ਚੋਰੀ ਕਰਨ ਦੀਆਂ ਨਵੀਆਂ ਤਰਕੀਬਾਂ ਦੱਸਦੇ ਹਨ। ਇਸ ਮੀਟਿੰਗ 'ਚ ਦਿਨ ਰਾਤ ਪਾਰਟੀ ਲਈ ਇਮਾਨਦਾਰੀ ਨਾਲ ਕੰਮ ਕਰਨ ਲਈ ਅਤੇ ਪੰਜਾਬ ਨੂੰ ਨਸ਼ਾ ਮੁਫਤ ਬਣਾਉਣ ਲਈ ਵੀ ਪ੍ਰਣ ਕੀਤਾ ਗਿਆ। ਇਸ ਮੌਕੇ 'ਤੇ ਜੇਲ੍ਹਾਂ ਤੋਂ ਭੱਜੇ ਕੈਦੀ ਮੁੜ ਫੜੇ ਜਾਣ ਬਾਰੇ ਪੰਜ ਮਿੰਟ ਮੌਨ ਵਰਤ ਰੱਖ ਕੇ ਅਫਸੋਸ ਕੀਤਾ ਗਿਆ। ਇਸ ਮੌਕੇ ਮੀਟਿੰਗ ਵਿੱਚ ਸ਼ਾਮਾ ਗੱਪੀ, ਸੰਨੀ ਦਲੇਰ, ਬੱਬੂ ਡਰਪੋਕ, ਵੀਨਾ ਸਿੱਧੀ, ਕੰਮੋ ਮਤਲਬੀ, ਅਮਨ ਸਿਰਫਿਰੀ, ਰਜਨੀ ਕਠੋਰ, ਸਾਹਿਬ ਫਾਈਟਰ, ਨੰਨ੍ਹਾ ਫੁਕਾਰ, ਸ਼ਸ਼ੀ ਬਲੈਕਮੇਲਰ, ਰਾਜਨ ਠੀਕ-ਠਾਕ, ਰਿੰਕੂ ਸ਼ਾਇਰ, ਵਿਜੇ ਜ਼ਾਲਮ, ਸੋਨੂੰ ਪ੍ਰੇਮੀ, ਅਜੈ ਮੂਰਖ, ਰਾਜਿੰਦਰ ਆਬਾਦੀ ਅਤੇ ਬੰਸੋ ਚੁਗਲਖੋਰ ਆਦਿ ਸ਼ਾਮਲ ਸਨ।