ਚਾਲੀ ਸਾਲਾਂ ਦੀ ਹੋਣ ਜਾ ਰਹੀ ਕਰੀਨਾ ਕਪੂਰ ਦੀ ਖੂਬਸੂਰਤੀ ਤੇ ਫਿਟਨੈਸ ਅੱਜ ਵੀ ਬੇਜੋੜ ਹੈ। ਇੰਨਾ ਹੀ ਨਹੀਂ, ਵਿਆਹ ਤੇ ਮਾਂ ਬਣਨ ਤੋਂ ਬਾਅਦ ਵੀ ਉਸ ਦਾ ਫਿਲਮੀ ਕਰੀਅਰ ਸਹੀ ਗਤੀ ਨਾਲ ਅੱਗੇ ਵਧ ਰਿਹਾ ਹੈ। ਉਸ ਦੀ ਪਿਛਲੀ ਫਿਲਮ ‘ਗੁੱਡ ਨਿਊਜ਼’ ਨੇ ਬਾਕਸ ਆਫਿਸ 'ਤੇ ਖੂਬ ਕਮਾਈ ਕੀਤੀ ਅਤੇ ਜਲਦੀ ਹੀ ਉਹ ਫਿਲਮ ‘ਅੰਗਰੇਜ਼ੀ ਮੀਡੀਅਮ’ ਅਤੇ ਆਮਿਰ ਖਾਨ ਨਾਲ ਫਿਲਮ ‘ਲਾਲ ਸਿੰਘ ਚੱਢਾ' ਵਿੱਚ ਆਏਗੀ। ਪਿੱਛੇ ਜਿਹੇ ਲੈਕਮੇ ਫੈਸ਼ਨ ਵੀਕ ਦੇ ਗ੍ਰੈਂਡ ਫਿਨਾਲੇ ਵਿੱਚ ਬਤੋਰ ਸ਼ੋਅ-ਸਟਾਪਰ ਹਰੇ ਰੰਗ ਦੇ ਇੱਕ ਬਹੁਤ ਸੁੰਦਰ ਗਾਊਨ 'ਚ ਰੈਂਪ 'ਤੇ ਚੱਲਦਿਆਂ ਵੀ ਉਸ ਨੇ ਸਾਰਿਆਂ ਨੂੰ ਆਪਣੀ ਖੂਬਸੂਰਤੀ ਨਾਲ ਇੱਕ ਵਾਰ ਫਿਰ ਹੈਰਾਨ ਕਰ ਦਿੱਤਾ ਹੈ। ਪੇਸ਼ ਹਨ ਕਰੀਨਾ ਨਾਲ ਗੱਲਬਾਤ ਦੇ ਕੁਝ ਅੰਸ਼ :
* ਤੁਹਾਨੂੰ ਫਿਲਮ ਨਗਰੀ ਵਿੱਚ 20ਵਾਂ ਸਾਲ ਹੈ। ਅੱਜ ਤੱਕ ਦੇ ਆਪਣੇ ਸਫਰ ਅਤੇ ਬਦਲਾਅ ਨੂੰ ਕਿਵੇਂ ਦੇਖਦੇ ਹੋ?
-ਮੇਰਾ ਫਿਲਮੀ ਸਫਰ ਬਹੁਤ ਚੰਗਾ ਰਿਹਾ ਅਤੇ ਇਹ ਉਸ ਪ੍ਰੇਮ ਤੇ ਸਨੇਹ ਦੇ ਕਾਰਨ ਹੈ, ਜੋ ਮੈਂ ਕਈ ਸਾਲਾਂ ਵਿੱਚ ਪ੍ਰਾਪਤ ਕੀਤਾ ਹੈ। ਇਸ ਦੇ ਲਈ ਮੈਂ ਬਹੁਤ ਧੰਨਵਾਦੀ ਹਾਂ। ਬਾਕੀ ਬਦਲਾਅ ਕੀ ਹੋਣਗੇ। ਹਰ ਸਾਲ ਨਵੇਂ ਕਲਾਕਾਰ ਆਉਂਦੇ ਹਨ। ਕੁਝ ਕਾਮਯਾਬ ਹੁੰਦੇ ਹਨ ਅਤੇ ਸਟਾਰਡਮ ਪਾਉਂਦੇ ਹਨ। ਸ਼ੁਕਰ ਹੈ ਮੈਂ ਅੱਜ ਵੀ ਉਥੇ ਹਾਂ, ਜਿੱਥੇ ਪਹਿਲਾਂ ਸੀ।
* ਅਜੇ ਵੀ ਤੁਸੀਂ ਕਿਸੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਤੇ ਨਹੀਂ ਹੋ। ਕੀ ਇਹ ਲਾਈਮ ਲਾਈਟ ਤੋਂ ਬਾਹਰ ਰਹਿਣ ਦਾ ਸੋਚਿਆ-ਸਮਝਿਆ ਯਤਨ ਹੈ ਜਾਂ ਤੁਹਾਨੂੰ ਇਸ ਤੋਂ ਨਫਰਤ ਹੈ?
- ਨਹੀਂ, ਮੈਂ ਇਸ ਤੋਂ ਬਿਲਕੁਲ ਨਫਰਤ ਨਹੀਂ ਕਰਦੀ ਅਤੇ ਇਹ ਵੀ ਨਹੀਂ ਕਹਿੰਦੀ ਕਿ ਸੋਸ਼ਲ ਮੀਡੀਆ 'ਤੇ ਨਾ ਆਓ। ਇਹ ਡਿਜੀਟਲ ਯੁੱਗ ਹੈ ਅਤੇ ਚੀਜ਼ਾਂ ਬਦਲ ਰਹੀਆਂ ਹਨ, ਇਸ ਲਈ ਤੁਸੀਂ ਨਹੀਂ ਜਾਣਦੇ ਕਿ ਅੱਗੇ ਕੀ ਹੋਵੇਗਾ। ਯਕੀਨੀ ਤੌਰ 'ਤੇ ਮੈਂ ਆਪਣੇ ਪ੍ਰਸ਼ੰਸਕਾਂ ਨਾਲ ਜੁੜੇ ਰਹਿਣਾ ਚਾਹੁੰਦੀ ਹਾਂ, ਮੈਂ ਉਨ੍ਹਾਂ ਦੇ ਨੇੜੇ ਰਹਿਣਾ ਚਾਹੁੰਦੀ ਹਾਂ। ਮੈਨੂੰ ਪਤਾ ਹੈ ਕਿ ਬਹੁਤ ਸਾਰੇ ਆਨਲਾਈਨ ਇੰਸਟਾਗ੍ਰਾਮ ਹੈਂਡਲ ਅਤੇ ਮੇਰੇ ਫੈਨ ਪੇਜ ਹਨ। ਦੇਖਦੇ ਹਾਂ, ਮੈਂ ਕੁਝ ਕਰਨ ਦੀ ਸੋਚ ਰਹੀ ਹਾਂ ਅਤੇ ਇਸ 'ਚ ਬਹੁਤ ਸਮਾਂ ਨਹੀਂ ਲੱਗੇਗਾ। ਮੈਂ ਜਲਦੀ ਕੁਝ ਲੈ ਕੇ ਆਵਾਂਗੀ।
* ਵੈੱਬ ਡੈਬਿਊ ਦੀ ਕੋਈ ਯੋਜਨਾ?
- ਅਜੇ ਨਹੀਂ। ਮੈਂ ਆਮਿਰ ਖਾਨ ਦੀ ਫਿਲਮ ‘ਲਾਲ ਸਿੰਘ ਚੱਢਾ’ ਵਿੱਚ ਬਿਜ਼ੀ ਹਾਂ ਅਤੇ ਫਿਰ ਉਸ ਤੋਂ ਬਾਅਦ ‘ਤਖਤ' ਦੀ ਸ਼ੂਟਿੰਗ ਸ਼ੁਰੂ ਕਰਨੀ ਹੈ। ਅਜੇ ਬਹੁਤ ਕੁਝ ਕਰ ਰਹੀ ਹਾਂ, ਪਰ ਮੈਨੂੰ ਡਿਜੀਟਲ ਪਲੇਟਫਾਰਮ ਨਾਲ ਪਿਆਰ ਹੈ। ਇਸ ਬਾਰੇ ਤਾਂ ਸਾਡੇ ਘਰ 'ਚ ਪ੍ਰਤੀਯੋਗਤਾ ਹੈ ਕਿਉਂਕਿ ਜੇ ਕੁਝ ਕਰਾਂਗੀ ਤਾਂ ਉਹ ਸੈਫ ਦੀ ‘ਸੈਕ੍ਰੇਡ ਗੇਮਸ’ ਵਰਗਾ ਹੀ ਕੁਝ ਚੰਗਾ ਹੋਣਾ ਚਾਹੀਦਾ ਹੈ।
* ਇੱਕ ਕਾਸਮੈਟਿਕ ਪ੍ਰੋਡਕਟ ਜਿਸ ਤੋਂ ਬਿਨਾਂ ਤੁਸੀਂ ਨਹੀਂ ਰਹਿ ਸਕਦੇ? ਮੇਕਅਪ ਨਾਲ ਤੁਹਾਡਾ ਪਹਿਲਾ ਸਾਹਮਣਾ ਕਦੋਂ ਹੋਇਆ?
-ਮੈਨੂੰ ਲੱਗਦਾ ਹੈ ਕਿ ਬਚਪਨ 'ਚ ਜਦੋਂ ਮੈਂ ਆਪਣੀ ਦਾਦੀ ਅਤੇ ਮਾਂ ਦੇ ਡ੍ਰੈਸਿੰਗ ਟੇਬਲ 'ਤੇ ‘ਹਮਲਾ’ ਕਰਦੇ ਹੋਏ ਪਤਾ ਲਾਇਆ ਸੀ ਕਿ ਲਿਪਸਟਿਕ ਕੀ ਹੈ? ਲੱਗਦਾ ਹੈ ਕਿ ਇੱਕ ਚੰਗੀ ਲਿਪਸਟਿਕ ਲਈ ਮੇਰਾ ਪਿਆਰ ਸ਼ੁਰੂ ਤੋਂ ਹੀ ਰਿਹਾ ਹੈ। ਕੱਜਲ ਇਹ ਮੇਰੇ ਮੇਕਅਪ ਨਾਲ ਕਮਾਲ ਕਰਦਾ ਹੈ ਅਤੇ ਜ਼ਾਹਿਰ ਹੈ ਕਿ ਮੈਨੂੰ ਚੰਗੀ ਲਿਪਸਟਿਕ ਵੀ ਪਸੰਦ ਹੈ।
* ਤੁਹਾਡੀ ਫਿਲਮ ‘ਲਾਲ ਸਿੰਘ ਚੱਢਾ’ ਦੀ ਕੀ ਰਿਪੋਰਟ ਹੈ?
-ਮੈਨੂੰ ਖੁਸ਼ੀ ਹੈ ਕਿ ਲੋਕਾਂ ਨੇ ਇਸ ਦੀ ਫਸਟ ਲੁਕ ਨੂੰ ਪਸੰਦ ਕੀਤਾ ਹੈ। ਆਮਿਰ ਨਾਲ ਕੰਮ ਕਰਨਾ ਹਮੇਸ਼ਾ ਅਨੋਖਾ ਹੁੰਦਾ ਹੈ। ਮੈਨੂੰ ਯਕੀਨ ਹੈ ਕਿ ਅਸੀਂ ਲੋਕਾਂ ਦੀਆਂ ਉਮੀਦਾਂ 'ਤੇ ਖਰੇ ਉਤਰਾਂਗੇ।
* ਤੁਸੀਂ ਰੇਡੀਓ ਸ਼ੋਅ ਵੀ ਕਰ ਰਹੇ ਹੋ, ਜਿਸ ਦੇ ਸੀਜ਼ਨ-2 ਵਿੱਚ ਤੁਸੀਂ ਸ਼ਰਮੀਲਾ ਟੈਗੋਰ ਦਾ ਇੰਟਰਵਿਊ ਕੀਤਾ। ਕਿਹੋ ਜਿਹਾ ਰਿਹਾ ਆਪਣੀ ਸੱਸ ਦਾ ਇੰਟਰਵਿਊ ਕਰਨ ਦਾ ਤਜਰਬਾ?
- ਰੇਡੀਓ ਸ਼ੋਅ 'ਚ ਮੇਰੀ ਜ਼ਿੰਮੇਵਾਰੀ ਐਂਕਰ ਜਾਂ ਪੱਤਰਕਾਰ ਦੀ ਹੈ। ਇਹ ਮੇਰੇ ਲਈ ਬਹੁਤ ਹੀ ਚੈਲੇਂਜਿੰਗ ਹੈ। ਸੀਜ਼ਨ-1 ਵਿੱਚ ਕਈ ਫਿਲਮੀ ਹਸਤੀਆਂ ਨੇ ਇਸ ਵਿੱਚ ਸ਼ਿਰਕਤ ਕੀਤੀ। ਸ਼ਰਮੀਲਾ ਜੀ ਆਏ, ਉਹ ਹਮੇਸ਼ਾ ਤੋਂ ਹੀ ਗ੍ਰੇਸਫੁੱਲ ਰਹੇ ਹਨ। ਇਸ ਸ਼ੋਅ ਵਿੱਚ ਉਨ੍ਹਾਂ ਨੂੰ ਸੱਦਾ ਦਿੱਤਾ ਜਾਂਦਾ ਹੈ ਜਿਨ੍ਹਾਂ ਦਾ ਜੀਵਨ ਬਹੁਤ ਪ੍ਰੇਰਨਾ ਦਾਇਕ ਹੋਵੇ। ਮੈਨੂੰ ਕੋਈ ਵੀ ਸਟ੍ਰੈੱਸ ਨਹੀਂ ਸੀ, ਉਨ੍ਹਾਂ ਨਾਲ ਗੱਲਬਾਤ ਕਰਨ 'ਚ।