*ਫਿਲਮ ਦੇ ਪ੍ਰੋਮੋਸ਼ਨ ਲਈ ਸਤਿੰਦਰ ਸਰਤਾਜ ਪੁੱਜੇ ਬਰੈਂਪਟਨ
ਬਰੈਂਪਟਨ, 9 ਮਾਰਚ (ਪੋਸਟ ਬਿਊਰੋ)- ਪ੍ਰਸਿੱਧ ਗਾਇਕ ਸਤਿੰਦਰ ਸਰਤਾਜ ਦੀ ਅਗਲੀ ਫਿਲਮ ‘ਇੱਕੋ ਮਿੱਕੇ` ਆਉਣ ਵਾਲੀ 13 ਤਰੀਕ ਨੂੰ ਰਿਲੀਜ਼ ਹੋਣ ਜਾ ਰਹੀ ਹੈ। ਜਿਸ ਦਾ ਪ੍ਰੋਮੋਸ਼ਨ ਕਰਨ ਲਈ ਸਤਿੰਦਰ ਸਰਤਾਜ ਕੈਨੇਡਾ ਤੇ ਹੋਰਨਾਂ ਮੁਲਕਾਂ ਦੇ ਦੌਰੇ ’ਤੇ ਹਨ। ਸਤਿੰਦਰ ਸਰਤਾਜ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਇਹ ਮੈਂ ਫਿਲਮ ਹੀ ਪ੍ਰੋਮੋਟ ਕਰਨ ਤੁਹਾਡੇ ਨਾਲ ਮੁਖਾਤਿਵ ਨਹੀਂ ਹੋ ਰਿਹਾ, ਮੈਂ ਤਾਂ ਇਕ ਵਧੀਆ ਦੁਨੀਆ ਸਿਰਜਣ ਲਈ ਨਿੱਕਲਿਆ ਹੋਇਆਂ ਹਾਂ। ਉਨ੍ਹਾਂ ਕਿਹਾ ਕਿ ਫਿਲਮ ਇਕ ਵੱਖਰੇ ਵਿਸ਼ੇ ਨੂੰ ਲੈ ਕੇ ਹੈ। ਇਸ ਫਿਲਮ ਦੀ ਕਾਸਟ ਤੇ ਇਸ ਦੇ ਨਾਲ ਨਾਲ ਇਸ ਦੇ ਡਾਇਰੈਕਟਰ ਤੇ ਪ੍ਰੋਡਿਊਸਰ ਦੀ ਪੂਰੀ ਮਿਹਨਤ ਤੋਂ ਬਾਅਦ ਅਸੀਂ ਇਕ ਵਧੀਆ ਫਿਲਮ ਪੰਜਾਬੀ ਫਿਲਮ ਇੰਡਸਟਰੀ ਨੂੰ ਦੇ ਸਕੇ ਹਾਂ। ਉਨ੍ਹਾਂ ਕਿਹਾ ਕਿ ਇਸ ’ਚ 7 ਗੀਤ ਹਨ। ਇਸ ਫਿਲਮ ਦੀ ਜ਼ਿਆਦਾਤਰ ਸ਼ੂਟਿੰਗ ਚੰਡੀਗੜ੍ਹ ਲਾਅ ਡਿਪਾਰਟਮੈਂਟ ’ਚ ਕੀਤੀ ਗਈ ਹੈ ਤੇ ਕੁੱਝ ਕੁ ਹੋਰ ਥਾਵਾਂ ’ਤੇ ਵੀ ਇਸ ਫਿਲਮ ਦੇ ਸੀਨ ਫਿਲਮਾਏ ਗਏ ਹਨ। ਕੱਲ੍ਹ ਉਨ੍ਹਾਂ ਵਲੋਂ ਇਸ ਫਿਲਮ ਦਾ ਪ੍ਰੀਮੀਅਰ ਸ਼ੋਅ ਵੀ ਰੱਖਿਆ ਗਿਆ ਤੇ ਉਨ੍ਹਾਂ ਕਿਹਾ ਕਿ ਮੈਂ ਤੁਹਾਡੇ ਜ਼ਿਆਦਾਤਰ ਸਵਾਲਾਂ ਦੇ ਜਵਾਬ ਜਦੋਂ ਤੁਸੀਂ ਇਸ ਫਿਲਮ ਨੂੰ ਦੇਖ ਲਵੋਗੇ ਉਸ ਤੋਂ ਬਾਅਦ ਦੇਵਾਂਗਾ। ਉਨ੍ਹਾਂ ਕਿਹਾ ਅਸੀਂ ਇਹ ਫਿਲਮ ਸਿਰਫ਼ ਇਕ ਫਿਲਮ ਹੀ ਨਹੀਂ ਸਗੋਂ ਵਧੀਆ ਕੰਮ ਦਾ ਨਮੂਨਾ ਪੇਸ਼ ਕਰਨ ਲਈ ਬਣਾਈ ਹੈ।ਉਨ੍ਹਾਂ ਉਮੀਦ ਕੀਤੀ ਕਿ ਦਰਸ਼ਕਾਂ ਵਲੋਂ ਇਸ ਫਿਲਮ ਨੂੰ ਭਰਪੂਰ ਹੁੰਗਾਰਾ ਦਿੱਤਾ ਜਾਵੇਗਾ।