ਕੈਂਸਰ ਨਾਲ ਜੰਗ ਲੜਨ ਵਾਲੀ ਤਾਹਿਰਾ ਕਸ਼ਯਪ ਸ਼ਾਰਟ ਫਿਲਮ ‘ਟੌਫੀ’ ਦਾ ਨਿਰਦੇਸ਼ਨ ਕਰ ਚੁੱਕੀ ਹੈ। ਅਭਿਨੇਤਾ ਆਯੁਸ਼ਮਾਨ ਖੁਰਾਣਾ ਦੀ ਪਤਨੀ ਤਾਹਿਰਾ ਨੇ ਸੱਤ ਸ਼ਾਰਟ ਫਿਲਮਾਂ ਨਾਲ ਬਣ ਰਹੀ ਫਿਲਮ ‘ਜ਼ਿੰਦਗੀ ਇਨ ਸ਼ਾਰਟ’ ਵਿੱਚ ‘ਪਿੰਨੀ’ ਨਾਂਅ ਦੀ ਕਹਾਣੀ ਦਾ ਨਿਰਦੇਸ਼ਨ ਕੀਤਾ ਹੈ। ਉਸ ਵਿੱਚ ਨੀਨਾ ਗੁਪਤਾ ਮੁੱਖ ਭੂਮਿਕਾ ਵਿੱਚ ਹੈ।
ਤਾਹਿਰਾ ਕਹਿੰਦੀ ਹੈ, ਮੇਰੀ ਕਹਾਣੀ ਮੇਰੀ ਸੱਸ ਤੋਂ ਪ੍ਰੇਰਿਤ ਹੈ। ਉਹ ਸਾਰਿਆਂ ਲਈ ਪਿੰਨੀਆਂ ਬਣਾਉਂਦੀ ਹੈ। ਉਹ ਪੂਰੇ ਪਰਵਾਰ ਨੂੰ ਜੋੜ ਕੇ ਰੱਖਦੀ ਹੈ। ਉਨ੍ਹਾਂ ਦੇ ਵਰਗਾ ਹਮੇਸ਼ਾ ਦੂਸਰਿਆਂ ਦੇ ਬਾਰੇ ਸੋਚਣ ਵਾਲਾ ਇਨਸਾਨ ਮੈਂ ਕਦੇ ਨਹੀਂ ਦੇਖਿਆ। ਉਨ੍ਹਾਂ ਦੇ ਚਿਹਰੇੇ 'ਤੇ ਹਮੇਸ਼ਾ ਮੁਸਕਾਨ ਰਹਿੰਦੀ ਹੈ। ਪੰਜਾਬੀ ਮਾਂ ਹੋਣ ਕਾਰਨ ਉਨ੍ਹਾਂ ਨੂੰ ਸਭ ਨੂੰ ਖਾਣਾ ਖਵਾਉਣਾ ਬੇਹੱਦ ਪਸੰਦ ਹੈ। ਸਾਨੂੰ ਵੀ ਪਿੰਨੀਆਂ ਬਣਾ ਕੇ ਭੇਜਦੀ ਹੈ। ਉਥੋਂ ਮੈਂ ਕਿਰਦਾਰ ਨੂੰ ਕਲਪਨਾ ਨਾਲ ਘੜਿਆ। ਕਿਰਦਾਰ ਦੀ ਮਿਠਾਸ ਮੇਰੀ ਸੱਸ ਤੋਂ ਆਉਂਦੀ ਹੈ। ਆਮ ਤੌਰ 'ਤੇ ਲੋਕ ਚਾਹੁੰਦੇ ਹਨ ਕਿ ਘਰੇਲੂ ਮਹਿਲਾ ਖਾਣਾ ਬਣਾਉਣ ਤੱਕ ਸੀਮਿਤ ਰਹਿਣ। ਉਨ੍ਹਾਂ ਤੋਂ ਉਮੀਦ ਕੀਤੀ ਜਾਂਦੀ ਹੈ ਕਿ ਉਹ ਸਿਰਫ ਸੀਰੀਅਲ ਹੀ ਦੇਖਣਗੀਆਂ।
ਮੇਰੀ ਕਹਾਣੀ ਰੂੜੀਵਾਦੀ ਸੋਚ ਨੂੰ ਤੋੜਨਾ ਚਾਹੁੰਦੀ ਹੈ। ਕਹਾਣੀ ਦੇ ਅਖੀਰ ਵਿੱਚ ਇੱਕ ਟਵਿਸਟ ਵੀ ਹੈ। ਕਹਾਣੀ ਸਿੰਪਲ ਹੈ, ਪਰ ਉਹ ਕਈ ਤਰ੍ਹਾਂ ਆਪਣੇ ਨਜ਼ਰੀਏ ਰੱਖਦੀ ਹੈ। ਚੰਗੀ ਗੱਲ ਇਹ ਹੈ ਕਿ ਹਿੰਦੀ ਸਿਨੇਮਾ ਵਿੱਚ ਸੱਠ ਦੇ ਪਾਰ ਦੀਆਂ ਮਹਿਲਾਵਾਂ ਦੀਆਂ ਕਹਾਣੀਆਂ ਨੂੰ ਵੀ ਬਣਾਇਆ ਜਾ ਰਿਹਾ ਹੈ। ਮੇਰੇ ਕੋਲ ਬਹੁਤ ਸਾਰੀਆਂ ਕਹਾਣੀਆਂ ਹਨ। ਕਹਾਣੀ ਹਰ ਉਮਰ ਵਰਗ ਲਈ ਹੁੰਦੀ ਹੈ। ਔਰਤ ਦੀ ਕਹਾਣੀ ਦੱਸਣ ਦਾ ਮਤਲਬ ਆਦਮੀ ਨੂੰ ਗਾਲ੍ਹ ਕੱਢਣਾ ਜਾਂ ਥੱਪੜ ਮਾਰਨਾ ਨਹੀਂ ਹੈ। ਸਾਡੇ ਕੋਲ ਇਸ ਤੋਂ ਜ਼ਿਆਦਾ ਦੱਸਣ ਦੇ ਲਈ ਬਹੁਤ ਸਾਰੀਆਂ ਚੀਜ਼ਾਂ ਹਨ।