ਟੋਰਾਂਟੋ, 31 ਜਨਵਰੀ (ਪੋਸਟ ਬਿਊਰੋ) : ਪ੍ਰੋਵਿੰਸ ਭਰ ਵਿੱਚ ਵੱਧ ਰਹੀਆਂ ਹਾਈਡਰੋ ਦਰਾਂ ਨੂੰ ਸਥਿਰ ਕਰਨ ਲਈ ਓਨਟਾਰੀਓ ਸਰਕਾਰ ਇਸ ਵਿੱਤੀ ਵਰ੍ਹੇ ਵਿੱਚ 1.6 ਬਿਲੀਅਨ ਡਾਲਰ ਖਰਚ ਕਰੇਗੀ।
ਵਿੱਤ ਮੰਤਰੀ ਰੌਡ ਫਿਲਿਪਸ ਨੇ ਆਖਿਆ ਕਿ ਪਹਿਲਾਂ ਕੀਮਤਾਂ ਨੂੰ ਸਥਿਰ ਰੱਖਣ ਲਈ ਸਰਕਾਰ ਨੇ 4 ਬਿਲੀਅਨ ਡਾਲਰ ਦਾ ਬਜਟ ਰੱਖਿਆ ਸੀ ਪਰ ਹੁਣ ਇਸ ਵਿੱਚ 1.6 ਬਿਲੀਅਨ ਡਾਲਰ ਦਾ ਹੋਰ ਵਾਧਾ ਕੀਤਾ ਜਾਵੇਗਾ ਤੇ ਇਸ ਨਾਲ ਇਹ ਕੱੁਲ ਰਕਮ 5.6 ਬਿਲੀਅਨ ਡਾਲਰ ਬਣ ਗਈ ਹੈ। ਪ੍ਰੀਮੀਅਰ ਡੱਗ ਫੋਰਡ ਦੀ ਅਗਵਾਈ ਵਾਲੀ ਸਰਕਾਰ ਵੱਲੋਂ ਆਪਣੀ ਤਿਮਾਹੀ ਵਿੱਤੀ ਸਥਿਤੀ ਨੂੰ ਅਪਡੇਟ ਕੀਤਾ ਗਿਆ ਤੇ ਇਸੇ ਲਈ ਹੀ ਵਿੱਤ ਮੰਤਰੀ ਵਲੋਂ ਅੱਜ ਇਸ ਸਬੰਧ ਵਿੱਚ ਐਲਾਨ ਕੀਤਾ ਗਿਆ।
ਪਿਛਲੇ ਸਾਲ ਮਾਰਚ ਵਿੱਚ ਪ੍ਰੋਵਿੰਸ਼ੀਅਲ ਸਰਕਾਰ ਨੇ ਆਖਿਆ ਸੀ ਕਿ ਉਹ ਹਾਈਡਰੋ ਦਰਾਂ ਉੱਤੇ ਸਬਸਿਡੀ ਦੇਣੀ ਜਾਰੀ ਰੱਖੇਗੀ ਤੇ ਮਹਿੰਗਾਈ ਦੀ ਦਰ ਵਿੱਚ ਵਾਧੇ ਨੂੰ ਵੀ ਰੋਕਿਆ ਜਾਵੇਗਾ। ਜਿ਼ਕਰਯੋਗ ਹੈ ਕਿ ਪਿਛਲੇ ਸਾਲ ਇਨ੍ਹਾਂ ਦਰਾਂ ਵਿੱਚ ਔਸਤ ਰੈਜ਼ੀਡੈਂਸ਼ੀਅਲ ਕਸਟਮਰ, ਜੋ ਪ੍ਰਤੀ ਮਹੀਨਾ 700 ਕਿਲੋਵਾਟ ਬਿਜਲੀ ਵਰਤਦਾ ਹੈ, ਦੇ ਹਿਸਾਬ ਨਾਲ 1.8 ਫੀ ਸਦੀ ਜਾਂ 1.99 ਫੀ ਸਦੀ ਵਾਧਾ ਹੋਇਆ ਸੀ।
ਫਿਲਿਪਸ ਦਾ ਕਹਿਣਾ ਹੈ ਕਿ ਵਧੀਆਂ ਹੋਈਆਂ ਸਬਸਿਡੀਆਂ ਲਈ ਸਰਕਾਰ ਭੁਗਤਾਣ ਕਰੇਗੀ। ਇਹ ਸਭ ਰੋਜ਼ਗਾਰ ਵਿੱਚ ਹੋਏ ਵਾਧੇ ਤੇ ਘਰਾਂ ਦੀ ਵਿੱਕਰੀ ਵਿੱਚ ਹੋਏ ਵਾਧੇ ਕਾਰਨ ਹੋ ਸਕਿਆ ਹੈ।