ਹਨਾਊ, ਜਰਮਨੀ, 19 ਫਰਵਰੀ (ਪੋਸਟ ਬਿਊਰੋ) : ਬੱੁਧਵਾਰ ਸ਼ਾਮ ਨੂੰ ਜਰਮਨੀ ਦੀ ਹਨਾਊ ਸਿਟੀ ਵਿੱਚ ਵਾਪਰੇ ਗੋਲੀਕਾਂਡ ਵਿੱਚ ਅੱਠ ਲੋਕ ਮਾਰੇ ਗਏ। ਇਹ ਜਾਣਕਾਰੀ ਅਧਿਕਾਰੀਆਂ ਵੱਲੋਂ ਦਿੱਤੀ ਗਈ। ਇਸ ਦੌਰਾਨ ਦੋ ਹੁੱਕਾ ਲਾਊਂਜਿਜ਼ ਨੂੰ ਨਿਸ਼ਾਨਾ ਬਣਾਇਆ ਗਿਆ।
ਰਾਤੀਂ 10:00 ਵਜੇ ਵਾਪਰੀ ਇਸ ਘਟਨਾ ਤੋਂ ਤਿੰਨ ਘੰਟੇ ਬਾਅਦ ਵੀਰਵਾਰ ਤੜ੍ਹਕੇ ਪੁਲਿਸ ਇਸ ਘਟਨਾ ਨੂੰ ਅੰਜਾਮ ਦੇਣ ਵਾਲਿਆਂ ਦੀ ਭਾਲ ਕਰ ਰਹੀ ਸੀ। ਪੁਲਿਸ ਵੱਲੋਂ ਦਿੱਤੇ ਗਏ ਬਿਆਨ ਵਿੱਚ ਮ੍ਰਿਤਕਾਂ ਬਾਰੇ ਕੋਈ ਖਾਸ ਜਾਣਕਾਰੀ ਨਹੀਂ ਸੀ। ਇਸ ਵਿੱਚ ਆਖਿਆ ਗਿਆ ਕਿ ਇਸ ਵਾਰਦਾਤ ਨੂੰ ਅੰਜਾਮ ਕਿਉਂ ਦਿੱਤਾ ਗਿਆ ਇਸ ਦਾ ਮੰਤਵ ਵੀ ਅਜੇ ਸਪਸ਼ਟ ਨਹੀਂ ਹੋਇਆ ਹੈ।
ਪੁਲਿਸ ਨੇ ਦੱਸਿਆ ਕਿ ਪਹਿਲੀ ਸ਼ੂਟਿੰਗ ਤੋਂ ਬਾਅਦ ਮੌਕੇ ਤੋਂ ਇੱਕ ਗੂੜ੍ਹੇ ਰੰਗ ਦੀ ਗੱਡੀ ਨੂੰ ਦੂਜੀ ਥਾਂ ਜਾਂਦਿਆਂ ਵੇਖਿਆ ਗਿਆ ਤੇ ਫਿਰ ਦੂਜੀ ਥਾਂ ਤੋਂ ਵੀ ਗੋਲੀਆਂ ਚੱਲਣ ਦਾ ਪਤਾ ਲੱਗਿਆ। ਰੀਜਨਲ ਪਬਲਿਕ ਬ੍ਰੌਡਕਾਸਟਰ ਹੈਸਿਸ਼ਰ ਰੰਡਫੰਕ ਨੇ ਆਖਿਆ ਕਿ ਇਹ ਘਟਨਾ ਸਿਟੀ ਦੇ ਐਨ ਵਿਚਕਾਰ ਸਥਿਤ ਹੁੱਕਾ ਲਾਊਂਜ ਵਿੱਚ ਵਾਪਰੀ। ਇਹ ਵੀ ਦੱਸਿਆ ਗਿਆ ਕਿ ਚਸ਼ਮਦੀਦਾਂ ਨੇ ਅੱਠ ਤੋਂ ਨੌ ਗੋਲੀਆਂ ਚੱਲਣ ਦੀ ਆਵਾਜ਼ ਸੁਣੀ ਤੇ ਇੱਕ ਵਿਅਕਤੀ ਨੂੰ ਜ਼ਮੀਨ ਉੱਤੇ ਡਿੱਗਿਆ ਵੇਖਿਆ। ਫਿਰ ਮਸ਼ਕੂਕ ਦੂਜੇ ਹੁੱਕਾ ਬਾਰ ਚਲੇ ਗਏ ਤੇ ਫਿਰ ਉੱਥੇ ਵੀ ਗੋਲੀਆਂ ਚਲਾਈਆਂ।