ਬਠਿੰਡਾ, 23 ਫਰਵਰੀ, (ਪੋਸਟ ਬਿਊਰੋ)- ਪੰਜਾਬ ਦੇ ਬਠਿੰਡਾ ਦੇ ਵਸਨੀਕ ਵਿਦਿਆਰਥੀ ਪਦਮਜੀਤ ਸਿੰਘ ਮਹਿਤਾ ਨੇ ਯੂਨੀਵਰਸਿਟੀ ਆਫ ਵੈਸਟਮਿੰਸਟਰ ਸਟੂਡੈਂਟ ਯੂਨੀਅਨ (ਇੰਗਲੈਂਡ) ਦਾ ਪ੍ਰਧਾਨ ਬਣਨ ਦਾ ਮਾਣ ਹਾਸਲ ਕੀਤਾ ਹੈ। ਇਹ ਮਾਣ ਹਾਸਲ ਕਰਨ ਵਾਲੇ ਉਹ ਪਹਿਲੇ ਭਾਰਤੀ ਹਨ, ਜਿਹੜੇ ਯੂਨੀਵਰਸਿਟੀ ਆਫ ਵੈਸਟ ਮਿੰਸਟਰ ਵਿਚਲੀ ਸਟੂਡੈਂਟਸ ਯੂਨੀਅਨ ਦੇ ਪ੍ਰਧਾਨ ਚੁਣੇ ਗਏ ਹਨ।
ਪਦਮਜੀਤ ਸਿੰਘ ਮਹਿਤਾ ਦੇ ਪਿਤਾ ਅਮਰਜੀਤ ਸਿੰਘ ਮਹਿਤਾ, ਜਿਹੜੇ ਬਠਿੰਡਾ ਦੇ ਮਸਹੂਰ ਬਿਜਨੈਸਮੈਨ ਅਤੇ ਪ੍ਰਮੁੱਖ ਸਮਾਜ ਸੇਵੀ ਹਨ, ਨੇ ਦੱਸਿਆ ਕਿ ਉਨ੍ਹਾਂ ਦਾ ਬੇਟਾ ਪਦਮਜੀਤ ਸਾਲ 2017 ਵਿਚ ਇੰਗਲੈਂਡ ਵਿੱਚ ਪੜ੍ਹਨ ਗਿਆ ਤੇ ਯੂਨੀਵਰਸਿਟੀ ਆਫ ਵੈਸਟ ਮਿੰਸਟਰ ਵਿੱਚ ਬੀ ਬੀ ਏ ਮਾਰਕੀਟਿੰਗ ਦੀ ਡਿਗਰੀ ਕਰ ਰਿਹਾ ਹੈ। ਉਹ ਯੂਨੀਵਰਸਿਟੀ ਆਫ਼ ਵੈਸਟ ਮਿੰਸਟਰ ਸਟੂਡੈਂਟਸ ਯੂਨੀਅਨ (ਯੂ ਡਬਲਿਊ ਐੱਸ ਯੂ) ਦਾ ਪਹਿਲਾ ਭਾਰਤੀ ਪ੍ਰਧਾਨ ਬਣਿਆ ਹੈ। ਲਗਭਗ 180 ਸਾਲ ਪੁਰਾਣੀ ਯੂਨੀਵਰਸਿਟੀ ਆਫ ਵੈਸਟ ਮਿੰਸਟਰ ਸਟੂਡੈਂਟ ਯੂਨੀਅਨ ਵਿਚ ਹਰ ਵਾਰ ਵੋਟਾਂ ਨਾਲ ਪ੍ਰਧਾਨ ਚੁਣਿਆ ਜਾਂਦਾ ਹੈ, ਜਿਸ ਲਈ ਇਸ ਪਈਆਂ ਵੋਟਾਂ ਦੇ ਨਤੀਜੇ 21 ਫਰਵਰੀ ਨੂੰ ਆਏ ਹਨ। ਕੁੱਲ ਪੰਜ ਉਮੀਦਵਾਰ ਮੈਦਾਨ ਵਿਚ ਸਨ। ਇਸ ਯੂਨੀਵਰਸਿਟੀ ਵਿਚ ਲਗਭਗ 22500 ਵਿਦਿਆਰਥੀ ਪੜ੍ਹਦੇ ਹਨ।