‘ਲਿਪਸਟਿਕ ਅੰਡਰ ਮਾਇ ਬੁਰਕਾ’, ‘ਯੋਅਰ ਟਰੂਲੀ’ ਵਰਗੀਆਂ ਫਿਲਮਾਂ ਵਿੱਚ ਮਜ਼ਬੂਤ ਕਿਰਦਾਰ ਕਰ ਚੁੱਕੀ ਅਭਿਨੇਤਰੀ ਆਹਨਾ ਕੁਮਾਰ ਜਲਦੀ ਹੀ ‘ਮਰਜੀ’ ਨਾਂਅ ਦੇ ਵੈਬ ਸ਼ੋਅ ਵਿੱਚ ਨਜ਼ਰ ਆਏਗੀ। ਇਸ ਸ਼ੋਅ ਵਿੱਚ ਉਹ ਇੱਕ ਬਲਾਤਕਾਰ ਪੀੜਤਾ ਦਾ ਕਿਰਦਾਰ ਨਿਭਾਅ ਰਹੀ ਹੈ। ਆਹਨਾ ਕੁਮਾਰ ਦਾ ਕਹਿਣਾ ਹੈ ਕਿ ਬਹੁਤ ਗੁੱਸਾ ਆਉਂਦਾ ਹੈ ਜਦ ਬਲਾਤਕਾਰ ਦੀ ਘਟਨਾ ਪਤਾ ਲੱਗਦੀ ਹੈ ਅਤੇ ਦੋਸ਼ੀਆਂ ਨੂੰ ਫਾਂਸੀ 'ਤੇ ਨਹੀਂ ਲਟਕਾਇਆ ਜਾਂਦਾ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਸ਼ੋਅ ਅਤੇ ਫਿਲਮਾਂ ਦੇ ਰਾਹੀਂ ਔਰਤਾਂ ਨਾਲ ਜੁੜੇ ਮੁੱਦਿਆਂ ਉੱਤੇ ਘੱਟ ਤੋਂ ਘੱਟ ਗੱਲ ਸ਼ੁਰੂ ਤਾਂ ਹੋਈ ਹੈ। ਮੀ ਟੂ ਮੁਹਿੰਮ ਜਾਂ ਇਨਾਂ ਸ਼ੋਅ ਦੇ ਨਾਲ ਘੱਟ ਤੋਂ ਘੱਟ ਉਨ੍ਹਾਂ ਮੁੱਦਿਆਂ 'ਤੇ ਚਰਚਾ ਹੋਣ ਲੱਗੀ ਹੈ, ਜਿਨ੍ਹਾਂ ਵਿੱਚ ਮਹਿਲਾ ਦੀ ਮਰਜ਼ੀ ਜਾਨਣ ਦੀ ਲੋੜ ਨਹੀਂ ਸਮਝੀ ਜਾਂਦੀ ਸੀ। ਆਹਨਾ ਦਾ ਕਹਿਣਾ ਹੈ ਕਿ ਜਦ ਇਸ ਪੀੜ੍ਹੀ ਦੀਆਂ ਔਰਤਾਂ ਆਵਾਜ਼ ਨਹੀਂ ਉਠਾਉਣਗੀਆਂ ਤਾਂ ਉਨ੍ਹਾਂ ਦੇ ਲਈ ਕੌਣ ਗੱਲ ਕਰੇਗਾ। ਸਾਡੀ ਪੀੜ੍ਹੀ ਕੋਲ ਬਹੁਤ ਹਿੰਮਤ ਹੈ, ਅਸੀਂ ਉਹ ਸਵਾਲ ਪੁੱਛ ਰਹੇ ਹਾਂ, ਜੋ ਸਾਡੇ ਤੋਂ ਪਹਿਲਾਂ ਵਾਲੀ ਪੀੜ੍ਹੀ ਨੇ ਨਹੀਂ ਪੁੱਛੇ। ਅਸੀਂ ਅੱਜ ਜੋ ਵੀ ਆਪਣੇ ਲਈ ਬੇਬਾਕ ਕਦਮ ਚੁੱਕਾਂਗੇ, ਉਸ ਦਾ ਫਾਇਦਾ ਆਉਣ ਵਾਲੀ ਪੀੜ੍ਹੀ ਦੀਆਂ ਔਰਤਾਂ ਨੂੰ ਮਿਲੇਗਾ।
ਆਹਨਾ ਦਾ ਮੰਨਣਾ ਹੈ ਕਿ ਭਾਵੇਂ ਕੋਈ ਆਮ ਔਰਤ ਹੋਵੇ ਜਾਂ ਅਭਿਨੇਤਰੀ, ਉਸ ਦੇ ਕੋਲ ਸਭ ਤੋਂ ਵੱਡਾ ਹਥਿਆਰ ਹੁੰਦਾ ਹੈ ਨਾ ਬੋਲਣ ਦਾ। ਮਹਿਲਾ ਨੂੰ ਬੋਲਣਾ ਸਿੱਖ ਲੈਣਾ ਚਾਹੀਦਾ ਹੈ। ਜੇ ਤੁਸੀਂ ਪ੍ਰਤਿਭਾਸ਼ਾਲੀ ਹੋ ਤਾਂ ਨਾ ਬੋਲਣ ਦੇ ਬਾਅਦ ਵੀ ਕੰਮ ਮਿਲੇਗਾ। ਛੋਟਾ ਹੀ ਸਹੀ, ਪਰ ਕੰਮ ਮਿਲੇਗਾ। ਹਿੰਮਤ ਨਾ ਹਾਰੋ, ਕਿਸੇ ਦੇ ਸਾਹਮਣੇ ਨਾ ਝੁਕੋ। ਇੰਡਸਟਰੀ ਵਿੱਚ ਬਰਾਬਰੀ ਬਾਰੇ ਉਨ੍ਹਾਂ ਦਾ ਮੰਨਣਾ ਹੈ ਕਿੇ ਇਥੇ ਹੌਲੀ ਹੌਲੀ ਬਦਲਾਅ ਆ ਰਿਹਾ ਹੈ। ਘੱਟ ਤੋਂ ਘੱਟ ਆਪਣੇ ਕਿਰਦਾਰ ਚੁਣਨ ਦੀ ਆਜ਼ਾਦੀ ਅੱਜਕੱਲ੍ਹ ਅਭਿਨੇਤਰੀਆਂ ਦੇ ਕੋਲ ਆ ਗਈ ੈਹ।