ਪਟਿਆਲਾ, 27 ਫਰਵਰੀ (ਪੋਸਟ ਬਿਊਰੋ)- ਅਕਾਲੀ ਦਲ ਦੇ ਸੀਨੀਅਰ ਆਗੂ ਸੁਖਦੇਵ ਸਿੰਘ ਢੀਂਡਸਾ ਦੀ ਅਕਾਲੀ ਦਲ (ਟਕਸਾਲੀ) ਨਾਲ ਸਿਆਸੀ ਦਾਲ ਗਲਣੀ ਔਖੀ ਹੋ ਸਕਦੀ ਹੈ, ਕਿਉਂਕਿ ਢੀਂਡਸਾ ਅੰਦਰੂਨੀ ਤੌਰ ਉੱਤੇ ਅਕਾਲੀ ਦਲ (ਟਕਸਾਲੀ) ਦੇ ਪ੍ਰਧਾਨ ਰਣਜੀਤ ਸਿੰਘ ਬ੍ਰਹਮਪੁਰਾ ਨੂੰ ਸਿਰਫ ਆਪਣੇ ਵਿਧਾਨ ਸਭਾ ਹਲਕੇ ਜੋਗਾ ਮੰਨਦੇ ਹਨ ਅਤੇ ਇਸ ਪਾਰਟੀ ਦੇ ਸੀਨੀਅਰ ਮੀਤ ਪ੍ਰਧਾਨ ਬੀਰਦਵਿੰਦਰ ਸਿੰਘ ਪ੍ਰਤੀ ਵੀ ਢੀਂਡਸਾ ਦਾ ਸਿਆਸੀ ਰੁਖ ਚੰਗਾ ਨਹੀਂ ਲੱਗਦਾ। ਇਹ ਗੁੱਝੀਆਂ ਗੱਲਾਂ ਸੁਖਦੇਵ ਸਿੰਘ ਢੀਂਡਸਾ ਦੀ ਵਾਇਰਲ ਹੋਈ ਆਡੀਓ ਤੋਂ ਪਤਾ ਲੱਗਦੀਆਂ ਹਨ।
ਢੀਂਡਸਾ ਕੱਲ੍ਹ ਪਟਿਆਲਾ ਵਿੱਚ ਅਕਾਲੀ ਦਲ ਮੁਲਾਜ਼ਮ ਵਿੰਗ ਦੇ ਸਾਬਕਾ ਪ੍ਰਧਾਨ ਅਤੇ ਪੰਜਾਬ ਮੁਲਾਜ਼ਮ ਭਲਾਈ ਬੋਰਡ ਦੇ ਸਾਬਕਾ ਚੇਅਰਮੈਨ ਸੁਰਿੰਦਰ ਸਿੰਘ ਪਹਿਲਵਾਨ ਕੋਲ ਉਨ੍ਹਾਂ ਦੇ ਘਰ ਗਏ ਸਨ। ਇਸ ਦੌਰਾਨ ਦੋਵਾਂ ਆਗੂਆਂ ਵਿੱਚ ਜੋ ਗੱਲਬਾਤ ਹੋਈ, ਉਸਦੀ ਆਡੀਓ ਵਾਇਰਲ ਹੋ ਗਈ ਹੈ। ਇਸ ਵਿੱਚ ਢੀਂਡਸਾ ਕਹਿੰਦੇ ਹਨ ਕਿ ਰਣਜੀਤ ਸਿੰਘ ਬ੍ਰਹਮਪੁਰਾ ਦਾ ਸਿਆਸੀ ਵੱਕਾਰ ਮਸਾਂ ਉਸਦੇ ਆਪਣੇ ਹਲਕੇ ਤੱਕ ਸੀਮਤ ਹੈ ਤੇ ਟਕਸਾਲੀ ਧਿਰ ਦੇ ਆਗੂ ਬੀਰਦਵਿੰਦਰ ਸਿੰਘ ਨੂੰ ਲੋਕ ਸਭਾ ਚੋਣ ਪਿੜ Ḕਚ ਨਿਗੂਣੀਆਂ ਵੋਟਾਂ ਹੀ ਮਿਲੀਆਂ ਹਨ। ਇਹ ਵੀ ਕਿਹਾ ਹੈ ਕਿ ਬ੍ਰਹਮਪੁਰਾ ਦੇ ਪੁੱਤਰ ਦਾ ਵੀ ਕੋਈ ਬਹੁਤਾ ਸਿਆਸੀ ਆਧਾਰ ਨਹੀਂ। ਇਸ ਦੌਰਾਨ ਢੀਂਡਸਾ ਜਿੱਥੇ ਪਹਿਲਵਾਨ ਤੋਂ ਸਿਆਸੀ ਮਦਦ ਮੰਗ ਰਹੇ ਸਨ, ਉਥੇ ਇਹ ਵੀ ਕਹਿ ਰਹੇ ਸਨ ਕਿ ਸੁਖਬੀਰ ਸਿੰਘ ਬਾਦਲ ਜਿਹੜਾ ਅਕਸਰ ਪਹਿਲਾਂ ਲੀਡਰਾਂ ਨੂੰ ਮਿਲਣ ਤੋਂ ਨਾਂਹ-ਨੁੱਕਰ ਕਰਦਾ ਸੀ, ਓਥੇ ਖ਼ੁਦ ਲੀਡਰਾਂ ਤੋਂ ਮਿਲਣ ਲਈ ਟਾਈਮ ਮੰਗਦਾ ਹੈ। ਆਡੀਓ ਵਿੱਚ ਢੀਂਡਸਾ ਇਹ ਵੀ ਕਹਿ ਰਹੇ ਹਨ ਕਿ ਸੁਖਬੀਰ ਸਿੰਘ ਦੀ ਪ੍ਰਧਾਨਗੀ ਦੌਰਾਨ ਪਾਰਟੀ ਕਦੇ ਜਿੱਤ ਨਹੀਂ ਸਕਦੀ। ਇਸ ਗੱਲਬਾਤ ਵਿੱਚ ਪਟਿਆਲਾ ਜ਼ਿਲ੍ਹੇ ਦੇ ਇੱਕ ਸਾਬਕਾ ਜ਼ਿਲ੍ਹਾ ਪ੍ਰਧਾਨ ਦੀ ਸਿਆਸੀ ਸ਼ਖ਼ਸੀਅਤ ਉੱਤੇ ਟੋਟਕੇ ਕੱਸੇ ਜਾਂਦੇ ਰਹੇ ਹਨ।
ਇਹ ਆਡੀਓ ਕਰੀਬ 12 ਮਿੰਟ ਦੀ ਹੈ। ਇਸ ਦੌਰਾਨ ਅਕਾਲੀ ਦਲ ਬਾਦਲ ਨਾਲ ਜੁੜੇ ਹੋਏ ਆਗੂ ਸੁਰਿੰਦਰ ਸਿੰਘ ਪਹਿਲਵਾਨ ਨੇ ਢੀਂਡਸਾ ਨੂੰ ਯਕੀਨ ਦਿਵਾਇਆ ਕਿ ਉਹ ਉਨ੍ਹਾਂ ਨਾਲ ਤੁਰਨ ਲਈ ਤਿਆਰ ਹੈ। ਪਹਿਲਵਾਨ ਨੇ ਢੀਂਡਸਾ ਨੂੰ ਵਿੱਤੀ ਮਦਦ ਦੀ ਪੇਸ਼ਕਸ਼ ਵੀ ਕੀਤੀ ਪਰ ਢੀਂਡਸਾ ਦਾ ਕਹਿਣਾ ਸੀ ਕਿ 23 ਫਰਵਰੀ ਦੀ ਰੈਲੀ ਲੰਘ ਗਈ ਹੈ।