ਮੈਸਾਚਿਊਸੈਟਸ, 25 ਫਰਵਰੀ (ਪੋਸਟ ਬਿਊਰੋ) : ਡਰੱਗ ਨਿਰਮਾਤਾ ਮੌਡਰਨਾ ਨੇ ਕੋਰੋਨਾਵਾਇਰਸ ਦੇ ਸਬੰਧ ਵਿੱਚ ਸੰਭਾਵੀ ਵੈਕਸੀਨ ਦਾ ਪਹਿਲਾ ਬੈਚ ਜਾਂਚ ਲਈ ਸਰਕਾਰੀ ਰਿਸਰਚਰਜ਼ ਨੂੰ ਭੇਜ ਦਿੱਤਾ ਹੈ।
ਕੰਪਨੀ ਵੱਲੋਂ ਇਹ ਆਖਿਆ ਗਿਆ ਕਿ ਉਸ ਨੇ ਕੋਰੋਨਾਵਾਇਰਸ ਦੇ ਇਲਾਜ ਲਈ ਤਿਆਰ ਵੈਕਸੀਨ ਸਬੰਧੀ ਵਾਇਲਾਂ ਜਾਂਚ ਵਾਸਤੇ ਅਮਰੀਕਾ ਸਥਿਤ ਨੈਸ਼ਨਲ ਇੰਸਟੀਚਿਊਟ ਆਫ ਐਲਰਜੀ ਐਂਡ ਇਨਫੈਕਸ਼ੀਅਸ ਡਜ਼ੀਜਿ਼ਜ਼ ਨੂੰ ਭੇਜੀਆਂ ਹਨ। ਇਸ ਬਿਆਨ ਤੋਂ ਬਾਅਦ ਬਾਇਓਟੈਕ ਕੰਪਨੀ ਦੇ ਸ਼ੇਅਰਾਂ ਵਿੱਚ ਮੰਗਲਵਾਰ ਨੂੰ ਅਚਾਨਕ ਉਛਾਲ ਦਰਜ ਕੀਤਾ ਗਿਆ।
ਜਿ਼ਕਰਯੋਗ ਹੈ ਕਿ ਇਸ ਸਮੇਂ 80,000 ਤੋਂ ਵੀ ਵੱਧ ਲੋਕ ਵਿਸ਼ਵਵਿਆਪੀ ਪੱਧਰ ਉੱਤੇ ਕੋਰੋਨਾਵਾਇਰਸ ਵਰਗੇ ਵਾਇਰਲ ਤੋਂ ਪੀੜਤ ਹਨ। ਇਹ ਕੋਰੋਨਾਵਾਇਰਸ ਪਿਛਲੇ ਸਾਲ ਦੇ ਅੰਤ ਵਿੱਚ ਚੀਨ ਤੋਂ ਸ਼ੁਰੂ ਹੋਇਆ ਸੀ। ਹੁਣ ਤੱਕ 35 ਕੇਸ ਅਮਰੀਕਾ ਵਿੱਚ ਵੀ ਮਿਲ ਚੱੁਕੇ ਹਨ। ਇਕੱਲੇ ਚੀਨ ਵਿੱਚ ਹੀ ਇਸ ਵਾਇਰਸ ਕਾਰਨ ਹੁਣ ਤੱਕ 2600 ਲੋਕਾਂ ਦੀ ਮੌਤ ਹੋ ਚੱੁਕੀ ਹੈ। ਇੱਥੇ ਮਰਨ ਵਾਲਿਆਂ ਵਿੱਚ ਇੱਕ ਅਮਰੀਕੀ ਨਾਗਰਿਕ ਵੀ ਸੀ।
ਕੈਂਬ੍ਰਿਜ, ਮੈਸਾਚਿਊਸੈਟਸ ਸਥਿਤ ਮੌਡਰਨਾ ਇਨਕਾਰਪੋਰੇਸ਼ਨ ਦੇ ਸ਼ੇਅਰਾਂ ਵਿੱਚ 16 ਫੀ ਸਦੀ ਦੇ ਹਿਸਾਬ ਨਾਲ ਉਛਾਲ ਦਰਜ ਕੀਤਾ ਗਿਆ। ਪ੍ਰੀਮਾਰਕਿਟ ਟਰੇਡਿੰਗ ਵਿੱਚ ਮੌਡਰਨਾ ਦੇ ਸ਼ੇਅਰ ਦੀ ਕੀਮਤ 2.92 ਡਾਲਰ ਤੋਂ 21.51 ਡਾਲਰ ਤੱਕ ਪਹੁੰਚ ਗਈ।