ਨਵੀਂ ਦਿੱਲੀ, 27 ਫਰਵਰੀ (ਪੋਸਟ ਬਿਊਰੋ)- ਦਿੱਲੀ ਦੀ ਹਿੰਸਾ ਬਾਰੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਪਹਿਲਾਂ ਤੋਂ ਹੀ ਪੁਲਸ ਦੀ ਕਾਰਜ ਪ੍ਰਣਾਲੀ 'ਤੇ ਸਵਾਲੀਆ ਨਿਸ਼ਾਨ ਲਾ ਰਹੇ ਹਨ। ਉਨ੍ਹਾਂ ਨੇ ਲੋੜੀਂਦੀ ਗਿਣਤੀ ਵਿੱਚ ਅਤੇ ਸਮੇਂ 'ਤੇ ਕੇਂਦਰੀ ਅਰਧ ਸੈਨਿਕ ਬਲਾਂ ਨੂੰ ਹਿੰਸਾ ਗ੍ਰਸਤ ਇਲਾਕਿਆਂ ਵਿੱਚ ਨਾ ਭੇਜੇ ਜਾਣ 'ਤੇ ਨਾਰਾਜ਼ਗੀ ਪ੍ਰਗਟਾਈ ਹੈ।
ਇੱਕ ਦਿਨ ਪਹਿਲਾਂ ਕਾਂਗਰਸ ਦੀ ਚੇਅਰਪਰਸਨ ਸੋਨੀਆ ਗਾਂਧੀ ਨੇ ਵੀ ਸਵਾਲ ਉਠਾਇਆ ਹੈ ਕਿ ਦਿੱਲੀ ਪੁਲਸ ਪਿਛਲੇ 72 ਘੰਟੇ ਤੋਂ ਨਾਕਾਮ ਰਹੀ ਸੀ। ਪੈਰਾ ਮਿਲਟਰੀ ਫੋਰਸ ਬੁਲਾਉਣ ਵਿੱਚ ਇੰਨੀ ਦੇਰ ਕਿਉਂ ਹੋਈ, ਜਦ ਕਿ ਹਿੰਸਾ ਦੌਰਾਨ ਪੰਜ ਅਰਧ ਸੈਨਿਕ ਬਲਾਂ ਦੀਆਂ 163 ਕੰਪਨੀਆਂ ਦਿੱਲੀ ਵਿੱਚ ਹੀ ਸਨ। ਇਹ ਸੁਰੱਖਿਆ ਫੋਰਸ ਵੱਧ ਤੋਂ ਵੱਧ 50 ਮਿੰਟ ਵਿੱਚ ਦਿੱਲੀ ਦੇ ਕਿਸੇ ਵੀ ਹਿੱਸੇ ਵਿੱਚ ਪਹੁੰਚ ਸਕਦੀ ਸੀ। ਇਨ੍ਹਾਂ ਫੋਰਸਾਂ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਦਿੱਲੀ ਦੀ ਹਿੰਸਾ ਉਤੇ ਕਾਬੂ ਪਾਉਣ ਲਈ ਸਮੇਂ ਉਤੇ ਸਾਨੂੰ ਨਹੀਂ ਬੁਲਾਇਆ ਗਿਆ। ਕੇਂਦਰੀ ਗ੍ਰਹਿ ਮੰਤਰਾਲੇ ਵਿੱਚ ਮੰਗਲਵਾਰ ਦੀ ਬੈਠਕ ਦੇ ਬਾਅਦ ਅਰਧ ਸੈਨਿਕ ਫੋਰਸ ਦੀਆਂ 26 ਕੰਪਨੀਆਂ ਦਿੱਲੀ ਦੇ ਹਿੰਸਾ ਗ੍ਰਸਤ ਇਲਾਕੇ ਨੂੰ ਭੇਜੀਆਂ ਗਈਆਂ ਹਨ, ਪਰ ਇਨ੍ਹਾਂ ਵਿੱਚੋਂ 13 ਕੰਪਨੀਆਂ ਅਜਿਹੀਆਂ ਸਨ, ਜਿਨ੍ਹਾਂ ਨੂੰ ਬਾਹਰ ਤੋਂ ਬੁਲਾਇਆ ਗਿਆ ਹੈ।
ਵਰਨਣ ਯੋਗ ਹੈ ਕਿ ਦੇਸ਼ ਦੀ ਸਭ ਤੋਂ ਵੱਡੇ ਕੇਂਦਰੀ ਪੈਰਾ ਮਿਲਟਰੀ ਫੋਰਸ ਸੀ ਆਰ ਪੀ ਐੱਫ ਦੀਆਂ ਕਰੀਬ 26 ਕੰਪਨੀਆਂ ਸਾਰਾ ਸਾਲ ਦਿੱਲੀ ਵਿੱਚ ਰਹਿੰਦੀਆਂ ਹਨ। ਇਹ ਕੰਪਨੀਆਂ ਵੀ ਆਈ ਪੀ ਡਿਊਟੀ, ਧਰਨਾ ਪ੍ਰਦਰਸ਼ਨ, ਰੈਲੀ, ਸੰਸਦ ਸੈਸ਼ਨ, ਦੰਗਾ ਫਸਾਦ ਅਤੇ ਤਿਉਹਾਰ ਆਦਿ ਦੇ ਪ੍ਰਬੰਧ ਵਿੱਚ ਲਾਈਆਂ ਜਾਂਦੀਆਂ ਹਨ। ਇਨ੍ਹਾਂ ਦੇ ਨਾਲ ਕਰੀਬ ਨੱਬੇ ਕੰਪਨੀਆਂ ਰਿਜ਼ਰਵ ਰਹਿੰਦੀਆਂ ਹਨ। ਇਸ ਤਰ੍ਹਾਂ ਸੀ ਆਰ ਪੀ ਐੱਫ ਦੀਆਂ 116 ਕੰਪਨੀਆਂ ਦਿੱਲੀ-ਐੱਨ ਸੀ ਆਰ ਵਿੱਚ ਹਰ ਸਮੇਂ ਰਹਿੰਦੀਆਂ ਹਨ। ਅਰਧ ਸੈਨਿਕ ਫੋਰਸ ਦੇ ਇੱਕ ਉੱਚ ਅਧਿਕਾਰੀ ਨੇ ਕਿਹਾ ਕਿ ਕੇਵਲ ਇਹੋ ਨਹੀਂ, ਸਗੋਂ ਆਈ ਟੀ ਬੀ ਪੀ ਦੀਆਂ 12 ਕੰਪਨੀਆਂ ਵੀ ਦਿੱਲੀ ਵਿੱਚ ਹਨ। ਇਨ੍ਹਾਂ ਵਿੱਚੋਂ ਬਹੁਤ ਸਾਰੇ ਜਵਾਨਾਂ ਨੂੰ ਦਿੱਲੀ ਪੁਲਸ ਦੀ ਮਦਦ ਦੇ ਲਈ ਅਲੱਗ ਅਲੱਗ ਤਰ੍ਹਾਂ ਦੀ ਡਿਊਟੀ ਦਿੱਤੀ ਜਾਂਦੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜਦ ਕਦੇ ਐਮਰਜੈਂਸੀ ਵਿੱਚ ਦਿੱਲੀ ਪੁਲਸ ਵੱਲੋਂ ਜਵਾਨ ਭੇਜੇ ਜਾਣ ਦੀ ਮੰਗ ਆਵੇ ਤਾਂ ਇਸੇ ਡਿਊਟੀ ਵਿੱਚੋਂ ਜਵਾਨਾਂ ਨੂੰ ਕੱਢ ਕੇ ਉਹ ਮੰਗ ਪੂਰੀ ਕੀਤੀ ਜਾਂਦੀ ਹੈ। ਆਈ ਟੀ ਬੀ ਪੀ ਦੀਆਂ ਛੇ ਕੰਪਨੀਆਂ ਨੋਇਡਾ ਵਿੱਚ ਤਾਂ ਛੇ ਦੱਖਣੀ ਦਿੱਲੀ ਵਿੱਚ ਰਹਿੰਦੀਆਂ ਹਨ। ਸੀ ਆਈ ਐੱਸ ਐੱਫ ਦੀਆਂ ਵੀ ਕਰੀਬ ਛੇ ਕੰਪਨੀਆਂ ਦਿੱਲੀ ਵਿੱਚ ਹੁੰਦੀਆਂ ਹਨ।