ਬੀਤੇ ਦਿਨੀਂ ਰਿਲੀਜ਼ ਫਿਲਮ ‘ਬਾਲਾ’, ‘ਜਬਰੀਆ ਜੋੜੀ’ ਸਮੇਤ ਕਈ ਫਿਲਮਾਂ ਦੀ ਸ਼ੂਟਿੰਗ ਲਖਨਊ ਵਿੱਚ ਕੀਤੀ ਗਈ। ਇਸ ਦੇ ਬਾਅਦ ਕਿਆਰਾ ਅਡਵਾਨੀ ਤੇ ਕਾਰਤਿਕ ਆਰੀਅਨ ਆਪਣੀ ਫਿਲਮ ‘ਭੂਲ ਭੁਲੱਈਆ 2’ ਦੀ ਸ਼ੂਟਿੰਗ ਦੇ ਲਈ ਲਖਨਊ ਪਹੁੰਚ ਰਹੇ ਹਨ। ਪਹਿਲਾਂ ਦੋਵੇਂ ਜੈਪੁਰ ਵਿੱਚ ਸ਼ੂਟ ਕਰ ਰਹੇ ਸਨ। ਸੂਤਰਾਂ ਮੁਤਾਬਕ ਦੋਵੇਂ ਇੱਕ ਹਫਤੇ ਤੋਂ ਵੱਧ ਉਥੇ ਸ਼ੂਟਿੰਗ ਕਰਨਗੇ। ਕਿਆਰਾ ਦੀ ਆਗਾਮੀ ਫਿਲਮ ‘ਇੰਦੂ ਕੀ ਜਵਾਨੀ’ ਦੀ ਸ਼ੂਟਿੰਗ ਵੀ ਲਖਨਊ ਵਿੱਚ ਹੋਈ ਹੈ, ਜਦ ਕਿ ਕਾਰਤਿਕ ਆਰੀਅਨ ਆਪਣੀ ਫਿਲਮ ‘ਪਤੀ ਪਤਨੀ ਔਰ ਵੋਹ’ ਦੀ ਸ਼ੂਟਿੰਗ ਲਖਨਊ ਵਿੱਚ ਕਰ ਚੁੱਕੇ ਹਨ। ਦੋਵੇਂ ਦੂਸਰੀ ਵਾਰ ਲਖਨਊ ਆ ਰਹੇ ਹਨ। ਕਿਆਰਾ ਨੂੰ ਲਖਨਊ ਦਾ ਖਾਣਾ ਅਤੇ ਕੱਪੜੇ ਪਸੰਦ ਹਨ। ਉਹ ਜਦ ਲਖਨਊ ਵਿੱਚ ਹੁੰਦੀ ਹੈ ਤਾਂ ਉਥੇ ਲੋਕਲ ਮਾਰਕੀਟ ਵਿੱਚ ਸ਼ਾਪਿੰਗ ਕਰਨ ਜਾਂਦੀ ਹੈ। ਕਿਆਰਾ ਲਈ ਇਹ ਮੌਕਾ ਖਾਸ ਹੈ, ਕਿਉਂਕਿ ਇਸ ਵਾਰ ਫਿਲਮ ਦਾ ਸ਼ਡਿਊਲ ਲੰਬਾ ਹੈ ਅਤੇ ਉਹ ਸਮਾਂ ਕੱਢ ਕੇ ਲਖਨਊ ਨੂੰ ਐਕਸਪਲੋਰ ਕਰੇਗੀ।
ਅਕਸ਼ੈ ਕੁਮਾਰ ਅਤੇ ਵਿਦਿਆ ਬਾਲਨ ਦੀ ‘ਭੂਲ ਭੁਲੱਈਆ’ ਹਾਰਰ ਅਤੇ ਕਾਮੇਡੀ ਨਾਲ ਭਰਪੂਰ ਫਿਲਮ ਸੀ। ਉਹੋ ਨਿਰਮਾਤਾ ਇਸ ਦੀ ਦੂਸਰੀ ਕਿਸ਼ਤ ਲਈ ਬਾਲੀਵੁੱਡ ਦੇ ਕੁਝ ਚੰਗੇ ਕਲਾਕਾਰ ਇਕੱਠੇ ਲਿਆ ਰਹੇ ਹਨ। ਅਨੀਸ ਬਜ਼ਮੀ ਦੇ ਨਿਰਦੇਸ਼ਨ ਵਾਲੀ ‘ਭੂਲ ਭੁੱਲਈਆ 2’ ਵਿੱਚ ਤੱਬੂ ਵੀ ਕਿਆਰਾ ਅਤੇ ਕਾਰਤਿਕ ਦੇ ਨਾਲ ਆਪਣਾ ਜਲਵਾ ਦਿਖਾਏਗੀ।