ਬਰੈਂਪਟਨ, 3 ਮਾਰਚ (ਪੋਸਟ ਬਿਊਰੋ) : ਸਿਟੀ ਆਫ ਬਰੈਂਪਟਨ ਵੱਲੋਂ ਬਰੈਂਪਟਨ ਤੋਂ ਟੋਰਾਂਟੋ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ਤੱਕ ਨਵੇਂ ਤੇ ਸਿੱਧੇ ਬੱਸ ਟਰਾਂਜਿ਼ਟ ਕੁਨੈਕਸ਼ਨ ਦਾ ਐਲਾਨ ਕੀਤਾ ਗਿਆ ਹੈ। 505 ਜੂ਼ਮ ਬੋਵੇਅਰਡ ਰੂਟ ਨੂੰ ਏਅਰਪੋਰਟ ਤੱਕ ਵਧਾਇਆ ਜਾਵੇਗਾ ਤੇ ਇਸ ਦੇ ਸਾਲ 2020 ਦੇ ਅੰਤ ਤੱਕ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ।
ਬਰੈਂਪਟਨ ਸਿਟੀ ਕਾਉਂਸਲ ਵੱਲੋਂ ਸਿਟੀ ਦੇ 2020 ਬਜਟ ਦੇ ਹਿੱਸੇ ਵਜੋਂ ਸਰਬਸੰਮਤੀ ਨਾਲ ਇਸ ਨੂੰ ਮਨਜ਼ੂਰੀ ਦਿੱਤੀ ਗਈ। ਇਸ ਪਸਾਰ ਨਾਲ ਖੇਤਰੀ ਕੁਨੈਕਟੀਵਿਟੀ ਵਿੱਚ ਸੁਧਾਰ ਆਵੇਗਾ। ਇਸ ਦੇ ਨਾਲ ਹੀ ਟੋਰਾਂਟੋ ਪੀਅਰਸਨ ਉੱਤੇ ਕੰਮ ਕਰਨ ਵਾਲੇ ਜਾਂ ਉੱਥੋਂ ਟਰੈਵਲ ਕਰਨ ਵਾਲਿਆਂ ਲਈ ਹੋਰ ਸਹੂਲਤ ਹੋ ਜਾਵੇਗੀ। ਇਸ ਦੇ ਨਾਲ ਹੀ ਬਰੈਂਪਟਨ ਦਾ ਟਰਾਂਜਿ਼ਟ ਸਿਸਟਮ ਹੋਰ ਮਜ਼ਬੂਤ ਹੋਵੇਗਾ।
ਪੀਅਰਸਨ ਏਅਰਪੋਰਟ ਕੰਮ ਦੇ ਲਿਹਾਜ ਨਾਲ ਕਾਫੀ ਵੱਡਾ ਕਾਂਪਲੈਕਸ ਹੈ, ਇੱਥੇ 400 ਤੋਂ ਵੱਧ ਕੰਪਨੀਆਂ ਦੇ 50,000 ਦੇ ਨੇੜੇ ਤੇੜੇ ਕਰਮਚਾਰੀ ਕੰਮ ਕਰਦੇ ਹਨ, ਇਨ੍ਹਾਂ ਵਿੱਚੋਂ 10,000 ਬਰੈਂਪਟਨ ਵਿੱਚ ਰਹਿੰਦੇ ਹਨ। ਏਅਰਪੋਰਟ ਇੰਪਲੌਏਮੈਂਟ ਜ਼ੋਨ ਤਹਿਤ ਬਹੁਤੇ ਮੁਲਾਜ਼ਮ ਪੀਅਰਸਨ ਵਿੱਚ ਕੰਮ ਕਰਦੇ ਹਨ ਜਿਨ੍ਹਾਂ ਵਿੱਚ ਬਰੈਂਪਟਨ, ਮਿਸੀਸਾਗਾ ਤੇ ਇਟੋਬੀਕੋ ਦੇ ਵਰਕਰਜ਼ ਵੀ ਸ਼ਾਮਲ ਹਨ। ਇਹ ਕੈਨੇਡਾ ਦਾ ਦੂਜਾ ਸੱਭ ਤੋਂ ਵੱਡਾ ਇੰਪਲੌਏਮੈਂਟ ਏਰੀਆ ਹੈ ਜਿੱਥੇ 300,000 ਤੋਂ ਵੱਧ ਨੌਕਰੀਆਂ ਹਨ।
ਗ੍ਰੇਟਰ ਟੋਰਾਂਟੋ ਏਅਰਪੋਰਟਸ ਅਥਾਰਟੀ (ਜੀਟੀਏਏ) ਵੱਲੋਂ ਇਸ ਨਵੇਂ ਰੂਟ ਦਾ ਸਵਾਗਤ ਕੀਤਾ ਗਿਆ ਹੈ। ਇੱਥੇ ਦੱਸਣਾ ਬਣਦਾ ਹੈ ਕਿ ਰਿਸਰਚ ਵਿੱਚ ਇਹ ਸਿੱਧ ਹੋ ਚੱੁਕਿਆ ਹੈ ਕਿ ਬਰੈਂਪਟਨ ਤੇ ਏਅਰਪੋਰਟ ਦਰਮਿਆਨ ਸਿੱਧਾ ਬੱਸ ਕੁਨੈਕਸ਼ਨ ਹੋਣ ਨਾਲ ਕਾਫੀ ਫਾਇਦਾ ਹੋ ਸਕਦਾ ਹੈ। ਟੋਰਾਂਟੋ ਪੀਅਰਸਨ, ਬਰੈਂਪਟਨ ਟਰਾਂਜਿ਼ਟ ਯੂਜ਼ਰਜ਼ ਹੋਰਨਾਂ ਖੇਤਰੀ ਟਰਾਂਸਪੋਰਟੇਸ਼ਨ ਨੈਟਵਰਕਜ਼ ਨਾਲ ਵੀ ਜੁੜ ਸਕਦੇ ਹਨ ਜਿਨ੍ਹਾਂ ਵਿੱਚ ਯੂਪੀ ਐਕਸਪ੍ਰੈਸ, ਛੇ ਟੀਟੀਸੀ ਰੂਟ, ਚਾਰ ਮਾਈਵੇਅ ਰੂਟਜ਼, ਦੋ ਗੋ ਟਰਾਂਜਿ਼ਟ ਰੂਟਜ਼ ਤੇ ਗ੍ਰੇਹਾਊਂਡ ਵਰਗੀਆਂ ਹੋਰ ਖੇਤਰੀ ਸੇਵਾਵਾਂ ਨਾਲ ਵੀ ਜੁੜ ਸਕਣਗੇ।