ਟੋਰਾਂਟੋ, 4 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਪਬਲਿਕ ਹਾਈ ਸਕੂਲ ਅਧਿਆਪਕਾਂ ਤੇ ਸਰਕਾਰ ਦਰਮਿਆਨ ਸ਼ੁਰੂ ਹੋਈ ਗੱਲਬਾਤ ਇੱਕ ਵਾਰੀ ਫਿਰ ਟੱੁਟ ਗਈ। ਪਰ ਯੂਨੀਅਨ ਦੇ ਹੈੱਡ ਨੇ ਆਖਿਆ ਕਿ ਸਿੱਖਿਆ ਮੰਤਰੀ ਵੱਲੋਂ ਕਲਾਸਾਂ ਦੇ ਆਕਾਰ ਤੇ ਈ-ਲਰਨਿੰਗ ਬਾਰੇ ਆਪਣੇ ਫੈਸਲੇ ਨੂੰ ਵਾਪਿਸ ਲੈਣ ਦੇ ਦਿਵਾਏ ਗਏ ਭਰੋਸੇ ਨਾਲ ਦੋਵੇਂ ਧਿਰਾਂ ਨੇੜੇ ਆ ਗਈਆਂ ਹਨ।
ਓਨਟਾਰੀਓ ਸੈਕੰਡਰੀ ਸਕੂਲ ਟੀਚਰਜ਼ ਫੈਡਰੇਸ਼ਨ ਤੇ ਪ੍ਰੋਵਿੰਸ ਦਰਮਿਆਨ ਗੈਰਰਸਮੀ ਗੱਲਬਾਤ ਐਤਵਾਰ ਨੂੰ ਸੁ਼ਰੂ ਹੋਈ ਸੀ। ਇਸ ਪਾਸੇ ਦੋ ਮਹੀਨਿਆਂ ਤੋਂ ਆਈ ਖੜੋਤ ਤੋਂ ਬਾਅਦ ਆਸ ਦੀ ਕਿਰਨ ਵੀ ਜਾਗੀ ਸੀ। ਜਿ਼ਕਰਯੋਗ ਹੈ ਕਿ ਦੋਵਾਂ ਧਿਰਾਂ ਦਰਮਿਆਨ 16 ਦਸੰਬਰ ਤੋਂ ਬਾਅਦ ਰਸਮੀ ਤੌਰ ਉੱਤੇ ਕੋਈ ਗੱਲਬਾਤ ਨਹੀਂ ਹੋਈ।
ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਵੱਲੋਂ ਓਐਸਐਸਟੀਐਫ ਦੇ ਦੋ ਮੱੁਖ ਮੁੱਦਿਆਂ ਨੂੰ ਲੱਗਭਗ ਪੂਰਾ ਮੰਨ ਲੈਣ ਦਾ ਐਲਾਨ ਕਰਨ ਤੋਂ ਬਾਅਦ ਮੀਟਿੰਗਾਂ ਮੰਗਲਵਾਰ ਦੇਰ ਰਾਤ ਖਤਮ ਹੋ ਗਈਆਂ। ਜਿ਼ਕਰਯੋਗ ਹੈ ਕਿ ਮੰਗਲਵਾਰ ਨੂੰ ਸਿੱਖਿਆ ਮੰਤਰੀ ਲਿਚੇ ਨੇ ਦੋਵਾਂ ਫਰੰਟਜ਼ ਉੱਤੇ ਆਪਣਾ ਰੁਖ ਨਰਮ ਕਰਦਿਆਂ ਇਨ੍ਹਾਂ ਨੂੰ ਵਾਪਿਸ ਲੈਣ ਦਾ ਸੰਕੇਤ ਦਿੱਤਾ। ਫੋਰਡ ਸਕਰਾਰ ਵਲੋਂ ਓਨਟਾਰੀਓ ਹਾਈ ਸਕੂਲ ਕਲਾਸਾਂ ਦੇ ਆਕਾਰ ਵਿੱਚ ਸਿਰਫ ਇੱਕ ਵਿਦਿਆਰਥੀ ਭਾਵ ਕਲਾਸ ਵਿੱਚ ਵਿਦਿਆਰਥੀਆਂ ਦੀ ਗਿਣਤੀ 23 ਕਰਨ ਦੀ ਪੇਸ਼ਕਸ਼ ਕੀਤੀ ਗਈ ਜੋ ਕਿ ਪਹਿਲਾਂ ਇੱਕ ਕਲਾਸ ਵਿੱਚ 28 ਵਿਦਿਆਰਥੀਆਂ ਦੇ ਮੁਕਾਬਲੇ ਬਹੁਤ ਘੱਟ ਹੈ। ਲਿਚੇ ਨੇ ਇਹ ਸੰਕੇਤ ਦਿੱਤਾ ਸੀ ਕਿ ਉਹ ਕਈ ਦਿਨਾਂ ਤੋਂ ਚੱਲ ਰਹੀ ਇਸ ਖੜੋਤ ਨੂੰ ਖਤਮ ਕਰਨਾ ਚਾਹੁੰਦੇ ਹਨ ਤੇ ਹੁਣ ਫੈਸਲਾ ਅਧਿਆਪਕਾਂ ਨੇ ਲੈਣਾ ਹੈ। ਅਸੀਂ ਵਿਦਿਆਰਥੀਆਂ ਦੇ ਹਿਤਾਂ ਨੂੰ ਵੇਖਦਿਆਂ ਹੋਇਆ ਕਾਫੀ ਅਹਿਮ ਕਦਮ ਚੁੱਕ ਰਹੇ ਹਾਂ।
ਇੱਕ ਵਾਰੀ ਫਿਰ ਗੱਲਬਾਤ ਕਿਸੇ ਤਣ ਪੱਤਣ ਨਾ ਲੱਗਣ ਤੋਂ ਬਾਅਦ ਲਿਚੇ ਨੇ ਆਖਿਆ ਕਿ ਉਨ੍ਹਾਂ ਵੱਲੋਂ ਜਿਹੜੇ ਤਾਜ਼ਾ ਪ੍ਰਸਤਾਵ ਦਿੱਤੇ ਗਏ ਸਨ ਉਹ ਇਸੇ ਲਈ ਸਨ ਤਾਂ ਕਿ ਕਿਸੇ ਡੀਲ ਉੱਤੇ ਪਹੁੰਚਿਆ ਜਾ ਸਕੇ। ਅਜਿਹੀ ਡੀਲ ਜਿਹੜੀ ਵਿਦਿਆਰਥੀਆਂ, ਉਨ੍ਹਾਂ ਦੇ ਮਾਪਿਆਂ ਤੇ ਅਧਿਆਪਕਾਂ ਦੇ ਨਾਲ ਨਾਲ ਐਜੂਕੇਸ਼ਨ ਵਰਕਰਜ਼ ਲਈ ਵੀ ਫਾਇਦੇਮੰਦ ਹੋਵੇ। ਪਰ ਇੱਕ ਵਾਰੀ ਮੁੜ ਹੋਈ ਗੱਲਬਾਤ ਤੋਂ ਇਹੋ ਲੱਗਦਾ ਹੈ ਕਿ ਦੂਜੀ ਧਿਰ ਕਿਸੇ ਡੀਲ ਉੱਤੇ ਪਹੁੰਚਣਾ ਹੀ ਨਹੀਂ ਚਾਹੁੰਦੀ।
ਇਸ ਮਗਰੋਂ ਯੂਨੀਅਨ ਦੇ ਪ੍ਰੈਜ਼ੀਡੈਂਟ ਹਾਰਵੀ ਬਿਸ਼ੌਫ ਨੇ ਆਖਿਆ ਕਿ ਇਹ ਮਾੜੀ ਗੱਲ ਹੈ ਕਿ ਮੰਤਰੀ ਨੇ ਸਿੱਧਾ ਓਐਸਐਸਟੀਐਫ ਦੇ ਸਾਹਮਣੇ ਗੱਲ ਕਰਨ ਦੀ ਥਾਂ ਆਪਣਾ ਐਲਾਨ ਨਿਊਜ਼ ਕਾਨਫਰੰਸ ਵਿੱਚ ਕੀਤਾ। ਉਨ੍ਹਾਂ ਆਖਿਆ ਕਿ ਅਸੀਂ ਡੀਲ ਦੇ ਕਾਫੀ ਨੇੜੇ ਸੀ ਪਰ ਉਨ੍ਹਾਂ ਵੱਲੋਂ ਕਈ ਪੱਖ ਸਪਸ਼ਟ ਨਹੀਂ ਕੀਤੇ ਗਏ ਜਿਸ ਕਾਰਨ ਇਹ ਡੀਲ ਨਹੀਂ ਹੋ ਸਕੀ। ਪਰ ਲਿਚੇ ਦੇ ਐਲਾਨ ਤੋਂ ਬਾਅਦ ਓਨਟਾਰੀਓ ਇੰਗਲਿਸ਼ ਕੈਥੋਲਿਕ ਟੀਚਰਜ਼ ਐਸੋਸਿਏਸ਼ਨ ਨੂੰ ਆਸ ਜ਼ਰੂਰ ਬੱਝੀ ਹੈ।