ਜਲੰਧਰ, 19 ਫਰਵਰੀ (ਪੋਸਟ ਬਿਊਰੋ)- ਇੰਪਰੂਵਮੈਂਟ ਟਰੱਸਟ ਦੇ ਨਵੇਂ ਈ ਓ ਦੇ ਚਾਰਜ ਸੰਭਾਲਦੇ ਸਾਰ ਗ੍ਰਿਫਤਾਰੀ ਵਾਰੰਟ ਨਾਲ ਸਵਾਗਤ ਹੋ ਗਿਆ ਹੈ। ਜ਼ਿਲਾ ਕੰਜ਼ਿਊਮਰ ਫੋਰਮ ਨੇ ਟਰੱਸਟ ਦੇ ਈ ਓ ਦੇ ਖਿਲਾਫ ਗ੍ਰਿਫਤਾਰੀ ਵਾਰੰਟ ਜਾਰੀ ਕੀਤੇ ਅਤੇ ਉਨ੍ਹਾਂ ਨੂੰ ਹੁਕਮ ਦਿੱਤਾ ਹੈ ਕਿ ਉਹ 18 ਮਾਰਚ ਤੋਂ ਪਹਿਲਾਂ ਸੂਰਿਆ ਇਨਕਲੇਵ ਦੇ ਅਲਾਟੀ ਜਸਪ੍ਰੀਤ ਸਿੰਘ ਵਾਸੀ ਸਰਸਵਤੀ ਵਿਹਾਰ ਨੂੰ ਉਨ੍ਹਾਂ ਦਾ ਨਾਨ ਕੰਸਟ੍ਰਕਸ਼ਨ ਦਾ ਕਰੀਬ ਚਾਰ ਲੱਖ ਰੁਪਏ ਤੁਰੰਤ ਮੋੜਨ।
ਬੀਬੀ ਭਾਨੀ ਕੰਪਲੈਕਸ ਵੈਲਫੇਅਰ ਸੋਸਾਇਟੀ ਦੇ ਪ੍ਰਧਾਨ ਦਰਸ਼ਨ ਸਿੰਘ ਆਹੂਜਾ ਨੇ ਦੱਸਿਆ ਕਿ ਸਰਸਵਤੀ ਵਿਹਾਰ ਦੇ ਵਸਨੀਕ ਜਸਪ੍ਰੀਤ ਸਿੰਘ ਨੂੰ 26 ਫਰਵਰੀ 2004 ਨੂੰ ਸੂਰਿਆ ਇਨਕਲੇਵ ਵਿੱਚ 675 ਏ ਪਲਾਟ ਅਲਾਟ ਹੋਇਆ ਸੀ। ਉਨ੍ਹਾਂ ਨੇ ਟਰੱਸਟ ਦੀਆਂ ਸ਼ਰਤਾਂ ਮੁਤਾਬਕ ਪੂਰਾ ਪੈਸਾ ਪਲਾਟ ਦਾ ਜਮ੍ਹਾ ਕਰਵਾ ਦਿੱਤਾ। 11 ਸਾਲ ਤੱਕ ਉਸ ਨੂੰ ਪਲਾਟ ਦਾ ਕਬਜ਼ਾ ਨਹੀਂ ਮਿਲਿਆ। ਇਸ ਦੌਰਾਨ ਉਸ ਨੇ ਟਰੱਸਟ ਅਫਸਰਾਂ ਨੂੰ ਉਨ੍ਹਾਂ ਦਾ ਬਣਦਾ ਪੈਸਾ ਜਮ੍ਹਾ ਕਰਵਾ ਦਿੱਤਾ ਸੀ। ਟਰੱਸਟ ਨੇ ਉਨ੍ਹਾਂ ਤੋਂ ਨਾਨ ਕੰਸਟ੍ਰਕਸ਼ਨ ਚਾਰਜਿਜ ਦੇ ਨਾਂਅ 'ਤੇ 82500 ਰੁਪਏ ਜਮ੍ਹਾ ਕਰਵਾ ਲਏ ਸਨ, ਜਦ ਕਿ ਜਸਪ੍ਰੀਤ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਪਲਾਟ ਦਾ ਕਬਜ਼ਾ ਹੀ ਨਹੀਂ ਮਿਲਿਆ, ਜਿਸ ਕਰ ਕੇ ਆਪਣੇ ਪਲਾਟ 'ਤੇ ਤਿੰਨ ਸਾਲਾਂ ਵਿੱਚ ਕੰਸਟ੍ਰਕਸ਼ਨ ਨਹੀਂ ਕਰ ਸਕਿਆ। ਪਲਾਟ ਦਾ ਕਬਜ਼ਾ ਮਿਲਦਾ ਤਾਂ ਉਹ ਕੰਸਟ੍ਰਕਸ਼ਨ ਕਰਦਾ। ਫਿਰ ਵੀ ਉਸ ਨੇ ਟਰੱਸਟ ਨੂੰ ਨਾਨ ਕੰਸਟ੍ਰਕਸ਼ਨ ਦਾ ਪੈਸਾ ਜਮ੍ਹਾ ਕਰਵਾ ਦਿੱਤਾ, ਤਦ ਵੀ ਉਸ ਨੂੰ ਪਲਾਟ ਦਾ ਕਬਜ਼ਾ ਨਹੀਂ ਮਿਲਿਆ।
ਇਸ ਤੋਂ ਪਰੇਸ਼ਾਨ ਹੋ ਕੇ ਉਨ੍ਹਾਂ ਨੇ ਛੇ ਦਸੰਬਰ 2016 ਨੂੰ ਜ਼ਿਲਾ ਕੰਜ਼ਿਊਮਰ ਫੋਰਮ ਵਿੱਚ ਕੇਸ ਕੀਤਾ। ਫੋਰਮ ਨੇ ਅੱਠ ਅਗਸਤ 2018 ਨੂੰ ਉਸ ਦੇ ਹੱਕ ਵਿੱਚ ਫੈਸਲਾ ਦੇ ਕੇ ਟਰੱਸਟ ਨੂੰ ਹੁਕਮ ਦਿੱਤਾ ਕਿ ਅਲਾਟੀ ਨੂੰ ਤੁਰੰਤ ਉਸ ਦਾ ਨਾਨ ਕੰਸਟ੍ਰਕਸ਼ਨ ਦਾ ਪੈਸਾ 82500 ਰੁਪਏ ਮੋੜਿਆ ਜਾਵੇ ਅਤੇ 12 ਫੀਸਦੀ ਵਿਆਜ ਦਿੱਤਾ ਜਾਏ। 50 ਹਜ਼ਾਰ ਰੁਪਏ ਜੁਰਮਾਨਾ ਲਾਇਆ ਅਤੇ 10 ਹਜ਼ਾਰ ਰੁਪਏ ਕਾਨੂੰਨੀ ਖਰਚ ਵੀ ਦੇਣ ਲਈ ਕਿਹਾ ਤੇ ਹੁਕਮ ਦਿੱਤਾ ਕਿ ਇੱਕ ਮਹੀਨੇ ਵਿੱਚ ਕਬਜ਼ਾ ਨਹੀਂ ਦਿੰਦੇ ਅਤੇ ਪੈਸਾ ਜਮ੍ਹਾ ਨਹੀਂ ਕਰਵਾਉਂਦੇ ਤਾਂ ਟਰੱਸਟ ਨੂੰ ਇੱਕ ਲੱਖ ਰੁਪਏ ਹੋਰ ਜੁਰਮਾਨਾ ਭਰਨਾ ਹੋਵੇਗਾ। ਟਰੱਸਟ ਨੇ ਉਸ ਦੇ ਬਾਵਜੂਦ ਪੈਸਾ ਨਹੀਂ ਜਮ੍ਹਾ ਕਰਾਇਆ। ਅਲਾਟੀ ਨੇ ਇਸ ਪੈਸੇ ਤੇ ਕਬਜ਼ੇ ਬਾਰੇ ਦੋਬਾਰਾ ਕੇਸ ਕੀਤਾ, ਜਿਸ ਵਿੱਚ ਫੋਰਮ ਨੇ 12 ਫਰਵਰੀ 2020 ਨੂੰ ਈ ਓ ਦੇ ਗ੍ਰਿਫਤਾਰੀ ਵਾਰੰਟ ਜਾਰੀ ਕੀਤੇ ਹਨ। ਨਾਲ ਹੀ 18 ਮਾਰਚ ਤੱਕ ਸਾਰਾ ਪੈਸਾ ਦੇਣ ਦੇ ਲਈ ਹੁਕਮ ਦਿੱਤਾ ਹੈ।