ਓਟਵਾ, 24 ਜਨਵਰੀ (ਪੋਸਟ ਬਿਊਰੋ) : ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਨੇ ਸੋਮਵਾਰ ਤੋਂ ਸ਼ੁਰੂ ਹੋਣ ਜਾ ਰਹੀ ਪਾਰਲੀਆਮੈਂਟ ਦੀ ਕਾਰਵਾਈ ਤੋਂ ਪਹਿਲਾਂ ਰਣਨੀਤੀ ਉਲੀਕਣ ਲਈ ਆਪਣੇ ਸਾਰੇ ਐਮਪੀਜ਼ ਤੇ ਸੈਨੇਟਰਜ਼ ਨਾਲ ਸ਼ੱੁਕਰਵਾਰ ਨੂੰ ਮੀਟਿੰਗ ਕਰਨ ਦਾ ਫੈਸਲਾ ਕੀਤਾ ਹੈ।
ਕਾਕਸ ਦੀ ਰਟਰੀਟ ਉਸ ਸਮੇਂ ਹੋ ਰਹੀ ਹੈ ਜਦੋਂ ਕਈ ਟੋਰੀਜ਼ ਸ਼ੀਅਰ ਦੀ ਥਾਂ ਲੈਣ ਲਈ ਆਪੋ ਆਪਣੀਆਂ ਰਣਨੀਤੀਆਂ ਘੜ ਰਹੇ ਹਨ। ਇੱਥੇ ਦੱਸਣਾ ਬਣਦਾ ਹੈ ਕਿ ਘੱਟੋ ਘੱਟ ਤਿੰਨ ਮੌਜੂਦਾ ਕੰਜ਼ਰਵੇਟਿਵ ਐਮਪੀਜ਼ ਵੱਲੋਂ ਲੀਡਰਸਿ਼ਪ ਦੌੜ ਲਈ ਕੈਂਪੇਨਜ਼ ਲਾਂਚ ਕਰਨ ਦੀਆਂ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ ਤੇ ਸਾਬਕਾ ਐਮਪੀ ਪੀਟਰ ਮੈਕੇਅ ਵੱਲੋਂ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਦੇ ਕੀਤੇ ਐਲਾਨ ਤੋਂ ਬਾਅਦ ਉਨ੍ਹਾਂ ਨੂੰ ਵੀ ਚੁਫੇਰਿਓਂ ਸਮਰਥਨ ਮਿਲ ਰਿਹਾ ਹੈ।
ਪਰ 27 ਜੂਨ ਨੂੰ ਜਦੋਂ ਤੱਕ ਕੰਜ਼ਰਵੇਟਿਵ ਆਪਣਾ ਨਵਾਂ ਆਗੂ ਨਹੀਂ ਚੁਣ ਲੈਂਦੇ ਉਦੋਂ ਤੱਕ ਸ਼ੀਅਰ ਹੀ ਪਾਰਟੀ ਆਗੂ ਬਣੇ ਰਹਿਣਗੇ। ਇਸ ਲਈ ਘੱਟ ਗਿਣਤੀ ਪਾਰਲੀਆਮੈਂਟ ਵਿੱਚ ਹਾਲ ਦੀ ਘੜੀ ਸ਼ੀਅਰ ਨੂੰ ਵਿਰੋਧੀ ਧਿਰ ਦੀਆਂ ਤਰਜੀਹਾਂ ਬਾਰੇ ਰਣਨੀਤੀ ਉਲੀਕਣੀ ਹੋਵੇਗੀ। ਇਹ ਕਿਆਫੇ ਵੀ ਲਾਏ ਜਾ ਰਹੇ ਹਨ ਕਿ ਸ਼ੀਅਰ ਅੱਜ ਆਪਣੇ ਕਾਕਸ ਨੂੰ ਦੱਸਣਗੇ ਕਿ ਲੀਡਰਸਿ਼ਪ ਦੌੜ ਦੇ ਬਾਵਜੂਦ ਉਨ੍ਹਾਂ ਨੂੰ ਇੱਕਜੁੱਟ ਰਹਿਣਾ ਚਾਹੀਦਾ ਹੈ। ਇਸ ਦੇ ਨਾਲ ਹੀ ਟੋਰੀਜ਼ ਨੂੰ ਸਰਕਾਰ ਦੀ ਜਵਾਬਦੇਹੀ ਤੈਅ ਕਰਨ ਲਈ ਵੀ ਆਪਣਾ ਧਿਆਨ ਕੇਂਦਰਿਤ ਰੱਖਣਾ ਹੋਵੇਗਾ।
ਉਨ੍ਹਾਂ ਨੂੰ ਇਹ ਵੀ ਤੈਅ ਕਰਨਾ ਹੋਵੇਗਾ ਕਿ ਉਨ੍ਹਾਂ ਨੇ ਸਰਕਾਰ ਨਾਲ ਰਲ ਕੇ ਕੰਮ ਕਰਨਾ ਹੈ ਜਾਂ ਨਹੀਂ। ਦੂਜੇ ਪਾਸੇ ਲਿਬਰਲਾਂ ਦੇ ਏਜੰਡੇ ਉੱਤੇ ਪਹਿਲੀ ਆਈਟਮ ਹੀ ਨਵੀਂ ਨਾਫਟਾ ਡੀਲ ਦੀ ਪੁਸ਼ਟੀ ਕਰਵਾਉਣਾ ਹੈ। ਇੱਥੇ ਹੀ ਦੋਵਾਂ ਧਿਰਾਂ ਦੀ ਪਰਖ ਹੋ ਜਾਵੇਗੀ। ਪਰ ਲਿਬਰਲਾਂ ਦੀ ਵਿਸ਼ ਲਿਸਟ ਵਿੱਚ ਇੱਕ ਹੋਰ ਮੱੁਦਾ ਮਿਲਟਰੀ ਸਟਾਈਲ ਦੀ ਅਸਾਲਟ ਰਾਈਫਲਾਂ ਉੱਤੇ ਪਾਬੰਦੀ ਲਾਉਣਾ ਹੈ ਤੇ ਇਸ ਮੁੱਦੇ ੳੱੁਤੇ ਸ਼ਾਇਦ ਹੀ ਟੋਰੀਜ਼ ਤੇ ਲਿਬਰਲਾਂ ਦੀ ਰਗ ਰਲੇ।