ਟੋਰਾਂਟੋ, 18 ਫਰਵਰੀ (ਪੋਸਟ ਬਿਊਰੋ) : ਜਾਪਾਨ ਦੇ ਤੱਟ ਉੱਤੇ ਅਲੱਗ ਥਲੱਗ ਕਰਕੇ ਖੜ੍ਹੇ ਕੀਤੇ ਗਏ ਬੇੜੇ ਵਿੱਚ ਸਵਾਰ ਕੈਨੇਡੀਅਨਾਂ ਵਿੱਚੋਂ ਹੋਰਨਾਂ ਨੂੰ ਕੋਰੋਨਾਵਾਇਰਸ ਹੋਣ ਦੀ ਪੁਸ਼ਟੀ ਹੋਈ ਹੈ। ਹੁਣ ਇਸ ਬੇੜੇ ਵਿੱਚ ਸਵਾਰ ਕੈਨੇਡੀਅਨਾਂ ਵਿੱਚੋਂ 43 ਨੂੰ ਕੋਰੋਨਾਵਾਇਰਸ ਦੱਸਿਆ ਜਾ ਰਿਹਾ ਹੈ। ਕੈਨੇਡਾ ਸਰਕਾਰ ਵੱਲੋਂ ਇਸ ਬੇੜੇ ਵਿੱਚ ਸਵਾਰ ਯਾਤਰੀਆਂ ਨੂੰ ਦੱਸਿਆ ਗਿਆ ਹੈ ਕਿ ਉਨ੍ਹਾਂ ਨੂੰ ਇਸ ਬੇੜੇ ਵਿੱਚੋਂ ਕੱਢਣ ਲਈ ਵੀਰਵਾਰ ਨੂੰ ਜਹਾਜ਼ ਟੋਕੀਓ ਤੋਂ ਰਵਾਨਾ ਹੋਵੇਗਾ।
ਮੰਗਲਵਾਰ ਨੂੰ ਗਲੋਬਲ ਅਫੇਅਰਜ਼ ਨੇ ਆਖਿਆ ਕਿ ਇਸ ਬੇੜੇ ਡਾਇਮੰਡ ਪ੍ਰਿੰਸੈੱਸ ਵਿੱਚ ਸਵਾਰ 256 ਕੈਨੇਡੀਅਨ ਯਾਤਰੀਆਂ ਵਿੱਚੋਂ 43 ਕੋਰੋਨਾਵਾਇਰਸ ਲਈ ਪਾਜ਼ੀਟਿਵ ਆਏ ਹਨ। 24 ਘੰਟੇ ਪਹਿਲਾਂ ਦੱਸੇ ਗਏ ਅੰਕੜਿਆਂ ਨਾਲੋਂ ਇਹ ਗਿਣਤੀ ਦੁੱਗਣੀ ਪਾਈ ਗਈ। ਇਸ ਤੋਂ ਪਹਿਲਾਂ 15 ਕੈਨੇਡੀਅਨਾਂ ਨੂੰ ਹੀ ਕੋਰੋਨਾਵਾਇਰਸ ਦੀ ਪੁਸ਼ਟੀ ਹੋਈ ਸੀ।
ਸਥਾਨਕ ਸਮੇਂ ਅਨੁਸਾਰ ਮੰਗਲਵਾਰ ਨੂੰ ਕੈਨੇਡੀਅਨਾਂ ਨੂੰ ਗਲੋਬਲ ਅਫੇਅਰਜ਼ ਤੋਂ ਹਾਸਲ ਹੋਈ ਈਮੇਲ ਵਿੱਚ ਇਹ ਜਾਣਕਾਰੀ ਦਿੱਤੀ ਗਈ ਹੈ ਕਿ ਉਨ੍ਹਾਂ ਨੂੰ ਇਸ ਬੇੜੇ ਵਿੱਚੋਂ ਕੱਢਣ ਲਈ ਚਾਰਟਰ ਜਹਾਜ਼ ਭੇਜਿਆ ਜਾ ਰਿਹਾ ਹੈ ਜੋ ਕਿ ਜਾਪਾਨ ਤੋਂ ਵੀਰਵਾਰ ਨੂੰ ਸਿਹਤਮੰਦ ਯਾਤਰੀਆਂ, ਜਿਨ੍ਹਾਂ ਵਿੱਚ ਇਸ ਵਾਇਰਸ ਦੇ ਕੋਈ ਲੱਛਣ ਨਹੀਂ ਹਨ, ਨੂੰ ਲੈ ਕੇ ਵਤਨ ਪਰਤਣ ਲਈ ਉਡਾਨ ਭਰੇਗਾ। ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਇਸ ਜਹਾਜ਼ ਵਿੱਚ ਕਿੰਨੇ ਕੈਨੇਡੀਅਨ ਹੋਣਗੇ।
ਮੰਗਲਵਾਰ ਨੂੰ ਪੂਰਬੀ ਓਨਟਾਰੀਓ ਵਿੱਚ ਟਰੈਂਟਨ ਸਥਿਤ ਕੈਨੇਡੀਅਨ ਸੈਨਾਵਾਂ ਦੇ ਟਿਕਾਣੇ ਉੱਤੇ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਸਿਹਤ ਮੰਤਰੀ ਪੈਟੀ ਹਾਜ਼ਦੂ ਨੇ ਆਖਿਆ ਕਿ ਸਰਕਾਰ ਬੇੜੇ ੳੱੁਤੇ ਸਵਾਰ ਕੁਝ ਯਾਤਰੀਆਂ ਦੇ ਸੰਪਰਕ ਵਿੱਚ ਨਹੀਂ ਹੈ ਤੇ ਕਈਆਂ ਨੇ ਇਹੋ ਸੰਕੇਤ ਦਿੱਤਾ ਹੈ ਕਿ ਉਹ ਜਾਪਾਨ ਵਿੱਚ ਹੀ ਆਪਣੇ ਪਰਿਵਾਰ ਨਾਲ ਰਹਿਣਗੇ।
ਸਿਹਤ ਮੰਤਰੀ ਨੇ ਵੁਹਾਨ, ਚੀਨ ਤੋਂ ਲਿਆ ਕੇ ਇੱਥੇ ਰੱਖੇ ਗਏ ਕੈਨੇਡੀਅਨਾਂ ਤੇ ਉਨ੍ਹਾਂ ਦੇ ਪਰਿਵਾਰਾਂ ਦੀ ਸਾਂਭ ਸੰਭਾਲ ਕਰ ਰਹੇ ਹੈਲਥ ਵਰਕਰਜ਼, ਕੈਨੇਡੀਅਨ ਹਥਿਆਰਬੰਦ ਸੈਨਾਵਾਂ ਦੇ ਮੈਂਬਰਾਂ ਤੇ ਰੱੈਡ ਕਰੌਸ ਦੇ ਸਟਾਫ ਨਾਲ ਮੁਲਾਕਾਤ ਕੀਤੀ। ਹੈਲਥ ਅਧਿਕਾਰੀਆਂ ਨੇ ਦੱਸਿਆ ਕਿ ਇੱਥੇ ਲਿਆਂਦੇ ਗਏ ਕੈਨੇਡੀਅਨਾਂ ਵਿੱਚੋਂ ਕਿਸੇ ਵਿੱਚ ਵੀ ਕੋਰੋਨਾਵਾਇਰਸ ਦੇ ਲੱਛਣ ਨਹੀਂ ਪਾਏ ਗਏ।