ਬਾਲੀਵੁੱਡ ਵਿੱਚ ਇਨ੍ਹੀਂ ਦਿਨੀਂ ਚਰਚਾ ਹੈ ਕਿ ਅਕਸ਼ੈ ਕੁਮਾਰ ਨੂੰ ਅਗਲੀ ਫਿਲਮ ਲਈ 120 ਕਰੋੜ ਰੁਪਏ ਮਿਲਣ ਵਾਲੇ ਹਨ। ਉਂਝ ਇਸ ਦੀ ਪੁਸ਼ਟੀ ਨਹੀਂ ਹੋ ਸਕੀ, ਪਰ ਇਸ ਦੀ ਸਟਾਰ ਕਾਸਟ ਦਾ ਐਲਾਨ ਹੋ ਗਿਆ ਹੈ। ‘ਅਤਰੰਗੀ ਰੇ’ ਨਾਂਅ ਦੀ ਇਸ ਫਿਲਮ ਨੂੰ ‘ਜ਼ੀਰੋ’ ਦੇ ਨਿਰਦੇਸ਼ਕ ਆਨੰਦ ਐੱਲ ਰਾਏ ਬਣਾ ਰਹੇ ਹਨ। ਇਸ ਦੀ ਸ਼ੂਟਿੰਗ ਇੱਕ ਮਾਰਚ ਤੋਂ ਸ਼ੁਰੂ ਹੋ ਚੁੱਕੀ ਹੈ। ਫਿਲਮ ਵਿੱਚ ਅਕਸ਼ੈ ਨਾਲ ਹੋਵੇਗਾ ਦੱਖਣ ਭਾਰਤ ਦਾ ਮਸ਼ਹੂਰ ਅਭਿਨੇਤਾ ਧਨੁਸ਼, ਜੋ ਇਸ ਤੋਂ ਪਹਿਲਾਂ ਆਨੰਦ ਐਲ ਰਾਏ ਨਾਲ ਫਿਲਮ ‘ਰਾਂਝਣਾ' ਕਰ ਚੁੱਕਾ ਹੈ। ਇਨ੍ਹਾਂ ਦੋਵਾਂ ਨਾਲ ਹੋਵੇਗੀ ਸਾਰਾ ਅਲੀ ਖਾਨ, ਜੋ ਹੌਲੀ-ਹੌਲੀ ਨਵੇਂ ਜ਼ਮਾਨੇ ਦੀਆਂ ਅਭਿਨੇਤਰੀਆਂ 'ਚ ਆਪਣੀ ਸਥਿਤੀ ਮਜ਼ਬੂਤ ਕਰਦੀ ਜਾ ਰਹੀ ਹੈ।
ਫਿਲਮ ਬਾਰੇ ਉਤਸ਼ਾਹਤ ਅਕਸ਼ੈ ਕੁਮਾਰ ਨੇ ਕਿਹਾ, ‘‘ਮੈਂ ਆਨੰਦ ਨਾਲ ਕੰਮ ਕਰਨ ਬਾਰੇ ਕਾਫੀ ਉਤਸ਼ਾਹਤ ਹਾਂ, ਜਦੋਂ ਉਨ੍ਹਾਂ ਨੇ ਮੈਨੂੰ ਕਹਾਣੀ ਸੁਣਾਈ ਤਾਂ ਮੈਨੂੰ ਹਾਂ ਕਹਿਣ 'ਚ 10 ਮਿੰਟ ਵੀ ਨਹੀਂ ਲੱਗੇ। ਫਿਲਮ ਵਿੱਚ ਮੇਰੇ ਕਿਰਦਾਰ ਲਈ ਭਾਵੇਂ ਜ਼ਿਆਦਾ ਦਿਨਾਂ ਦੀ ਸ਼ੂਟਿੰਗ ਦੀ ਲੋੜ ਨਾ ਹੋਵੇ, ਪਰ ਇਹ ਕਿਰਦਾਰ ਅਜਿਹਾ ਹੈ ਕਿ ਮੇਰਾ ਦਿਲ ਇਸ ਲਈ ਨਾਂਹ ਕਰ ਹੀ ਨਹੀਂ ਸਕਿਆ। ਇਹ ਕਿਰਦਾਰ ਅਜਿਹਾ ਹੈ ਕਿ ਇਹ ਮੈਨੂੰ ਪੂਰੀ ਉਮਰ ਯਾਦ ਰਹਿ ਜਾਣ ਵਾਲਾ ਹੈ।”