*ਓਨਟਾਰੀਓ ਵਿੱਚ ਕੋਰੋਨਾਵਾਇਰਸ ਦੇ ਮਾਮਲਿਆਂ ਦੀ ਗਿਣਤੀ 15 ਤੱਕ ਅੱਪੜੀ
ਟੋਰਾਂਟੋ, 1 ਮਾਰਚ (ਪੋਸਟ ਬਿਊਰੋ) : ਐਤਵਾਰ ਨੂੰ ਓਨਟਾਰੀਓ ਹੈਲਥ ਅਧਿਕਾਰੀਆਂ ਵੱਲੋਂ ਟੋਰਾਂਟੋ ਤੇ ਯੌਰਕ ਰੀਜਨ ਵਿੱਚ ਕੋਵਿਡ-19 ਦੇ ਚਾਰ ਹੋਰ ਪਾਜ਼ੀਟਿਵ ਕੇਸਾਂ ਦੀ ਪੁਸ਼ਟੀ ਕੀਤੀ ਗਈ। ਇਸ ਨਾਲ ਪ੍ਰੋਵਿੰਸ ਵਿੱਚ ਅਜਿਹੇ ਮਾਮਲਿਆਂ ਦੀ ਕੁੱਲ ਗਿਣਤੀ 15 ਤੱਕ ਅੱਪੜ ਗਈ ਹੈ।
ਅਧਿਕਾਰੀਆਂ ਨੇ ਦੱਸਿਆ ਕਿ ਨਵੇਂ ਮਾਮਲਿਆਂ ਵਿੱਚੋਂ ਤਿੰਨ ਲੋਕ ਯੌਰਕ ਰੀਜਨ ਤੋਂ ਹਨ ਤੇ ਇੱਕ ਵਿਅਕਤੀ ਟੋਰਾਂਟੋ ਤੋਂ ਹੈ। ਚਾਰ ਨਵੇਂ ਕੇਸ ਉਸ ਸਮੇਂ ਸਾਹਮਣੇ ਆਏ ਜਦੋਂ ਪ੍ਰੋਵਿੰਸ਼ੀਅਲ ਹੈਲਥ ਅਧਿਕਾਰੀਆਂ ਨੇ ਇਹ ਐਲਾਨ ਕੀਤਾ ਕਿ ਸ਼ਨਿੱਚਰਵਾਰ ਨੂੰ ਗ੍ਰੇਟਰ ਟੋਰਾਂਟੋ ਏਰੀਆ ਦੇ ਤਿੰਨ ਵਿਅਕਤੀਆਂ ਨੂੰ ਵਾਇਰਸ ਹੈ।
ਯੌਰਕ ਰੀਜਨ ਦੇ ਮੈਡੀਕਲ ਆਫੀਸਰ ਆਫ ਹੈਲਥ ਡਾ. ਕਰੀਮ ਕੁਰਜ਼ੀ ਨੇ ਦੱਸਿਆ ਕਿ ਉਨ੍ਹਾਂ ਦੇ ਰੀਜਨ ਦੇ ਤਿੰਨ ਨਵੇਂ ਮਾਮਲਿਆਂ ਨਾਲ ਜੁੜੇ ਵਿਅਕਤੀਆਂ ਦਾ ਉਨ੍ਹਾਂ ਦੇਸ਼ਾਂ ਵਿੱਚ ਸਫਰ ਦਾ ਇਤਿਹਾਸ ਹੈ ਜਿੱਥੇ ਇਹ ਵਾਇਰਸ ਪਹਿਲਾਂ ਹੀ ਫੈਲ ਚੱੁਕਿਆ ਹੈ। ਪਹਿਲੇ ਨਵੇਂ ਕੇਸ ਵਿੱਚ ਯੌਰਕ ਰੀਜਨ ਦੀ ਕੋਵਿਡ-19 ਤੋਂ ਪ੍ਰਭਾਵਿਤ ਹੋਈ ਪਹਿਲੀ ਮਹਿਲਾ ਦਾ ਹੀ ਪਤੀ ਸ਼ਾਮਲ ਹੈ। ਇਹ ਮਹਿਲਾ ਪਿੱਛੇ ਜਿਹੇ ਇਰਾਨ ਜਾ ਕੇ ਆਈ ਹੈ ਤੇ ਕੈਨੇਡਾ ਪਹੁੰਚਣ ਉੱਤੇ ਉਹ ਗੋ ਬੱਸ ਵਿੱਚ ਸਵਾਰ ਹੋਈ ਸੀ।
ਕੁਰਜ਼ੀ ਨੇ ਦੱਸਿਆ ਕਿ ਪਤੀ ਤੇ ਪਤਨੀ ਦੋਵੇਂ ਹੀ ਆਪਣੇ ਨਿੱਕੇ ਬਚੇ ਨਾਲ ਇਰਾਨ ਦਾ ਸਫਰ ਕਰਕੇ ਆਏ ਹਨ। ਮਹਿਲਾ ਦੇ ਪਤੀ ਵਿੱਚ ਟੋਰਾਂਟੋ ਪਹੁੰਚਣ ਤੱਕ ਇਸ ਦੇ ਕੋਈ ਲੱਛਣ ਨਹੀਂ ਸਨ ਤੇ ਉਹ ਖੁਦ ਨੂੰ ਅਲੱਗ ਥਲੱਗ ਹੀ ਰੱਖ ਰਿਹਾ ਸੀ। ਮਾਮੂਲੀ ਲੱਛਣਾਂ ਤੇ ਆਪਣੀ ਹਾਲਤ ਕਾਰਨ ਹੀ ਦੋਵੇਂ ਖੁਦ ਨੂੰ ਅਲੱਗ ਥਲੱਗ ਰੱਖ ਰਹੇ ਸਨ ਪਰ ਉਨ੍ਹਾਂ ਨੂੰ ਮੈਕੈਂਜ਼ੀ ਹੈਲਥ, ਰਿਚਮੰਡ ਹਿੱਲ ਦੇ ਹਸਪਤਾਲ, ਵੇਖਿਆ ਗਿਆ। ਕੁਰਜ਼ੀ ਨੇ ਦੱਸਿਆ ਕਿ ਯੌਰਕ ਰੀਜਨ ਵਿੱਚ ਦੂਜਾ ਨਵਾਂ ਕੇਸ ਉਸ ਵਿਅਕਤੀ ਦਾ ਆਇਆ ਹੈ ਜੋ ਆਪਣੇ 50ਵਿਆਂ ਵਿੱਚ ਹੈ। ਇਹ ਟੋਰਾਂਟੋ ਦੇ ਉਸ ਵਿਅਕਤੀ ਦਾ ਭਰਾ ਹੈ ਜਿਸ ਨੂੰ ਓਨਟਾਰੀਓ ਦਾ ਸੱਤਵਾਂ ਕੇਸ ਦੱਸਿਆ ਗਿਆ ਹੈ ਤੇ ਉਹ ਵੀ ਇਰਾਨ ਦਾ ਸਫਰ ਕਰਕੇ ਆਇਆ ਹੈ।
ਅਧਿਕਾਰੀਆਂ ਨੇ ਦੱਸਿਆ ਕਿ ਯੌਰਕ ਰੀਜਨ ਦੇ ਇੱਕ ਵਿਅਕਤੀ ਦੀ ਜਾਂਚ ਸ਼ੱੁਕਰਵਾਰ ਨੂੰ ਰਿਚਮੰਡ ਹਿੱਲ ਸਥਿਤ ਮੈਕੈਂਜ਼ੀ ਹੈਲਥ ਵਿਖੇ ਕੀਤੀ ਗਈ। ਹੁਣ ਇਹ ਵਿਅਕਤੀ ਵੀ ਖੁਦ ਹੀ ਅਲੱਗ ਥਲੱਗ ਰਹਿ ਰਿਹਾ ਹੈ। ਕੁਰਜ਼ੀ ਨੇ ਦੱਸਿਆ ਕਿ ਕੋਵਿਡ-19 ਦੀ ਤੀਜੀ ਮਰੀਜ਼ ਨਿਊਮਾਰਕਿਟ ਦੀ ਮਹਿਲਾ ਹੈ ਜੋ ਆਪਣੇ 70ਵਿਆਂ ਵਿੱਚ ਹੈ। ਉਨ੍ਹਾਂ ਦੱਸਿਆ ਕਿ ਉਹ ਵੀ ਟੋਰਾਂਟੋ ਦੇ ਉਸ ਵਿਅਕਤੀ ਵਾਂਗ, ਜਿਸ ਨੂੰ ਕੋਵਿਡ-19 ਤੋਂ ਪ੍ਰਭਾਵਿਤ ਓਨਟਾਰੀਓ ਦਾ ਅੱਠਵਾਂ ਵਿਅਕਤੀ ਦੱਸਿਆ ਜਾ ਰਿਹਾ ਹੈ, ਮਿਸਰ ਦੇ ਦੌਰੇ ਉੱਤੇ ਸੀ। ਕੁਰਜ਼ੀ ਨੇ ਦੱਸਿਆ ਕਿ ਦੋਵਾਂ ਨੇ 20 ਫਰਵਰੀ ਨੂੰ ਇੱਕਠਿਆਂ ਡਿਨਰ ਵੀ ਕੀਤਾ। ਉਨ੍ਹਾਂ ਦੱਸਿਆ ਕਿ ਪਹਿਲਾਂ ਮਹਿਲਾ ਵਿੱਚ ਇਸ ਦੇ ਕੋਈ ਲੱਛਣ ਨਹੀਂ ਸਨ। ਉਸ ਦੀ ਸ਼ਨਿੱਚਰਵਾਰ ਨੂੰ ਸਾਊਥ ਲੇਕ ਰੀਜਨਲ ਹੈਲਥ ਸੈਂਟਰ ਵਿੱਚ ਜਾਂਚ ਕੀਤੀ ਗਈ ਤੇ ਹੁਣ ਉਹ ਵੀ ਖੁਦ ਹੀ ਅਲੱਗ ਥਲੱਗ ਰਹਿ ਰਹੀ ਹੈ।
ਕੁਰਜ਼ੀ ਨੇ ਆਖਿਆ ਕਿ ਉਹ ਜਨਤਾ ਨੂੰ ਇਹ ਯਕੀਨੀ ਬਣਾਉਣਾ ਚਾਹੁੰਦੇ ਹਨ ਕਿ ਦੋਵਾਂ ਵਿੱਚੋਂ ਕੋਈ ਵੀ ਜਨਤਾ ਲਈ ਖਤਰਾ ਨਹੀਂ ਹੈ ਕਿਉਂਕਿ ਅਸੀਂ ਸਾਰੀ ਸਥਿਤੀ ਉੱਤੇ ਨਜ਼ਰ ਰੱਖ ਰਹੇ ਹਾਂ ਤੇ ਉਹ ਅਲੱਗ ਥਲੱਗ ਰਹਿ ਰਹੇ ਹਨ। ਤੀਜਾ ਵਿਅਕਤੀ ਵੀ ਸੈਲਫ ਆਈਸੋਲੇਸ਼ਨ ਵਿੱਚ ਹੈ ਪਰ ਅਸੀਂ ਅਜੇ ਵੀ ਖਤਰਿਆਂ ਦਾ ਮੁਲਾਂਕਣ ਕਰ ਰਹੇ ਹਾਂ। ਉਨ੍ਹਾਂ ਸਥਾਨਕ ਵਾਸੀਆਂ ਨੂੰ ਦੱਸਿਆ ਕਿ ਇਹ ਵਾਇਰਸ ਕਮਿਊਨਿਟੀ ਵਿੱਚ ਫੈਲ ਨਹੀਂ ਰਿਹਾ, ਸਗੋਂ ਰੀਜਨ ਵਿੱਚ ਉਹੀ ਮਾਮਲੇ ਕੋਵਿਡ-19 ਦੇ ਸਾਹਮਣੇ ਆਏ ਹਨ ਜਿਹੜੇ ਕਿਸੇ ਪ੍ਰਭਾਵਿਤ ਦੇਸ਼ ਦਾ ਸਫਰ ਕਰਕੇ ਆਏ ਹਨ।
ਓਨਟਾਰੀਓ ਹੈਲਥ ਅਧਿਕਾਰੀਆਂ ਨੇ ਆਖਿਆ ਕਿ ਟੋਰਾਂਟੋ ਦਾ ਕੇਸ ਉਸ ਵਿਅਕਤੀ ਦਾ ਹੈ ਜਿਹੜਾ ਆਪਣੇ 60ਵਿਆਂ ਵਿੱਚ ਹੈ ਤੇ ਜਿਹੜਾ 23 ਫਰਵਰੀ ਨੂੰ ਇਰਾਨ ਤੋਂ ਪਰਤਿਆ ਹੈ। ਉਹ ਸ਼ੱੁਕਰਵਾਰ ਨੂੰ ਨੌਰਥ ਯੌਰਕ ਦੇ ਜਨਰਲ ਹਸਪਤਾਲ ਦੇ ਐਮਰਜੰਸੀ ਡਿਪਾਰਟਮੈਂਟ ਪਹੁੰਚਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਉਸ ਨੇ ਖੰਘ ਹੋਣ ਦੀ ਸਿ਼ਕਾਇਤ ਕੀਤੀ ਸੀ ਤੇ ਉਸ ਦੀ ਜਾਂਚ ਤੋਂ ਬਾਅਦ ਉਸ ਨੂੰ ਉਸੇ ਦਿਨ ਹੀ ਘਰ ਭੇਜ ਦਿੱਤਾ ਗਿਆ। ਉਹ ਵੀ ਖੁਦ ਹੀ ਅਲੱਗ ਥਲੱਗ ਹੋ ਗਿਆ, ਹੁਣ ਉਸ ਦਾ ਹੋਰਨਾਂ ਨਾਲ ਬਹੁਤ ਘਟ ਰਾਬਤਾ ਹੈ।
ਐਤਵਾਰ ਨੂੰ ਜਾਰੀ ਕੀਤੀ ਗਈ ਨਿਊਜ਼ ਰਲੀਜ਼ ਵਿੱਚ ਸਿਹਤ ਅਧਿਕਾਰੀਆਂ ਨੇ ਦੱਸਿਆ ਕਿ ਟੋਰਾਂਟੋ ਪਬਲਿਕ ਹੈਲਥ ਕਾਂਟੈਕਟਸ ਨੂੰ ਲੱਭਣ ਤੇ ਕੇਸ ਮੈਨੇਜਮੈਂਟ ਵਿੱਚ ਪੂਰੀ ਸਰਗਰਮੀ ਨਾਲ ਰੱੁਝੀ ਹੋਈ ਹੈ। ਪ੍ਰੋਵਿੰਸ ਦੇ ਚੀਫ ਮੈਡੀਕਲ ਆਫੀਸਰ ਆਫ ਹੈਲਥ ਡਾ. ਡੇਵਿਡ ਵਿਲੀਅਮਜ਼ ਸਾਰੇ ਮਾਮਲਿਆਂ ਬਾਰੇ ਸੋਮਵਾਰ ਨੂੰ ਅਪਡੇਟ ਮੁਹੱਈਆ ਕਰਵਾਉਣਗੇ।