ਟੋਕੀਓ, 29 ਅਕਤੂਬਰ (ਪੋਸਟ ਬਿਊਰੋ)- ਜਾਪਾਨ ਦੀ ਰਾਜਕੁਮਾਰੀ ਅਯਾਕੋ ਨੇ ਇੱਕ ਆਮ ਆਦਮੀ ਨਾਲ ਵਿਆਹ ਦੇ ਲਈ ਸ਼ਾਹੀ ਦਰਜਾ ਛੱਡ ਦਿੱਤਾ ਹੈ। 28 ਸਾਲਾ ਅਯਾਕੋ ਨੇ ਸੋਮਵਾਰ ਨੂੰ ਰਵਾਇਤੀ ਰੀਤ-ਰਿਵਾਜਾਂ ਨਾਲ ਕੇਈ ਮੋਰਿਆ (32) ਨਾਲ ਵਿਆਹ ਕਰਵਾ ਲਿਆ। ਮੋਰਿਓ ਸ਼ਿਪਿੰਗ ਕੰਪਨੀ ਨਿੱਪਨ ਯੂਸੇਨ ਵਿੱਚ ਕੰਮ ਕਰਦੇ ਹਨ।
ਵਰਨਣ ਯੋਗ ਹੈ ਕਿ ਅਯਾਕੋ ਜਾਪਾਨ ਦੇ ਮਹਾਰਾਜਾ ਅਕੀਹਿਤੋ ਦੇ ਸਵਰਗੀ ਚਚੇਰੇ ਭਰਾ ਪ੍ਰਿੰਸ ਤਾਕਾਮਾਡੋ ਦੀ ਤੀਜੀ ਬੇਟੀ ਹੈ। ਉਸ ਨੇ ਵਿਆਹ ਮੌਕੇ ਵਿਸ਼ੇਸ਼ ਰਵਾਇਤੀ ਪੋਸ਼ਾਕ ਕਿਮੋਨੋ ਅਤੇ ਮੋਰਿਆ ਨੇ ਕਾਲੇ ਰੰਗ ਦਾ ਟਕਸੀਡੋ ਸੂਟ ਪਾਇਆ ਸੀ। ਜਾਪਾਨ ਦੇ ਸ਼ਾਹੀ ਪਰਿਵਾਰ ਦੇ ਮੈਂਬਰ ਪਿਛਲੀਆਂ ਤਿੰਨ ਪੀੜ੍ਹੀਆਂ ਤੋਂ ਆਪਣੀ ਪਸੰਦ ਦਾ ਵਿਆਹ ਕਰ ਰਹੇ ਹਨ। ਮਹਾਰਾਜਾ ਅਕੀਹਿਤੋ ਪਹਿਲੇ ਪ੍ਰਿੰਸ ਸਨ, ਜਿਨ੍ਹਾਂ ਨੇ ਇੱਕ ਆਮ ਲੜਕੀ ਮਿਚਿਕੋ ਨਾਲ ਵਿਆਹ ਕੀਤਾ ਸੀ, ਜਿਹੜੀ ਬਾਅਦ `ਚ ਜਾਪਾਨ ਦੀ ਮਹਾਰਾਣੀ ਬਣੀ ਸੀ। ਇਸ ਦੇਸ਼ ਦੇ ਵਿਰਾਸਤ ਕਾਨੂੰਨ ਹੇਠ ਸ਼ਾਹੀ ਪਰਿਵਾਰ ਦੀਆਂ ਲੜਕੀਆਂ ਨੂੰ ਆਮ ਆਦਮੀ ਨਾਲ ਵਿਆਹ ਕਰਨ ਉੱਤੇ ਆਪਣਾ ਸ਼ਾਹੀ ਦਰਜਾ ਛੱਡਣਾ ਪੈਂਦਾ ਹੈ। ਸ਼ਾਹੀ ਪਰਿਵਾਰ ਦੇ ਘਟਦੇ ਮੈਂਬਰਾਂ ਨੂੰ ਵੇਖਦੇ ਹੋਏ ਸ਼ਾਹੀ ਪਰਿਵਾਰ ਵਿਰਾਸਤ ਕਾਨੂੰਨ `ਚ ਬਦਲਾਅ ਦੀ ਮੰਗ ਉੱਠ ਰਹੀ ਹੈ। ਇਸ ਵੇਲੇ ਸ਼ਾਹੀ ਪਰਿਵਾਰ ਵਿੱਚ ਚਾਰ ਮਰਦ ਵਾਰਸ ਹਨ। ਕਰਾਊਨ ਪਿ੍ਰੰਸ ਨਾਰੁਹਿਤੋ ਅਗਲੇ ਸਾਲ ਗੱਦੀ ਛੱਡ ਰਹੇ ਮਹਾਰਾਜਾ ਅਕੀਹਿਤੋ ਦੀ ਥਾਂ ਲੈਣਗੇ।