ਇਸ ਸਾਲ ਹਿਨਾ ਖਾਨ ਦਾ ਨਾਂ ਉਨ੍ਹਾਂ ਅਭਿਨੇਤਰੀਆਂ ਦੀ ਸੂਚੀ ਵਿੱਚ ਜੁੜ ਗਿਆ, ਜਿਨ੍ਹਾਂ ਨੇ ਛੋਟੇ ਪਰਦੇ 'ਤੇ ਨਾਂਅ ਕਮਾਉਣ ਤੋਂ ਬਾਅਦ ਵੱਡੇ ਪਰਦੇ ਦਾ ਰੁਖ਼ ਕੀਤਾ ਹੈ। ਵਿਕਰਮ ਭੱਟ ਦੀ ਸਸਪੈਂਸ ਥ੍ਰਿਲਰ ਫਿਲਮ ‘ਹੈਕਡ’ ਨਾਲ ਉਸ ਨੇ ਡੈਬਿਊ ਕੀਤਾ। ਉਸ ਦੀ ਪਹਿਲੀ ਫਿਲਮ ਬਾਕਸ ਆਫਿਸ ਤੱਕ ਦਰਸ਼ਕਾਂ ਨੂੰ ਖਿੱਚਣ 'ਚ ਅਸਫਲ ਰਹੀ। ਉਂਝ ਹਿਨਾ ਦੀ ਡੈਬਿਊ ਫਿਲਮ ‘ਹੈਕਡ’ ਨਹੀਂ, ‘ਲਾਈਨਸ’ ਹੋਣੀ ਸੀ, ਪਰ ਕਿਸੇ ਕਾਰਨ ਉਸ ਦੀ ਫਿਲਮ ਦੀ ਰਿਲੀਜ਼ ਟਲ ਗਈ। ਉਸ ਪਹਿਲੀ ਫਿਲਮ ਦੀ ਅਸਫਲਤਾ ਨਾਲ ਉਹ ਨਿਰਾਸ਼ ਨਹੀਂ, ਕਿਉਂਕਿ ਇਸ ਸਮੇਂ ਉਸ ਕੋਲ ਇੱਕ-ਦੋ ਨਹੀਂ, ਚਾਰ ਫਿਲਮਾਂ ਹਨ। ਇਨ੍ਹਾਂ ਵਿੱਚ ‘ਲਾਈਨਸ' ਤੋਂ ਇਲਾਵਾ ‘ਸੋਲਮੇਟ’, ‘ਵਿਸ਼ ਲਿਸਟ’ ਅਤੇ ‘ਦਿ ਕੰਟਰੀ ਆਫ ਬਲਾਈਂਡ’ ਸ਼ਾਮਲ ਹਨ। ਹਿਨਾ ਮੰਨਦੀ ਹੈ ਕਿ ਰਿਆਲਿਟੀ ਸ਼ੋਅ ‘ਬਿਗ ਬੌਸ’ ਵਿੱਚ ਹਿੱਸਾ ਲੈਣਾ ਉਸ ਦੇ ਕਰੀਅਰ ਲਈ ਇੱਕ ਅਹਿਮ ਮੋੜ ਸਾਬਤ ਹੋਇਆ ਹੈ। ਉਹ ਕਹਿੰਦੀ ਹੈ, ‘‘ਕਦੇ ਸੋਚਿਆ ਨਹੀਂ ਸੀ ਕਿ ਮੈਂ ਕਦੇ ਫੈਸ਼ਨ ਦੀਵਾ ਬਣ ਸਕਦੀ ਹਾਂ ਕਿਉਂਕਿ ਛੋਟੇ ਪਰਦੇ 'ਤੇ ਆਪਣੇ ਸੀਰੀਅਲ ‘ਯੇ ਰਿਸ਼ਤਾ ਕਯਾ ਕਹਿਲਾਤਾ ਹੈ’ ਵਿੱਚ ਇਸ ਤੋਂ ਪਹਿਲਾਂ ਤੱਕ ਮੈਂ ਘਰੇਲੂ ਔਰਤ ਵਾਲਾ ਰੋਲ ਹੀ ਕੀਤਾ ਸੀ।'' ਉਹ ਕਹਿੰਦੀ ਹੈ, ‘‘ਛੋਟੇ ਪਰਦੇ ਨਾਲ ਫਿਲਮਾਂ ਦਾ ਇਹ ਸਫਰ ਬੜਾ ਚੰਗਾ ਰਿਹਾ ਹੈ। ਫਿਲਮ ਜਗਤ ਵਿੱਚ ਕਦਮ ਰੱਖਣ ਦਾ ਰਿਸਕ ਮੈਂ ਸੋਚ-ਸਮਝ ਕੇ ਲਿਆ ਕਿਉਂਕਿ ਮੈਂ ਜ਼ਿੰਦਗੀ 'ਚ ਅੱਗੇ ਵਧਣ ਵਿੱਚ ਵਿਸ਼ਵਾਸ ਰੱਖਦੀ ਹਾਂ।”
ਆਪਣੀ ਫਿਲਮ ‘ਕੰਟਰੀ ਆਫ ਬਲਾਈਂਡ’ ਤੋਂ ਉਤਸ਼ਾਹਤ ਹਿਨਾ ਕਹਿੰਦੀ ਹੈ, ‘‘ਇਹ ਮੇਰੀ ਪਹਿਲੀ ਹਾਲੀਵੁੱਡ ਫਿਲਮ ਹੈ, ਜੋ ਐੱਚ ਜੀ ਵੈਲਸ ਦੀ ਇੱਕ ਲਘੂ ਕਥਾ ਉਤੇ ਆਧਾਰਤ ਹੈ, ਜੋ 13ਵੀਂ ਸਦੀ 'ਚ ਇੱਕ ਘਾਟੀ ਵਿੱਚ ਰਹਿਣ ਵਾਲੇ ਲੋਕਾਂ ਦੀ ਕਹਾਣੀ ਹੈ, ਜਿਨ੍ਹਾਂ ਨੂੰ ਬਾਹਰੀ ਲੋਕਾਂ ਨਾਲ ਮਿਲਣ ਜੁਲਣ ਵਿੱਚ ਰੁਚੀ ਨਹੀਂ ਸੀ।” ਇਸ ਵਿੱਚ ਆਪਣੇ ਰੋਲ ਬਾਰੇ ਹਿਨਾ ਨੇ ਦੱਸਿਆ, ‘‘ਇਸ 'ਚ ਮੇਰਾ ਰੋਲ ਪੂਰੀ ਤਰ੍ਹਾਂ ਗਲੈਮਰਹੀਣ ਹੈ ਤੇ ਮੈਂ ਇੱਕ ਨੇਤਰਹੀਣ ਲੜਕੀ ਦਾ ਰੋਲ ਕਰ ਰਹੀ ਹਾਂ, ਜਿਸ ਦੇ ਵਾਲ ਹਮੇਸ਼ਾ ਉਲਝੇ ਰਹਿੰਦੇ ਹਨ ਅਤੇ ਉਹ ਜਾਨਵਰਾਂ ਦੀ ਖੱਲ ਨਾਲ ਬਣੇ ਕੱਪੜੇ ਪਹਿਨਦੀ ਹੈ।”