ਮਿਸੀਸਾਗਾ, 26 ਫਰਵਰੀ (ਪੋਸਟ ਬਿਊਰੋ) : ਮਿਸੀਸਾਗਾ ਐਰਿਨ ਮਿਲਜ਼ ਤੋਂ ਐਮਪੀ ਇਕਰਾ ਖਾਲਿਦ ਨੂੰ ਸਰਬਸੰਮਤੀ ਨਾਲ ਜਸਟਿਸ ਐਂਡ ਹਿਊਮਨ ਰਾਈਟਜ਼ ਦੀ ਸਟੈਂਡਿੰਗ ਕਮੇਟੀ ਦਾ ਚੇਅਰ ਚੁਣ ਲਿਆ ਗਿਆ।
ਜਸਟਿਸ ਐਂਡ ਹਿਊਮਨ ਰਾਈਟਜ਼ ਦੀ ਸਟੈਂਡਿੰਗ ਕਮੇਟੀ ਕੈਨੇਡੀਅਨ ਨਿਆਂ ਪ੍ਰਣਾਲੀ ਨਾਲ ਸਬੰਧਤ ਮੁੱਦਿਆਂ ਨੂੰ ਦੇਖਦੀ ਹੈ ਤੇ ਦੇਸ਼ ਵਿੱਚ ਹੀ ਮਨੁੱਖੀ ਅਧਿਕਾਰਾਂ ਸਬੰਧੀ ਚੁਣੌਤੀਆਂ ਦਾ ਅਧਿਐਨ ਕਰਦੀ ਹੈ। 42ਵੀਂ ਪਾਰਲੀਆਮੈਂਟ ਵਿੱਚ ਕਮੇਟੀ ਵੱਲੋਂ ਕਾਨੂੰਨ ਦਾ ਮੁਲਾਂਕਣ ਕੀਤਾ ਗਿਆ, ਸੁਪਰੀਮ ਕੋਰਟ ਆਫ ਕੈਨੇਡਾ ਲਈ ਨਾਮਜਦ ਕੀਤੇ ਗਏ ਜੱਜਾਂ ਨੂੰ ਪਰਖਣ ਦੀ ਪ੍ਰਕਿਰਿਆ ਵਿੱਚ ਹਿੱਸਾ ਲਿਆ ਤੇ ਕਈ ਹੋਰਨਾਂ ਮੱੁਦਿਆਂ ਜਿਵੇਂ ਕਿ ਨਿਆਂ ਤੱਕ ਪਹੁੰਚ, ਆਨਲਾਈਨ ਨਫਰਤ ਤੇ ਮਨੱੁਖੀ ਸਮਗਲਿੰਗ ਆਦਿ ਬਾਰੇ ਅਧਿਐਨ ਕਰਵਾਏ।
ਇਸ ਮੌਕੇ ਐਮਪੀ ਖਾਲਿਦ ਨੇ ਆਖਿਆ ਕਿ ਉਨ੍ਹਾਂ ਨੂੰ ਜਸਟਿਸ ਕਮੇਟੀ ਦੇ ਚੇਅਰ ਵਜੋਂ ਸੇਵਾ ਕਰਨ ਦਾ ਜਿਹੜਾ ਮੌਕਾ ਮਿਲ ਰਿਹਾ ਹੈ ਇਹ ਉਨ੍ਹਾਂ ਲਈ ਬੜੇ ਸੁਭਾਗ ਵਾਲੀ ਗੱਲ ਹੈ। ਇਸ ਕਮੇਟੀ ਦਾ ਕੈਨੇਡੀਅਨਾਂ ਤੇ ਸਾਡੇ ਨਿਆਂ ਪ੍ਰਬੰਧ ਦੀ ਬਿਹਤਰੀ ਲਈ ਕੰਮ ਕਰਨ ਦਾ ਦਮਦਾਰ ਇਤਿਹਾਸ ਰਿਹਾ ਹੈ। ਉਨ੍ਹਾਂ ਆਖਿਆ ਕਿ ਕੰਮ ਦੇ ਇਸ ਵਿਰਸੇ ਨੂੰ ਅੱਗੇ ਤੋਰਨ ਲਈ ਉਹ ਸਾਰੀਆਂ ਪਾਰਟੀਆਂ ਦੇ ਮੈਂਬਰਾਂ ਨਾਲ ਰਲ ਕੇ ਕੰਮ ਕਰੇਗੀ।
ਐਮਪੀ ਇਕਰਾ ਖਾਲਿਦ ਵਿਦੇਸ਼ੀ ਮਾਮਲਿਆਂ ਬਾਰੇ ਸਟੈਂਡਿੰਗ ਕਮੇਟੀ ਦੀ ਇੰਟਰਨੈਸ਼ਨਲ ਹਿਊਮਨ ਰਾਈਟਸ ਸਬਕਮੇਟੀ ਦੀ ਮੈਂਬਰ, ਵੁਮਨਜ਼ ਕਾਕਸ ਦੀ ਚੇਅਰ ਅਤੇ ਨੈਸ਼ਨਲ ਕਾਕਸ ਐਗਜ਼ੈਕਟਿਵ ਟੀਮ ਦੀ ਮੈਂਬਰ ਵਜੋਂ ਆਪਣੀਆਂ ਜਿ਼ੰਮੇਵਾਰੀਆਂ ਤੋਂ ਇਲਾਵਾ ਇਹ ਨਵੀਂ ਭੂਮਿਕਾ ਨਿਭਾਵੇਗੀ।