ਨਵੀਂ ਦਿੱਲੀ, 20 ਫਰਵਰੀ (ਪੋਸਟ ਬਿਊਰੋ)- ਇਤਰਾਜਾਂ ਤੇ ਵਿਵਾਦਾਂ ਦੇ ਬਾਵਜੂਦ ਕੇਂਦਰ ਸਰਕਾਰ ਨੇ ਰਾਸ਼ਟਰਪਤੀ ਦੇ ਸਕੱਤਰ ਸੰਜੇ ਕੋਠਾਰੀ ਦੀ ਅਗਲੇ ਕੇਂਦਰੀ ਵਿਜੀਲੈਂਸ ਕਮਿਸ਼ਨਰ (ਸੀ ਵੀ ਸੀ) ਵਜੋਂ ਨਿਯੁਕਤੀ ਪ੍ਰਵਾਨ ਕਰ ਲਈ ਹੈ। ਪ੍ਰਧਾਨ ਮੰੰਤਰੀ ਨਰਿੰਦਰ ਮੋਦੀ ਦੀ ਰਿਹਾਇਸ਼ 'ਤੇ ਕੱਲ੍ਹ ਸ਼ਾਮ ਹੋਈ ਬੈਠਕ ਵਿੱਚ ਕੋਠਾਰੀ ਦੇ ਨਾਂਅ 'ਤੇ ਫੈਸਲਾ ਹੋਇਆ। ਇਸ ਮੌਕੇ ਬਿਮਲ ਜੁਲਕਾ ਨੂੰ ਅਗਲੇ ਮੁੱਖ ਸੂਚਨਾ ਕਮਿਸ਼ਨਰ (ਸੀ ਆਈ ਸੀ) ਚੁਣਿਆ ਗਿਆ।
ਇਸ ਬੈਠਕ 'ਚ ਆਂਧਰਾ ਬੈਂਕ ਦੇ ਸਾਬਕਾ ਸੀ ਈ ਓ ਸੁਰੇਸ਼ ਐਨ ਪਟੇਲ ਦੀ ਨਵੇਂ ਵਿਜੀਲੈਂਸ ਕਮਿਸ਼ਨਰ ਵਜੋਂ ਅਤੇ ਪੰਜਾਬ ਪਬਲਿਕ ਸਰਵਿਸ ਕਮਿਸ਼ਨ ਦੀ ਸਾਬਕਾ ਮੈਂਬਰ ਅਨੀਤਾ ਪਾਂਡੋਵ ਨੂੰ ਨਵੀਂ ਸੂਚਨਾ ਕਮਿਸ਼ਨਰ ਨਿਯੁਕਤ ਕਰਨ ਦਾ ਫ਼ੈਸਲਾ ਵੀ ਲਿਆ ਗਿਆ। ਮੁੱਖ ਵਿਜੀਲੈਂਸ ਕਮਿਸ਼ਨਰ ਨੂੰ ਚੁਣਨ ਦੇ ਅਮਲ ਮੁਤਾਬਕ ਇਸ ਲਈ ਕੈਬਨਿਟ ਸਕੱਤਰ ਦੀ ਅਗਵਾਈ ਹੇਠ ਖੋਜ ਕਮੇਟੀ ਬਣਾਈ ਜਾਂਦੀ ਹੈ। ਇਸ ਕਮੇਟੀ ਵੱਲੋਂ ਚੁਣੇ ਨਾਵਾਂ ਨੂੰ ਇੱਕ ਉਚ ਪਧੱਰੀ ਕਮੇਟੀ ਨੂੰ ਭੇਜਿਆ ਜਾਂਦਾ ਹੈ, ਜਿਸ 'ਚ ਪ੍ਰਧਾਨ ਮੰਤਰੀ, ਗ੍ਰਹਿ ਮੰਤਰੀ ਤੋਂ ਇਲਾਵਾ ਲੋਕ ਸਭਾ 'ਚ ਸਭ ਤੋਂ ਵੱਡੀ ਪਾਰਟੀ ਦੇ ਨੇਤਾ ਸ਼ਾਮਲ ਹੁੰਦੇ ਹਨ। ਇਨ੍ਹਾਂ ਵੱਲੋਂ ਤੈਅਸ਼ੁਦਾ ਨਾਵਾਂ 'ਤੇ ਫ਼ੈਸਲਾ ਲਿਆ ਜਾਂਦਾ ਹੈ।
ਕਾਂਗਰਸ ਪਾਰਟੀ ਨੇ ਸੰਜੇ ਕੋਠਾਰੀ ਦੀ ਚੋਣ ਨੂੰ ‘ਗ਼ੈਰ-ਕਾਨੂੰਨੀ' ਅਤੇ ‘ਗੈਰ ਸੰਵਿਧਾਨਿਕ' ਕਰਾਰ ਦਿੰਦਿਆਂ ਕਿਹਾ ਕਿ ਸਰਕਾਰ ਅਜਿਹਾ ਕੀ ਛੁਪਾਉਣਾ ਚਾਹੁੰਦੀ ਹੈ ਕਿ ਇਸ ਅਹੁਦੇ 'ਤੇ ਆਪਣਾ ਪੰਸਦੀਦਾ ਸ਼ਖਸ ਬਿਠਾਉਣਾ ਚਾਹੁੰਦੀ ਹੈ। ਕਾਂਗਰਸ ਦੇ ਬੁਲਾਰੇ ਮਨੀਸ਼ ਤਿਵਾੜੀ ਨੇ ਭਿ੍ਰਸ਼ਟਾਚਾਰ ਰੋਕਣ ਲਈ ਬਣਾਈ ਗਈ ਇਸ ਮੁੱਖ ਸੰਸਥਾ ਦੇ ਮੁੱਖ ਅਧਿਕਾਰੀ ਦੀ ਇਸ ਚੋਣ 'ਤੇ ਸਵਾਲ ਉਠਾਉਂਦਿਆਂ ਕਿਹਾ ਕਿ ਸਰਕਾਰ ਤਾਨਾਸ਼ਾਹੀ ਢੰਗ ਨਾਲ ਨਿਯੁਕਤੀ ਕਰ ਰਹੀ ਹੈ।