ਵਾਸ਼ਿੰਗਟਨ, 24 ਮਾਰਚ (ਪੋਸਟ ਬਿਊਰੋ)- ਕੋਰੋਨਾ ਤੋਂ ਨਾ ਕੇਵਲ ਜਨਤਕ ਨੁਕਸਾਨ ਹੋ ਰਿਹਾ ਹੈ, ਸਗੋਂ ਵੱਡੇ ਪੱਧਰ 'ਤੇ ਆਰਥਿਕ ਗਤੀਵਿਧੀਆਂ 'ਤੇ ਵੀ ਮਾੜਾ ਅਸਰ ਪਿਆ ਹੈ। ਦੁਨੀਆ ਦੇ ਸਭ ਤੋਂ ਤਾਕਤਵਰ ਸਿਆਸਤਦਾਨ ਡੋਨਾਲਡ ਟਰੰਪ ਵੀ ਇਸ ਤੋਂ ਨਹੀਂ ਬਚ ਸਕੇ। ਉਨ੍ਹਾਂ ਦੇ ਕਾਰੋਬਾਰੀ ਹਿੱਤ ਕਾਫੀ ਪ੍ਰਭਾਵਤ ਹੋਏ ਹਨ।
ਪਤਾ ਲੱਗਾ ਹੈ ਕਿ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦਾ ਪਰਵਾਰਕ ਹੋਟਲ ਦਾ ਕਾਰੋਬਾਰ ਵੀ ਲੜਖੜਾ ਗਿਆ ਹੈ। ਕਈ ਹੋਟਲਾਂ ਦੇ ਆਪਰੇਸ਼ਨਾਂ ਵਿੱਚ ਕਟੌਤੀ ਕਰਨੀ ਪਈ ਹੈ। ਇਨ੍ਹਾਂ ਸਭ ਦੇ ਹੋਰ ਅਦਾਰੇ ਖੁੱਲ੍ਹੇ ਹਨ ਅਤੇ ਸੋਸ਼ਲ ਮੀਡੀਆ ਵਿੱਚ ਉਨ੍ਹਾਂ ਨੂੰ ਪ੍ਰਮੋਟ ਕਰਨ ਦੀ ਵੀ ਕੋਸਿ਼ਸ਼ ਹੋ ਰਹੀ ਹੈ। ਜਾਣਕਾਰਾਂ ਦੇ ਦੱਸਣ ਮੁਤਾਬਕ ਪਿਛਲੇ ਦਿਨਾਂ ਵਿੱਚ ਟਰੰਪ ਆਰਗੇਨਾਈਜ਼ੇਸ਼ਨ ਨੇ ਨਿਊ ਯਾਰਕ ਅਤੇ ਵਾਸ਼ਿੰਗਟਨ ਦੇ ਹੋਟਲਾਂ ਵਿੱਚ ਸਟਾਫ ਦੀ ਗਿਣਤੀ ਵਿੱਚ ਕਟੌਤੀ ਕੀਤੀ ਹੈ। ਲਾਸ ਵੇਗਾਸ ਦੇ ਹੋਟਲ ਵਿੱਚ ਬੁਕਿੰਗ ਰੋਕ ਦਿੱਤੀ ਗਈ ਹੈ। ਲਾਸ ਏਂਜਲਸ ਅਤੇ ਮਿਆਮੀ ਵਿੱਚ ਗੋਲਫ ਕੋਰਸ ਬੰਦ ਕਰ ਦਿੱਤੇ ਹਨ। ਫਲੋਰੀਡਾ ਵਿਚਲਾ ਮਾਰ-ਏ-ਲਾਗੋ ਕਲੱਬ ਵੀ ਬੰਦ ਕਰ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਰਾਸ਼ਟਰਪਤੀ ਟਰੰਪ ਵੀ ਕਲੱਬ ਵਿੱਚ ਆਉਂਦੇ ਰਹਿੰਦੇ ਹਨ। ਇਸ ਹਾਲ ਵਿੱਚ ਅਗਲੇ ਦਿਨਾਂ ਵਿੱਚ ਹੋਰ ਛਾਂਟੀ ਦੇ ਸ਼ੱਕ ਕਾਰਨ ਇੱਕ ਕੰਪਨੀ ਦੇ ਐਗਜ਼ੀਕਿਊਟਿਵ ਦੱਸਦੇ ਹਨ ਕਿ ਇਹ ਆਖਰੀ ਬਦਲ ਹੋਵੇਗਾ। ਪਹਿਲ ਤਾਂ ਹਜ਼ਾਰਾਂ ਕਰਮਚਾਰੀਆਂ ਦੀ ਨੌਕਰੀ ਬਚਾਉਣ ਦੀ ਹੈ। ਕੰਪਨੀ ਦੇ ਕੋਲ ਦਰਜਨਾਂ ਗੋਲਫ ਕਲੱਬ ਅਤੇ ਸ਼ਿਕਾਗੋ, ਹਵਾਈ, ਨਿਊ ਯਾਰਕ, ਲਾਸ ਵੇਗਾਸ, ਵੈਨਕੂਵਰ, ਵਾਸ਼ਿੰਗਟਨ ਦੇ ਇਲਾਵਾ ਆਇਰਲੈਂਡ ਅਤੇ ਸਕਾਟਲੈਂਡ ਵਿੱਚ ਪੰਜ ਸਿਤਾਰਾ ਹੋਟਲ ਹਨ। ਇਹ ਅਦਾਰੇ ਅਜੇ ਖੁੱਲ੍ਹੇ ਹਨ ਤੇ ਕੰਪਨੀ ਨੇ ਸੋਸ਼ਲ ਮੀਡੀਆ ਅਤੇ ਡਾਇਰੈਕਟ ਈ-ਮੇਲ ਨਾਲ ਪ੍ਰਮੋਸ਼ਨਲ ਮੁਹਿੰਮ ਜਾਰੀ ਰੱਖੀ ਹੈ। ਇਸੇ ਲੜੀ ਵਿੱਚ ਨਿਊ ਯਾਰਕ ਸਿਟੀ ਵਿੱਚ ਸਥਿਤ ਇੱਕ ਜਨਤਕ ਗੋਲਫ ਕੋਰਸ-ਟਰੰਪ ਗੋਲਫ ਲਿੰਕਸ ਨੇ ਸ਼ੁੱਕਰਵਾਰ ਸਵੇਰੇ ਟਵਿੱਟਰ ਰਾਹੀਂ ਮਹਿਮਾਨਾਂ ਨੂੰ ਸੱਦਾ ਦਿੰਦੇ ਹੋਏ ਕਿਹਾ, ਤਾਜੀ ਹਵਾ ਚਾਹੀਦੀ ਹੈ? ਤਣਾਅ ਘੱਟ ਕਰਨ ਅਤੇ ਸੋਸ਼ਲ ਡਿਸਟੈਂਸਿੰਗ ਦੇ ਲਈ ਗੋਲਫ ਕਲੱਬ ਚੰਗੀ ਜਗ੍ਹਾ ਹੈ, ਜੋ ਖੁੱਲ੍ਹਾ ਹੈ।