ਨਵੀਂ ਦਿੱਲੀ, 19 ਫਰਵਰੀ (ਪੋਸਟ ਬਿਊਰੋ)- ਸੰਸਾਰ ਵਿੱਚ ਅੱਤਵਾਦ ਲਈ ਫੰਡ ਦੇਣ ਦੇ ਅਮਲ 'ਤੇ ਨਜ਼ਰ ਰੱਖਣ ਵਾਲੀ ਅਥਾਰਟੀ ਐੱਫ ਏ ਟੀ ਐੱਫ ਦੇ ਸਬ ਗਰੁੱਪ ਨੇ ਸਿਫਾਰਸ਼ ਕੀਤੀ ਹੈ ਕਿ ਅੱਤਵਾਦ ਲਈ ਫੰਡ ਦੇਣ ਦੇ ਅਮਲ 'ਤੇ ਕਾਬੂ ਪਾਉਣ ਵਿੱਚ ਨਾਕਾਮੀ ਕਾਰਨ ਪਾਕਿਸਤਾਨ ਨੂੰ ਸ਼ੱਕੀ ਸੂਚੀ (ਗ੍ਰੇ ਲਿਸਟ) ਵਿੱਚ ਹੀ ਰੱਖਿਆ ਜਾਏ।
ਜਾਣਕਾਰ ਸੂਤਰਾਂ ਮੁਤਾਬਕ ਇਸ ਸੰਬੰਧ ਵਿੱਚ ਆਖਰੀ ਫੈਸਲਾ 21 ਫਰਵਰੀ ਨੂੰ ਹੋਵੇਗਾ। ਇਹ ਫੈਸਲਾ ਐੱਫ ਏ ਟੀ ਐੱਫ ਦੇ ਅੰਤਰਰਾਸ਼ਟਰੀ ਤਾਲਮੇਲ ਸਮੀਖਿਆ ਗਰੁੱਪ ਦੀ ਬੈਠਕ ਵਿੱਚ ਕੀਤਾ ਗਿਆ, ਜਿਹੜੀ ਪੈਰਿਸ ਵਿੱਚ ਮੁਕੰਮਲ ਇਜਲਾਸ ਦੌਰਾਨ ਹੋਈ ਹੈ। ਇਨ੍ਹਾਂ ਸੂਤਰਾਂ ਨੇ ਦੱਸਿਆ, ਐੱਫ ਏ ਟੀ ਐੱਫ ਦੇ ਸਬ ਗਰੁੱਪ ਦੀ ਬੈਠਕ ਨੇ ਪਾਕਿਸਤਾਨ ਨੂੰ ਗ੍ਰੇ ਲਿਸਟ ਵਿੱਚ ਹੀ ਰੱਖਣ ਦੀ ਸਿਫਾਰਸ਼ ਕੀਤੀ ਹੈ। ਬੈਠਕ ਪਾਕਿਸਤਾਨ ਵਿੱਚ ਅੱਤਵਾਦ ਵਿਰੋਧੀ ਅਦਾਲਤ ਤੋਂ 2008 ਦੇ ਮੁੰਬਈ ਹਮਲੇ ਦੇ ਸਾਜ਼ਿਸ਼ੀ ਅਤੇ ਲਸ਼ਕਰ ਦੇ ਬਾਨੀ ਹਾਫਿਜ਼ ਸਈਅਦ ਨੂੰ ਅੱਤਵਾਦ ਫੰਡ ਦੇ ਦੋ ਮਾਮਲਿਆਂ ਵਿੱਚ 12 ਸਾਲ ਦੀ ਸਜ਼ਾ ਸੁਣਾਏ ਜਾਣ ਦੇ ਇੱਕ ਹਫਤੇ ਬਾਅਦ ਹੋ ਰਹੀ ਸੀ। ਪਾਕਿਸਤਾਨੀ ਅਦਾਲਤ ਦਾ ਫੈਸਲਾ ਐੱਫ ਏ ਟੀ ਐੱਫ ਅਤੇ ਪੱਛਮੀ ਮੁਲਕਾਂ ਨੂੰ ਖੁਸ਼ ਕਰਨ ਲਈ ਕੀਤਾ ਗਿਆ ਜਾਪਦਾ ਸੀ ਤਾਂ ਕਿ ਉਹ ਇਸ ਸੂਚੀ ਵਿੱਚੋਂ ਬਾਹਰ ਨਿਕਲ ਸਕੇ। ਪਾਕਿਸਤਾਨ ਨੂੰ ਇਸ ਸੂਚੀ ਵਿੱਚੋਂ ਨਿਕਲਣ ਤੇ ਵ੍ਹਾਈਟ ਲਿਸਟ ਵਿੱਚ ਸ਼ਾਮਲ ਹੋਣ ਲਈ 39 ਵਿੱਚੋਂ 12 ਵੋਟਾਂ ਚਾਹੀਦੀਆਂ ਹਨ। ਬਲੈਕ ਲਿਸਟ ਤੋਂ ਬਚਣ ਲਈ ਉਸ ਨੂੰ ਤਿੰਨ ਦੇਸ਼ਾਂ ਦੀ ਹਮਾਇਤ ਦੀ ਲੋੜ ਹੈ। ਭਾਰਤ ਨੇ ਐੱਫ ਏ ਟੀ ਐੱਫ ਨੂੰ ਪਾਕਿਸਤਾਨ ਦੇ ਵਿਰੁੱਧ ਸਖਤ ਕਾਰਵਾਈ ਲਈ ਕਿਹਾ ਹੈ।