ਸਕਾਰਬੌਰੋ, 26 ਫਰਵਰੀ (ਪੋਸਟ ਬਿਊਰੋ) : ਸਿਟੀਜ਼ਨਸਿ਼ਪ ਤੇ ਇਮੀਗ੍ਰੇਸ਼ਨ ਬਾਰੇ ਹਾਊਸ ਆਫ ਕਾਮਨਜ਼ ਦੀ ਸਟੈਂਡਿੰਗ ਕਮੇਟੀ ਦੇ ਕੰਮਕਾਜ ਦੀ ਅਗਵਾਈ ਹੁਣ ਸਲਮਾ ਜ਼ਾਹਿਦ ਵੱਲੋਂ ਕੀਤੀ ਜਾਵੇਗੀ। ਜ਼ਾਹਿਦ ਨੂੰ ਬੀਤੇ ਦਿਨੀਂ ਕਮੇਟੀ ਦੇ ਮੈਂਬਰਜ਼ ਵੱਲੋਂ ਚੇਅਰ ਨਿਯੁਕਤ ਕੀਤਾ ਗਿਆ ਸੀ।
ਕੈਨੇਡਾ ਦੀ ਲਿਬਰਲ ਪਾਰਟੀ ਦੀ ਮੈਂਬਰ ਜ਼ਾਹਿਦ ਪਹਿਲੀ ਵਾਰੀ 2015 ਵਿੱਚ ਸਕਾਰਬੌਰੋ ਸੈਂਟਰ ਲਈ ਮੈਂਬਰ ਪਾਰਲੀਆਮੈਂਟ ਚੁਣੀ ਗਈ ਸੀ। ਫਿਰ 2019 ਵਿੱਚ ਵੱਡੇ ਫਰਕ ਨਾਲ ਮੁੜ ਚੁਣੀ ਗਈ। ਉਹ 2016 ਤੋਂ ਹੀ ਇਮੀਗ੍ਰੇਸ਼ਨ ਕਮੇਟੀ ਦੀ ਮੈਂਬਰ ਹੈ। ਜ਼ਾਹਿਦ ਨੇ ਆਖਿਆ ਕਿ ਉਸ ਦੇ ਸਹਿਯੋਗੀਆਂ ਵੱਲੋਂ ਉਸ ਵਿੱਚ ਪ੍ਰਗਟਾਏ ਗਏ ਵਿਸ਼ਵਾਸ ਤੇ ਸਮਰਥਨ ਲਈ ਉਹ ਦਿਲੋਂ ਧੰਨਵਾਦੀ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ 43ਵੀਂ ਪਾਰਲੀਆਮੈਂਟ ਵਿੱਚ ਵੀ ਉਹ ਇਸ ਤਰ੍ਹਾਂ ਦਾ ਵਧੀਆ ਕੰਮ ਕਰਨਾ ਜਾਰੀ ਰੱਖੇਗੀ। ਉਨ੍ਹਾਂ ਅੱਗੇ ਆਖਿਆ ਕਿ ਉਨ੍ਹਾਂ ਨੂੰ ਪੂਰੀ ਆਸ ਹੈ ਕਿ ਉਹ ਵਧੀਆ ਅਧਿਐਨ ਕਰਨਾ ਜਾਰੀ ਰੱਖਣਗੇ ਤੇ ਅਜਿਹੀਆਂ ਰਿਪੋਰਟਾਂ ਲਿਆਉਣਗੇ ਜਿਨ੍ਹਾਂ ਨਾਲ ਕੈਨੇਡਾ ਦੇ ਇਮੀਗ੍ਰੇਸ਼ਨ ਤੇ ਰਫਿਊਜੀ ਸਿਸਟਮ ਦਾ ਸੁਧਾਰ ਹੋ ਸਕੇ।
ਪਾਰਲੀਆਮੈਂਟ ਦੀਆਂ ਸਟੈਂਡਿੰਗ ਕਮੇਟੀਆਂ ਦੀ ਭੂਮਿਕਾ ਸਰਕਾਰ ਦੇ ਖਰਚਿਆਂ ਦਾ ਮੁਲਾਂਕਣ ਕਰਨਾ, ਸਰਕਾਰ ਵੱਲੋਂ ਤਿਆਰ ਕਾਨੂੰਨਾਂ ਦੀ ਜਾਂਚ ਕਰਨਾ ਤੇ ਰਿਪੋਰਟਾਂ ਨਾਲ ਸਬੰਧਤ ਅਧਿਐਨ ਕਰਵਾਉਣਾ ਆਦਿ ਹੁੰਦੀ ਹੈ। ਪਿਛਲੀ ਪਾਰਲੀਆਮੈਂਟ ਵਿੱਚ ਕਮੇਟੀ ਨੇ ਕਈ ਅਹਿਮ ਮੱੁਦਿਆਂ ੳੱੁਤੇ ਆਪਣੀ ਰਿਪੋਰਟ ਦਿੱਤੀ, ਇਸ ਵਿੱਚ ਸਰਕਾਰ ਦੇ ਸੀਰੀਆ ਲਈ ਰਫਿਊਜੀ ਪ੍ਰੋਗਰਾਮ ਦਾ ਮੁਲਾਂਕਣ ਵੀ ਸੀ, ਪਰਿਵਾਰਾਂ ਨੂੰ ਮੁੜ ਇੱਕਠਾ ਕਰਨ ਸਬੰਧੀ ਪ੍ਰੋਗਰਾਮ ਦੀ ਜਾਂਚ ਵੀ ਸੀ ਅਤੇ ਇਮੀਗ੍ਰੇਸ਼ਨ ਪ੍ਰੋਗਰਾਮਾਂ ਲਈ ਕਲਾਇੰਟ ਸਰਵਿਸ ਡਲਿਵਰੀ ਸਬੰਧੀ ਸਿਫਾਰਸ਼ਾਂ ਵੀ ਸ਼ਾਮਲ ਸਨ।
ਜ਼ਾਹਿਦ ਨੇ ਆਖਿਆ ਕਿ ਉਨ੍ਹਾਂ ਨੂੰ ਪੂਰੀ ਆਸ ਹੈ ਕਿ ਉਨ੍ਹਾਂ ਦੀ ਕਮੇਟੀ ਸਾਰੇ ਕੈਨੇਡੀਅਨਾਂ ਦੀਆਂ ਲੋੜਾਂ ਨੂੰ ਪੂਰਾ ਕਰਨ ਵਾਲੇ ਇਮੀਗ੍ਰੇਸ਼ਨ ਪ੍ਰੋਗਰਾਮਾਂ ਨੂੰ ਯਕੀਨੀ ਬਣਾਉਣ ਤੇ ਸਾਡੇ ਕੈਨੇਡੀਅਨ ਪਰਿਵਾਰ ਵਿੱਚ ਸ਼ਾਮਲ ਹੋਣ ਦੀ ਚੋਣ ਕਰਨ ਵਾਲਿਆਂ ਲਈ ਉਸਾਰੂ ਭੂਮਿਕਾ ਨਿਭਾਅ ਸਕਦੀ ਹੈ।