ਬਰੈਂਪਟਨ, 12 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਵਿੱਚ ਕੋਵਿਡ-19 ਦੇ ਵੱਧ ਰਹੇ ਮਾਮਲਿਆਂ ਨੂੰ ਵੇਖਦਿਆਂ ਹੋਇਆਂ ਵਿਲੀਅਮ ਓਸਲਰ ਹੈਲਥ ਸਿਸਟਮ ਫਾਊਂਡੇਸ਼ਨ (ਓਸਲਰ ਫਾਊਂਡੇਸ਼ਨ) ਨੇ 4 ਅਪਰੈਲ ਨੂੰ ਕਰਵਾਇਆ ਜਾਣ ਵਾਲਾ ਹੋਲੀ ਗਾਲਾ ਰੱਦ ਕਰਨ ਦਾ ਫੈਸਲਾ ਕੀਤਾ ਹੈ।
ਓਸਲਰ ਫਾਊਂਡੇਸ਼ਨ ਵੱਲੋਂ ਆਪਣੇ ਸਪਾਂਸਰਜ਼, ਕਮੇਟੀ ਮੈਂਬਰਾਂ ਤੇ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਗਿਆ, ਜਿਨ੍ਹਾਂ ਨੇ ਕਈ ਸਾਲਾਂ ਤੱਕ ਓਸਲਰ ਦੇ ਡਾਕਟਰਾਂ, ਨਰਸਾਂ ਤੇ ਸਟਾਫ, ਜਿਹੜਾ ਪੂਰੇ ਸਮਰਪਣ ਨਾਲ 24/7 ਅਜਿਹੇ ਔਖੇ ਵੇਲਿਆਂ ਵਿੱਚ ਵੀ ਕੰਮ ਕਰ ਰਹੇ ਹਨ, ਦਾ ਸਾਥ ਦਿੱਤਾ। ਓਸਲਰ ਫਾਊਂਡੇਸ਼ਨ ਦੇ ਪ੍ਰੈਜ਼ੀਡੈਂਟ ਤੇ ਸੀਈਓ ਕੇਨ ਮੇਅਹਿਊ ਨੇ ਆਖਿਆ ਕਿ ਓਸਲਰ ਹਸਪਤਾਲਾਂ ਦਾ ਸਾਰਾ ਸਾਜ਼ੋ ਸਮਾਨ ਕਮਿਊਨਿਟੀ ਵੱਲੋਂ ਦਿੱਤੇ ਫੰਡ ਨਾਲ ਹੀ ਬਣਿਆ ਹੈ। ਆਪਣੀ ਪੂਰੀ ਜਿ਼ੰਦਗੀ ਵਿੱਚ ਹਾਸਲ ਕਰਨ ਵਾਲੀ 80 ਫੀ ਸਦੀ ਸਿਹਤ ਸੰਭਾਲ ਅਸੀਂ ਕਮਿਊਨਿਟੀ ਹਸਪਤਾਲ ਤੋਂ ਹੀ ਹਾਸਲ ਕਰਦੇ ਹਾਂ।
ਉਨ੍ਹਾਂ ਆਖਿਆ ਕਿ ਇਸੇ ਲਈ ਹੋਲੀ ਗਾਲਾ ਵਰਗੇ ਪ੍ਰੋਗਰਾਮ ਬਹੁਤ ਜਿ਼ਆਦਾ ਅਹਿਮ ਹਨ। ਇਸ ਲਈ ਓਸਲਰ ਦਾ ਮੰਨਣਾ ਹੈ ਕਿ ਤੁਹਾਨੂੰ ਉਸ ਸਮੇਂ ਹੈਲਥ ਕੇਅਰ ਮੁਹੱਈਆ ਕਰਵਾਈ ਜਾਣੀ ਚਾਹੀਦੀ ਹੈ ਜਦੋਂ ਤੁਹਾਨੂੰ ਇਸ ਦੀ ਸੱਭ ਤੋਂ ਵੱਧ ਲੋੜ ਹੈ। ਸਾਡੀ ਕਮਿਊਨਿਟੀ ਦੀ ਸਿਹਤ ਓਸਲਰ ਦੀ ਮੱੁਖ ਤਰਜੀਹ ਹੈ ਤੇ ਇਸ ਲਈ ਅਸੀਂ ਆਪਣੇ ਕੇਅਰਗਿਵਰਜ਼ ਦੇ ਹੌਸਲੇ ਤੇ ਸਮਰਪਣ ਭਾਵਨਾਂ ਦੇ ਜਜ਼ਬੇ ਦੇ ਜਸ਼ਨ ਮਨਾਉਣ ਲਈ ਹੋਲੀ ਗਾਲਾ 2021 ਦੀ ਪੀਅਰਸਨ ਕਨਵੈਨਸ਼ਨ ਸੈਂਟਰ ਵਿੱਚ ਪੱਬਾਂ ਭਾਰ ਹੋ ਕੇ ਉਡੀਕ ਕਰਾਂਗੇ।