ਚੰਡੀਗੜ੍ਹ, 27 ਫਰਵਰੀ (ਪੋਸਟ ਬਿਊਰੋ): ਡਾ. ਅੰਬੇਡਕਰ ਕਰਮਚਾਰੀ ਮਹਾਂਸੰਘ, ਪੰਜਾਬ ਦੇ ਸੂਬਾ ਪ੍ਰਧਾਨ ਅਤੇ ਪੰਜਾਬ ਦੇ ਨੌੌਜਵਾਨ ਦਲਿਤ ਆਗੂ ਡਾ. ਜਤਿੰਦਰ ਸਿੰਘ ਮੱਟੂ ਨੇ ਵਾਲਮੀਕਿ/ਮਜ੍ਹਬੀ ਸਿੱਖ ਸਮਾਜ ਨੂੰ ਮਿਲਦੇ 12.5 ਪ੍ਰਤੀਸ਼ਤ ਰਾਖਵੇਂਕਰਨ ਦੇ ਮਾਨਯੋਗ ਸੁਪਰੀਮ ਕੋਰਟ ਵਿਚ ਚੱਲ ਰਹੇ ਕੇਸ ਸਬੰਧੀ ਅੱਜ ਪੰਜਾਬ ਵਿਧਾਨ ਸਭਾ ਦੇ ਡਿਪਟੀ ਸਪੀਕਰ ਅਜਾਇਬ ਸਿੰਘ ਭੱਟੀ ਨਾਲ ਅਹਿਮ ਮੀਟਿੰਗ ਕੀਤੀ। ਇਸ ਮੌਕੇ ਦਲਿਤ ਆਗੂ ਡਾ. ਜਤਿੰਦਰ ਸਿੰਘ ਮੱਟੂ ਨੇ ਮੰਗ ਕੀਤੀ ਕਿ ਪੰਜਾਬ ਸਰਕਾਰ ਵਾਲਮੀਕਿ/ਮਜ੍ਹਬੀ ਸਿੱਖ ਸਮਾਜ ਦੇ ਰਾਖਵਾਂਕਰਨ ਨੂੰ ਚੈਲੰਜ ਕਰਨ ਵਾਲੀ ਪਾਈ ਗਈ ਪਟੀਸ਼ਨ ਵਿਚ ਇਸ ਭਾਈਚਾਰੇ ਦਾ ਅਦਾਲਤ ਵਿਚ ਮਜ਼ਬੂਤੀ ਨਾਲ ਪੱਖ ਰੱਖੇ। ਉਨ੍ਹਾਂ ਮੰਗ ਕੀਤੀ ਕਿ ਪੰਜਾਬ ਸਰਕਾਰ ਵਿਧਾਨ ਸਭਾ ਵਿਚ ਵਾਲਮੀਕਿ/ਮਜ੍ਹਬੀ ਸਿੱਖ ਸਮਾਜ ਦੇ ਰਾਖਵਾਂਕਰਨ ਨੂੰ ਸਥਾਈ ਬਣਾਉਣ ਲਈ ਨਵਾਂ ਐੱਸ.ਸੀ. ਐਕਟ ਬਿੱਲ ਪਾਸ ਕਰੇ ਤਾਂ ਜੋ ਇਸ ਸਮਾਜ ਦੇ ਰਾਖਵਾਂਕਰਨ ਨੂੰ ਸਥਾਈ ਕਰਦਿਆਂ ਹੂ-ਬ-ਹੂ ਬਹਾਲ ਰੱਖਿਆ ਜਾਵੇ। ਦਲਿਤ ਆਗੂ ਡਾ. ਜਤਿੰਦਰ ਸਿੰਘ ਮੱਟੂ ਨੇ ਕਿਹਾ ਕਿ ਪੰਜਾਬ ਦੇ ਸਮੁੱਚੇ ਵਾਲਮੀਕਿ/ਮਜ੍ਹਬੀ ਸਿੱਖ ਸਮਾਜ ਨੂੰ 1975 ਤੋਂ ਅਨੁਸੂਚਿਤ ਜਾਤੀਆਂ ਦੇ 50 ਪ੍ਰਤੀਸ਼ਤ ਰਾਖਵਾਂਕਰਨ ਵਿਚੋਂ 12.5 ਪ੍ਰਤੀਸ਼ਤ ਰਾਖਵਾਂਕਰਨ ਦਿੱਤਾ ਜਾ ਰਿਹਾ ਹੈ ਤਾਂ ਜੋ ਸਮਾਜਿਕ, ਆਰਥਿਕ, ਐਜੂਕੇਸ਼ਨਲ ਤੌਰ `ਤੇ ਅਨੁਸੂਚਿਤ ਜਾਤੀਆਂ ਦੀਆਂ ਬਾਕੀ ਕੈਟਾਗਿਰੀਆਂ ਨਾਲੋਂ ਪਛੜੇ ਇਸ ਸਮਾਜ ਨੂੰ ਖਾਸ ਮੌਕੇ ਦੇ ਕੇ ਪੜਾਈ ਲਿਖਾਈ ਅਤੇ ਨੌਕਰੀਆਂ ਵਿਚ ਬਾਕੀ ਐੱਸ.ਸੀ ਸ਼੍ਰੇਣੀਆਂ ਦੇ ਬਰਾਬਰ ਦੀ ਭਾਗੀਦਾਰੀ ਮਿਲ ਸਕੇ। ਅਸਲ `ਚ ਵਾਲਮੀਕਿ/ਮਜ੍ਹਬੀ ਸਿੱਖ ਸਮਾਜ ਐਜ਼ੁਕੇਸ਼ਨਲ ਤੌਰ `ਤੇ ਬਾਕੀ ਐਸ.ਸੀ ਸਮਾਜ ਤੋਂ ਕਾਫੀ ਪਛੜਿਆ ਹੋਇਆ ਹੈ ਜਿਸ ਲਈ ਇਸ ਸਮਾਜ ਨੂੰ ਵੱਖਰੇ ਤੌਰ `ਤੇ ਰਾਖਵਾਂਕਰਨ ਦੇਣ ਦੀ ਅਜੇ ਬਹੁਤ ਲੋੜ ਹੈ। ਡਾ. ਜਤਿੰਦਰ ਸਿੰਘ ਮੱਟੂ ਨੇ ਮੁੱਖ ਮੰਤਰੀ ਦੇ ਨਾਮ ਇਕ ਮੰਗ ਪੱਤਰ ਵਿਧਾਨ ਸਭਾ ਦੇ ਡਿਪਟੀ ਸਪੀਕਰ ਅਜਾਇਬ ਸਿੰਘ ਭੱਟੀ ਰਾਹੀਂ ਭੇਜਿਆ। ਇਸ ਮੌਕੇ ਉਨਾਂ ਨਾਲ ਵਾਲਮੀਕਿ ਸਮਾਜ ਦੀ ਧਾਰਮਿਕ ਜਥੇਬੰਦੀ ਆਦਿ ਧਰਮ ਸਮਾਜ ਆਧਸ ਦੇ ਰਾਸ਼ਟਰੀ ਮਹਾਂਮੰਤਰੀ ਵੀਰ ਲਵਲੀ ਅਛੂਤ ਵੀ ਹਾਜਰ ਸਨ। ਇਸ ਮੌਕੇ ਪੰਜਾਬ ਵਿਧਾਨ ਸਭਾ ਦੇ ਡਿਪਟੀ ਸਪੀਕਰ ਅਜਾਇਬ ਸਿੰਘ ਭੱਟੀ ਨੇ ਦਲਿਤ ਆਗੂ ਨੂੰ ਵਿਸ਼ਵਾਸ਼ ਦਿਵਾਉਂਦਆਂ ਕਿਹਾ ਕਿ ਉਹ ਜਲਦ ਹੀ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਸਾਰਾ ਮਾਮਲਾ ਧਿਆਨ `ਚ ਲਿਆਕੇ ਇਸ ਮਾਮਲੇ `ਤੇ ਅਗਲੀ ਕਾਰਵਾਈ ਲਈ ਗੱਲ ਕਰਨਗੇ।