ਸਿਧਾਰਥ ਮਲਹੋਤਰਾ ਨੇ ਇੱਕ ਨਵੀਂ ਫਿਲਮ ਸਾਈਨ ਕੀਤੀ ਹੈ, ਜੋ ਸੱਚੀਆਂ ਘਟਨਾਵਾਂ ਤੋਂ ਪ੍ਰੇਰਿਤ ਹੋਵੇਗੀ। ਇਸ ਫਿਲਮ ਵਿੱਚ ਸਿਧਾਰਥ ਦਾ ਡਬਲ ਰੋਲ ਹੋਵੇਗਾ। ਇਸ ਨੂੰ ਟੀ-ਸੀਰੀਜ਼ ਅਤੇ ਮੁਰਾਦ ਖੇਤਾਨੀ ਮਿਲ ਕੇ ਪ੍ਰੋਡਿਊਸ ਕਰ ਰਹੇ ਹਨ ਅਤੇ ਇਸ ਦਾ ਨਿਰਦੇਸ਼ਨ ਵਰਦਾਨ ਕੇਤਕਰ ਕਰਨਗੇ।
ਹਾਲੇ ਫਿਲਮ ਦਾ ਟਾਈਟਲ ਫਾਈਨਲ ਨਹੀਂ ਹੋਇਆ। ਇਹ ਫਿਲਮ ਸਾਲ 2019 ਵਿੱਚ ਰਿਲੀਜ਼ ਹੋਈ ਸੁਪਰਹਿੱਟ ਤਮਿਲ ਫਿਲਮ ‘ਥਾਡਮ’ ਦਾ ਰੀਮੇਕ ਹੋਵੇਗੀ। ਸਿਧਾਰਥ ਵੱਲੋਂ ਟਵਿੱਟਰ 'ਤੇ ਸ਼ੇਅਰ ਕੀਤੀ ਇੱਕ ਫੋਟੋ ਵਿੱਚ ਉਸ ਦੇ ਨਾਲ ਪ੍ਰੋਡਿਊਸਰ ਭੂਸ਼ਣ ਕੁਮਾਰ ਅਤੇ ਮੁਰਾਦ ਖੇਤਾਨੀ ਨਜ਼ਰ ਆ ਰਹੇ ਹਨ। 20 ਨਵੰਬਰ ਨੂੰ ਇਹ ਫਿਲਮ ਰਿਲੀਜ਼ ਹੋਵੇਗੀ। ਫਿਲਮ ਦੀ ਸ਼ੂਟਿੰਗ ਦਿੱਲੀ ਵਿੱਚ ਹੋਵੇਗੀ। ਇਸ ਤੋਂ ਪਹਿਲਾਂ ਸਿਧਾਰਥ ਫਿਲਮ ‘ਦ ਜੈਂਟਲਮੈਨ’ ਵਿੱਚ ਵੀ ਦੋਹਰੀ ਭੂਮਿਕਾ ਨਿਭਾ ਚੁੱਕੇ ਹਨ। ‘ਥਾਡਮ’ ਇੱਕ ਕਤਲ ਕੇਸ 'ਤੇ ਆਧਾਰਤ ਸੀ, ਜਿਸ ਵਿੱਚ ਭਰਪੂਰ ਐਕਸ਼ਨ ਵੀ ਸੀ। ਇਸ ਫਿਲਮ ਦੇ ਹਿੰਦੀ ਰੀਮੇਕ ਦੇ ਇਲਾਵਾ ਸਿਧਾਰਥ ‘ਸ਼ੇਰਸ਼ਾਹ’ ਵਿੱਚ ਨਜ਼ਰ ਆਉਣਗੇ। ਫਿਲਮ ਵਿੱਚ ਉਹ ਪਰਮਵੀਰ ਚੱਕਰ ਵਿਜੇਤਾ ਕੈਪਟਨ ਵਿਕਰਮ ਬੱਤਰਾ ਦੀ ਭੂਮਿਕਾ ਵਿੱਚ ਨਜ਼ਰ ਆਉਣਗੇ।