ਕੁਈਨਜ਼ ਪਾਰਕ, 30 ਅਕਤੂਬਰ (ਪੋਸਟ ਬਿਊਰੋ) : ਐਨਡੀਪੀ ਦੀ ਡਿਪਟੀ ਲੀਡਰ ਸਾਰਾ ਸਿੰਘ (ਬਰੈਂਪਟਨ ਸੈਂਟਰ), ਗੁਰਰਤਨ ਸਿੰਘ (ਬਰੈਂਪਟਨ ਈਸਟ) ਤੇ ਕੈਵਿਨ ਯਾਰਡੇ (ਬਰੈਂਪਟਨ ਨੌਰਥ) ਨੇ ਇਹ ਗੱਲ ਜ਼ੋਰ ਦੇ ਕੇ ਆਖੀ ਕਿ ਬਰੈਂਪਟਨ, ਮਿਲਟਨ ਤੇ ਮਾਰਖਮ ਵਿੱਚ ਕਾਲਜ ਤੇ ਯੂਨੀਵਰਸਿਟੀ ਕੈਂਪਸਿਜ਼ ਲਈ ਫੰਡ ਬਹਾਲ ਕਰਵਾਉਣ ਲਈ ਐਨਡੀਪੀ ਵੱਲੋਂ ਲਿਆਂਦੇ ਮਤੇ ਖਿਲਾਫ ਵੋਟਾਂ ਪਾਉਣ ਵਾਲੇ ਕੰਜ਼ਰਵੇਟਿਵਾਂ ਨੂੰ ਅਜੇ ਕਈ ਸਵਾਲਾਂ ਦੇ ਜਵਾਬ ਦੇਣੇ ਹੋਣਗੇ।
ਜਿ਼ਕਰਯੋਗ ਹੈ ਕਿ ਸੋਮਵਾਰ ਨੂੰ ਐਨਡੀਪੀ ਆਗੂ ਐਂਡਰੀਆ ਹੌਰਵਥ ਨੇ ਇਹ ਮਤਾ ਪੇਸ਼ ਕੀਤਾ ਸੀ ਕਿ ਫੋਰਡ ਵੱਲੋਂ ਜੀਟੀਏ ਯੂਨੀਵਰਸਿਟੀ ਕੈਂਪਸ ਨੂੰ ਰੱਦ ਕਰਨ ਦੀ ਕੀਤੀ ਜਾ ਰਹੀ ਕੋਸਿ਼ਸ਼ ਤੇ ਇਸ ਸਬੰਧ ਵਿੱਚ ਫੰਡਾਂ ਵਿੱਚ ਕੀਤੀਆਂ ਜਾਣ ਵਾਲੀਆਂ ਕਟੌਤੀਆਂ ਨੂੰ ਖਤਮ ਕੀਤਾ ਜਾਵੇ। ਹੌਰਵਥ ਨੇ ਮੰਗ ਕੀਤੀ ਕਿ ਇਨ੍ਹਾਂ ਫੰਡਾਂ ਨੂੰ ਸਗੋਂ ਫੌਰੀ ਤੌਰ ਉੱਤੇ ਜਾਰੀ ਕੀਤਾ ਜਾਵੇ। ਪਰ ਕੰਜ਼ਰਵੇਟਿਵ ਐਮਪੀਜ਼ ਕਨਾਪਥੀ( ਮਾਰਖਮ-ਥੌਰਨਹਿੱਲ), ਬਿੱਲ ਪਾਂਗ (ਮਾਰਖਮ-ਯੂਨੀਅਨਵਿੱਲੇ), ਪਰਮ ਗਿੱਲ (ਮਿਲਟਨ), ਪ੍ਰਭਮੀਤ ਸਰਕਾਰੀਆ (ਬਰੈਂਪਟਨ ਸਾਊਥ) ਤੇ ਅਮਰਜੋਤ ਸਿੱਧੂ (ਬਰੈਂਪਟਨ ਵੈਸਟ) ਇਸ ਸਬੰਧ ਵਿੱਚ ਆਪਣੀਆਂ ਕਮਿਊਨਿਟੀਜ਼ ਦੇ ਪੱਖ ਉੱਤੇ ਬੋਲਣ ਤੋਂ ਅਸਮਰੱਥ ਰਹੇ। ਉਨ੍ਹਾਂ ਵੋਟ ਕਰਨ ਤੋਂ ਵੀ ਇਨਕਾਰ ਕਰ ਦਿੱਤਾ। ਇਸ ਨਾਲ ਬਾਕੀ ਟੋਰੀਜ਼ ਨੂੰ ਵੀ ਮਤੇ ਨੂੰ ਖੂੰਜੇ ਲਾਉਣ ਦਾ ਮੌਕਾ ਮਿਲ ਗਿਆ।
ਸਾਰਾ ਸਿੰਘ ਨੇ ਇਸ ਮੌਕੇ ਆਖਿਆ ਕਿ ਫੋਰਡ ਦੇ ਕੰਜ਼ਰਵੇਟਿਵਾਂ ਕੋਲ ਇਹ ਮੌਕਾ ਸੀ ਕਿ ਉਹ ਪ੍ਰੀਮੀਅਰ ਫੋਰਡ ਵੱਲੋਂ ਬਰੈਂਪਟਨ, ਮਿਲਟਨ ਤੇ ਮਾਰਖਮ ਵਿੱਚ ਯੂਨੀਵਰਸਿਟੀ ਕੈਂਪਸ ਦੇ ਨਿਰਮਾਣ ਲਈ ਚਿਰਾਂ ਤੋਂ ਉਡੀਕੇ ਜਾ ਰਹੇ ਫੰਡਾਂ ਨੂੰ ਰੱਦ ਕਰਨ ਸਦਕਾ ਕੀਤੇ ਗਏ ਨੁਕਸਾਨ ਦੀ ਭਰਪਾਈ ਕਰ ਦਿੰਦੇ। ਐਨਡੀਪੀ ਨੇ ਸਾਰੇ ਐਮਪੀਪੀਜ਼ ਨੂੰ ਇੱਕਜੁੱਟ ਹੋ ਕੇ ਇਨ੍ਹਾਂ ਤਿੰਨ ਯੂਨੀਵਰਸਿਟੀਜ਼ ਲਈ ਫੰਡ ਬਹਾਲ ਕਰਨ ਦੇ ਹੱਕ ਵਿੱਚ ਵੋਟ ਕਰਨ ਦਾ ਸੱਦਾ ਵੀ ਦਿੱਤਾ।