ਜਲੰਧਰ, 27 ਫਰਵਰੀ (ਪੋਸਟ ਬਿਊਰੋ)- ਇੱਕ ਏਅਰਲਾਈਨ ਨੂੰ ਆਫ ਲਾਈਨ ਲੈਟਰ ਦੇਣਾ ਮਹਿੰਗਾ ਪੈ ਗਿਆ। ਜ਼ਿਲਾ ਕੰਜ਼ਿਊਮਰ ਫੋਰਮ ਨੇ ਇਸ ਕੰਪਨੀ ਨੂੰ 1æ87 ਲੱਖ ਰੁਪਏ ਦਾ ਜੁਰਮਾਨਾ ਲਾਇਆ ਹੈ।
ਹੁਸ਼ਿਆਰਪੁਰ ਵਾਸੀ ਰਿਟਾਇਰਡ ਬੈਂਕ ਮੈਨੇਜਰ ਜੋਗਿੰਦਰ ਸਿੰਘ ਅਤੇ ਉਸ ਦੇ ਦੋਸਤ ਵਰਿੰਦਰ ਸਿੰਘ ਬੰਗੜ ਨੇ ਸਾਲ 2018 ਵਿੱਚ ਜੈੱਟ ਏਅਰਵੇਜ਼ ਤੋਂ ਦਿੱਲੀ-ਪੈਰਿਸ-ਕੈਨੇਡਾ ਦੀ ਕੁਨੈਕਟਿੰਗ ਫਲਾਈਟ ਖਰੀਦੀ ਸੀ। ਨਵੀਂ ਦਿੱਲੀ ਤੋਂ ਜੈੱਟ ਏਅਰਵੇਜ ਦੀ ਫਲਾਈਟ ਰਾਹੀਂ ਉਹ ਪੈਰਿਸ ਪਹੁੰਚੇ ਅਤੇ ਉਥੋਂ ਜਦੋਂ ਟੋਰਾਂਟੋ ਦੇ ਲਈ ਏਅਰ ਫਰਾਂਸ ਦੀ ਫਲਾਈਟ ਬਦਲਣੀ ਸੀ ਤਾਂ ਉਥੇ ਤੈਨਾਤ ਸਟਾਫ ਦੀ ਹੜਤਾਲ ਚੱਲ ਰਹੀ ਸੀ, ਇਸ ਲਈ ਯਾਤਰੀਆਂ ਨੂੰ ਰਾਤ ਓਥੇ ਰੁਕਣਾ ਪਿਆ। ਕੰਪਨੀ ਨੇ ਅਗਲੇ ਦਿਨ ਦੋ ਵਜੇ ਟੋਰਾਂਟੋ ਦੀ ਫਲਾਈਟ ਦਿੱਤੀ ਅਤੇ ਟੋਰਾਂਟੋ ਤੋਂ ਵੈਨਕੁਵਰ ਦਾ ਇੱਕ ਕੰਫਰਮੇਸ਼ਨ ਲੈਟਰ ਦਿੱਤਾ ਅਤੇ ਕਿਹਾ ਕਿ ਏਅਰਪੋਰਟ ਉੱਤੇ ਏਅਰ ਕੈਨੇਡਾ ਦੇ ਕਾਊਂਟਰ Ḕਤੇ ਜਾ ਕੇ ਲੈਟਰ ਦਿਖਾਉਣ ਉਤੇ ਬੋਰਡਿੰਗ ਪਾਸ ਮਿਲ ਜਾਣਗੇ। ਉਥੇ ਜਦ ਲੈਟਰ ਦਿਖਾਇਆ ਤਾਂ ਏਅਰ ਕੈਨੇਡਾ ਦੇ ਸਟਾਫ ਨੇ ਬੋਰਡਿੰਗ ਪਾਸ ਦਿੱਤੇ ਅਤੇ ਇਮੀਗਰੇਸ਼ਨ ਚੈੱਕ ਦੇ ਬਾਅਦ ਜਦ ਟਿਕਟ ਪੰਚ ਕਰਨ ਲੱਗੇ ਤਾਂ ਟਿਕਟ ਦਾ ਆਨਲਾਈਨ ਕੋਈ ਰਿਸਪਾਂਸ ਨਹੀਂ ਆਇਆ। ਇਸ ਲਈ ਉਨ੍ਹਾਂ ਨੂੰ ਲਾਈਨ ਤੋਂ ਬਾਹਰ ਕਰ ਦਿੱਤਾ ਗਿਆ।
ਕੁਨੈਕਟਿੰਗ ਫਲਾਈਟ ਹੋਣ ਦੇ ਕਾਰਨ ਉਨ੍ਹਾਂ ਦਾ ਸਾਮਾਨ ਪਹਿਲਾਂ ਫਲਾਈਟ ਵਿੱਚ ਲੋਡ ਹੋ ਚੁੱਕਾ ਸੀ। ਇੰਨੇ ਵਿੱਚ ਫਲਾਈਟ ਆਪਣੇ ਮਿਥੇ ਸਮੇਂ Ḕਤੇ ਰਵਾਨਾ ਹੋ ਗਈ। ਫਿਰ ਕੰਪਨੀ ਦੇ ਸਟਾਫ ਨੇ ਉਨ੍ਹਾਂ ਨੂੰ ਕਿਹਾ ਕਿ ਦੋਬਾਰਾ ਟਿਕਟ ਲੈਣੀ ਪਵੇਗੀ। ਏਅਰ ਫਰਾਂਸ ਵੱਲੋਂ ਦਿੱਤੇ ਇਸ ਲੈਟਰ ਦੀ ਓਥੇ ਤਦ ਤੱਕ ਵੈਲਿਊ ਨਹੀਂ ਹੈ, ਜਦ ਤੱਕ ਇਸ ਨੂੰ ਆਨਲਾਈਨ ਅਪਡੇਟ ਨਹੀਂ ਕੀਤਾ ਜਾਂਦਾ। ਉਨ੍ਹਾਂ ਕੋਲ ਉਸ ਸਮੇਂ ਕੋਈ ਸਾਮਾਨ ਨਹੀਂ ਸੀ ਅਤੇ ਕੇਵਲ 500 ਡਾਲਰ ਕੈਸ਼ ਸਨ। ਐਨ ਮੌਕੇ Ḕਤੇ ਮਹਿੰਗੀ ਕੀਮਤ Ḕਤੇ ਕ੍ਰੈਡਿਟ ਕਾਰਡ ਰਾਹੀਂ ਟਿਕਟ ਖਰੀਦੀ ਗਈ। ਐਡਵੋਕੇਟ ਵਿਕਰਮ ਸ਼ੈਰੀ ਨੇ ਰਾਹੀਂ ਵਰਿੰਦਰ ਸਿੰਘ ਬੰਗੜ ਅਤੇ ਜੋਗਿੰਦਰ ਸਿੰਘ ਨੇ 25 ਸਤੰਬਰ 2018 ਨੂੰ ਜ਼ਿਲਾ ਕੰਜ਼ਿਊਮਰ ਫੋਰਮ ਵਿੱਚ ਸ਼ਿਕਾਇਤ ਕੀਤੀ। ਫੋਰਮ ਦੇ ਪ੍ਰੈਜ਼ੀਡੈਂਟ ਕਰਨੈਲ ਸਿੰਘ ਅਤੇ ਮੈਂਬਰ ਜਯੋਤਸਨਾ ਦੇ ਬੈਂਚ ਨੇ ਏਅਰ ਕੰਪਨੀ ਨੂੰ ਦੋਵਾਂ ਟਿਕਟਾਂ ਦੇ 71,637 ਰੁਪਏ ਵਾਪਸ ਕਰਨ ਦੇ ਨਾਲ ਦੋਵਾਂ ਸ਼ਿਕਾਇਤ ਕਰਤਾ ਨੂੰ 50-50 ਹਜ਼ਾਰ ਰੁਪਏ ਮੁਆਵਜ਼ਾ ਅਤੇ 15,000 ਰੁਪਏ ਕਾਨੂੰਨੀ ਖਰਚ ਦੇ ਅਦਾ ਕਰਨ ਦਾ ਫੈਸਲਾ ਸੁਣਾਇਆ।