ਬਰਲਿਨ, 29 ਅਕਤੂਬਰ (ਪੋਸਟ ਬਿਊਰੋ)- ਜਰਮਨੀ ਦੀ ਚਾਂਸਲਰ ਐਂਜਲਾ ਮਰਕੇਲ ਨੇ ਕਿਹਾ ਹੈ ਕਿ ਉਹ 2021 ਵਿੱਚ ਕਾਰਜਕਾਲ ਪੂਰਾ ਹੋਣ ਪਿੱਛੋਂ ਹੋਰ ਚੋਣਾਂ ਨਹੀਂ ਲੜੇਗੀ। ਉਨ੍ਹਾਂ ਨੇ ਇਹ ਫੈਸਲਾ ਉਦੋਂ ਲਿਆ, ਜਦੋਂ ਸਿਆਸੀ ਸੰਕਟਾਂ ਅਤੇ ਖੇਤਰੀ ਚੋਣਾਂ `ਚ ਹਾਰ ਨਾਲ ਗਠਜੋੜ ਕਮਜ਼ੋਰ ਹੋ ਗਿਆ ਹੈ। ਉਹ 2005 ਤੋਂ ਜਰਮਨੀ ਦੀ ਚਾਂਸਲਰ ਹਨ।
ਇਕ ਜਾਣਕਾਰ ਸੂਤਰ ਦੇ ਮੁਤਾਬਕ ਉਨ੍ਹਾਂ ਨੇ ਆਪਣੀ ਪਾਰਟੀ ਦੇ ਚੋਟੀ ਦੇ ਨੇਤਾਵਾਂ ਨੂੰ ਕਿਹਾ ਕਿ 2021 ਤੱਕ ਦਾ ਉਨ੍ਹਾਂ ਦਾ ਕਾਰਜਕਾਲ ਆਖਰੀ ਹੋਵੇਗਾ। ਉਨ੍ਹਾਂ ਦਾ ਇਹ ਫੈਸਲਾ ਯੂਰਪੀ ਸਿਆਸਤ ਵਿੱਚ ਉਨ੍ਹਾਂ ਦੇ 13 ਸਾਲ ਦੇ ਦਬਦਬੇ ਦੇ ਅੰਤ ਦੀ ਸ਼ੁਰੂਆਤ ਹੋਵੇਗੀ। ਉਨ੍ਹਾਂ ਨੇ ਕਿਹਾ ਕਿ ਚੌਥਾ ਕਾਰਜਕਾਲ ਦੇ ਚਾਂਸਲਰ ਦੇ ਰੂਪ `ਚ ਮੇਰਾ ਆਖਰੀ ਕਾਰਜਕਾਲ ਹੋਵੇਗਾ। ਸਾਲ 2021 ਚੋਣਾਂ `ਚ ਚਾਂਸਲਰ ਅਹੁਦੇ ਲਈ ਨਹੀਂ ਲੜਾਂਗੀ। ਮੈਂ ਕੋਈ ਹੋਰ ਸਿਆਸੀ ਅਹੁਦਾ ਨਹੀਂ ਚਾਹੁੰਦੀ।
ਮਰਕੇਲ ਨੇ ਇਸ ਤੋਂ ਪਹਿਲਾਂ ਆਪਣੀ ਪਾਰਟੀ ਸੀ ਡੀ ਯੂ ਨੂੰ ਦੱਸਿਆ ਸੀ ਕਿ ਉਹ ਇਸ ਦਸੰਬਰ `ਚ ਪਾਰਟੀ ਚੇਅਰਮੈਨ ਦੇ ਅਹੁਦੇ ਲਈ ਦੁਬਾਰਾ ਨਹੀਂ ਖੜ੍ਹੀ ਹੋਵੇਗੀ ਤਾਂ ਕਿ ਨਵੀਂ ਲੀਡਰਸਿ਼ਪ ਆ ਸਕੇ। ਉਨ੍ਹਾਂ ਨੇ ਪਾਰਟੀ ਦਫਤਰ `ਚ ਪੱਤਰਕਾਰਾਂ ਨੂੰ ਕਿਹਾ ਕਿ ਅੱਜ ਨਵਾਂ ਚੈਪਟਰ ਸ਼ੁਰੂ ਹੋਣ ਦਾ ਵੇਲਾ ਹੈ।