ਹਜ਼ਾਰੀਬਾਗ, 27 ਫਰਵਰੀ (ਪੋਸਟ ਬਿਊਰੋ)- ਕਟਕਮਦਾਗ ਥਾਣਾ ਖੇਤਰ ਦੇ ਸੁਲਤਾਨਾ ਪਿੰਡ ਵਿੱਚ ਇੱਕ ਮਹਿਲਾ ਨੂੰ ਮੋਬਾਈਲ ਉੱਤੇ ਮੈਸੇਜ ਦਾ ਰਿਪਲਾਈ ਦੇਣਾ ਮੁਹੰਮਦ ਸਲਮਾਨ ਅੰਸਾਰੀ (24) ਦੀ ਮੌਤ ਦਾ ਕਾਰਨ ਬਣ ਗਿਆ। ਮਹਿਲਾ ਦੇ ਪਤੀ ਨੇ ਨੌਜਵਾਨ 'ਤੇ ਚਾਕੂ ਨਾਲ ਹਮਲਾ ਕਰ ਦਿੱਤਾ ਤੇ ਇਲਾਜ ਦੌਰਾਨ ਉਸਦੀ ਮੌਤ ਹੋ ਗਈ। ਦੋਸ਼ੀ ਦੀ ਗ੍ਰਿਫਤਾਰੀ ਦੀ ਮੰਗ 'ਤੇ ਪਿੰਡ ਵਾਸੀਆਂ ਨੇ ਬੀਤੇ ਦਿਨ ਚਾਰ ਘੰਟੇ ਹਜ਼ਾਰੀਬਾਗ-ਸਿਮਰੀਆ ਮਾਰਗ ਜਾਮ ਰੱਖਿਆ।
ਮੁਹੰਮਦ ਤਬਾਰਕ ਦਾ ਬੇਟਾ ਸਲਮਾਨ ਸੁਲਤਾਨਾ ਪਿੰਡ ਦਾ ਵਸਨੀਕ ਸੀ ਅਤੇ ਉਸ ਦਾ ਵਿਆਹ 15 ਦਿਨ ਪਹਿਲਾਂ ਹੋਇਆ ਸੀ। ਦੋ ਦਿਨ ਪਹਿਲਾਂ ਸਲਮਾਨ ਦੇ ਮੋਬਾਈਲ ਉਤੇ ਚੰਦੌਲ ਵਾਸੀ ਮੁਹੰਮਦ ਫੈਸਲ ਦੀ ਪਤਨੀ ਦਾ ਗੁਡ ਮਾਰਨਿੰਗ ਦਾ ਮੈਸੇਜ ਆਇਆ ਤਾਂ ਸਲਮਾਨ ਦੀ ਪਤਨੀ ਨੇ ਆਪਣੀ ਸਹੇਲੀ ਦਾ ਨੰਬਰ ਸਮਝ ਕੇ ਉਸੇ ਨੰਬਰ 'ਤੇ ਗੁਡ ਮਾਰਨਿੰਗ ਲਿਖ ਕੇ ਰਿਪਲਾਈ ਦੇ ਦਿੱਤੀ। ਮਹਿਲਾ ਦੇ ਪੇਕੇ ਵੀ ਸੁਲਤਾਨਾ ਪਿੰਡ ਹਨ। ਫੈਸਲ ਨੇ ਮੈਸੇਜ ਦੇਖਿਆ ਤਾਂ ਉਸ ਨੇ ਪਤਨੀ ਤੋਂ ਪੁੱਛਿਆ। ਉਸ ਦੀ ਪਤਨੀ ਨੇ ਉਸ ਨੂੰ ਦੱਸਿਆ ਕਿ ਮੈਸੇਜ ਉਸ ਦੇ ਪੇਕੇ ਪਿੰਡ ਦੇ ਸਲਮਾਨ ਦਾ ਹੈ। ਇਸ 'ਤੇ ਫੈਸਲ 25 ਫਰਵਰੀ ਨੂੰ ਆਪਣੇ ਭਰਾ ਅਸਲਮ ਅਤੇ ਦੋ ਸਾਥੀਆਂ ਨਾਲ ਸੁਲਤਾਨਾ ਪਹੁੰਚਿਆ। ਉਸ ਨੇ ਆਪਣੇ ਸਹੁਰੇ ਪਰਵਾਰ ਨੂੰ ਇਸ ਬਾਰੇ ਦੱਸਿਆ ਅਤੇ ਸਹੁਰਾ ਮੁਹੰਮਦ ਕਲੀਮ ਅਤੇ ਪਿੰਡ ਦੇ ਮੁਹੰਮਦ ਹਦੀਸ਼ ਸਮੇਤ ਦੋਵੇਂ ਭਰਾ ਅਤੇ ਉਨ੍ਹਾਂ ਦੇ ਸਾਥੀ ਸਲਮਾਨ ਦੇ ਘਰ ਪਹੁੰਚੇ ਅਤੇ ਪੁੱਛਗਿੱਛ ਕਰਨ ਲੱਗੇ। ਇਸੇ ਤੋਂ ਬਹਿਸ ਹੋ ਗਈ ਤਾਂ ਗੁੱਸੇ ਵਿੱਚ ਫੈਸਲ ਨੇ ਸਲਮਾਨ 'ਤੇ ਚਾਕੂ ਨਾਲ ਹਮਲਾ ਕਰ ਦਿੱਤਾ। ਸਲਮਾਨ ਜ਼ਖਮੀ ਹੋ ਕੇ ਡਿੱਗ ਪਿਆ ਤਾਂ ਸਾਰੇ ਫਰਾਰ ਹੋ ਗਏ। ਸਲਮਾਨ ਨੂੰ ਹਜ਼ਾਰੀਬਾਗ ਸਦਰ ਹਸਪਤਾਲ ਲਿਆਂਦਾ ਗਿਆ। ਮੰਗਲਵਾਰ ਰਾਤ ਉਸ ਦੀ ਮੌਤ ਹੋ ਗਈ। ਕੱਲ੍ਹ ਪਿੰਡ ਵਾਸੀਆਂ ਨੇ ਸਵੇਰੇ ਨੌਂ ਵਜੇ ਤੋਂ ਹਜ਼ਾਰੀਬਾਗ-ਸਿਮਰੀਆ ਮਾਰਗ ਜਾਮ ਕਰ ਦਿੱਤਾ ਤਾਂ ਪੁਲਸ ਨੇ ਕਾਤਲਾਂ ਦੀ ਗ੍ਰਿਫਤਾਰੀ ਦਾ ਭਰੋਸਾ ਦਿੱਤਾ।