ਟੋਰਾਂਟੋ, 21 ਜਨਵਰੀ (ਪੋਸਟ ਬਿਊਰੋ) : ਅੱਜ ਓਨਟਾਰੀਓ ਭਰ ਦੇ ਕੈਥੋਲਿਕ ਸਕੂਲ ਤੇ ਕਈ ਹੋਰਨਾਂ ਬੋਰਡਜ਼ ਦੇ ਪਬਲਿਕ ਹਾਈ ਸਕੂਲ ਤੇ ਐਲੀਮੈਂਟਰੀ ਸਕੂਲ ਬੰਦ ਰਹਿਣਗੇ।
ਕੈਥੋਲਿਕ ਅਧਿਆਪਕਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਵੱਲੋਂ ਅੱਜ ਇੱਕ ਰੋਜ਼ਾ ਹੜਤਾਲ ਕੀਤੀ ਜਾ ਰਹੀ ਹੈ ਜਦਕਿ ਦੋ ਹੋਰ ਯੂਨੀਅਨਾਂ ਸਿਲਸਿਲੇਵਾਰ ਕੀਤੀ ਜਾਣ ਵਾਲੀ ਹੜਤਾਲ ਵਿੱਚ ਰੁੱਝੀਆਂ ਹੋਈਆਂ ਹਨ। ਤਿੰਨਾਂ ਯੂਨੀਅਨਾਂ ਦੇ ਨਾਲ ਨਾਲ ਫਰੈਂਚ ਸਿਸਟਮ ਦੇ ਅਧਿਆਪਕਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਦਾ ਕਹਿਣਾ ਹੈ ਕਿ ਪ੍ਰੋਵਿੰਸ਼ੀਅਲ ਸਰਕਾਰ ਨਾਲ ਕਾਂਟਰੈਕਟ ਸਬੰਧੀ ਗੱਲਬਾਤ ਵਿੱਚ ਕੋਈ ਹੋਰ ਰਾਹ ਨਾ ਨਿਕਲਣ ਤੇ ਇਸ ਗੱਲਬਾਤ ਵਿੱਚ ਆਈ ਖੜੋਤ ਕਾਰਨ ਹੀ ਸਾਰੇ ਪਰੇਸ਼ਾਨ ਹਨ।
ਯੂਨੀਅਨਾਂ ਦਾ ਕਹਿਣਾ ਹੈ ਕਿ ਕਲਾਸਾਂ ਦੇ ਆਕਾਰ ਵਿੱਚ ਹੋਏ ਵਾਧੇ ਤੇ ਈ-ਲਰਨਿੰਗ ਕੋਰਸਾਂ ਨੂੰ ਲਾਜ਼ਮੀ ਕੀਤੇ ਜਾਣਾ ਸਾਨੂੰ ਅਖਰ ਰਿਹਾ ਹੈ ਪਰ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਦਾ ਕਹਿਣਾ ਹੈ ਕਿ ਮੁਆਵਜ਼ਾ ਹੀ ਗੱਲਬਾਤ ਵਿੱਚ ਮੁੱਖ ਅੜਿੱਕਾ ਹੈ। ਜਿਨ੍ਹਾਂ ਬੋਰਡਜ਼ ਨੂੰ ਓਨਟਾਰੀਓ ਸੈਕੰਡਰੀ ਸਕੂਲ ਟੀਚਰਜ਼ ਫੈਡਰੇਸ਼ਨ ਵੱਲੋਂ ਨਿਸ਼ਾਨਾ ਬਣਾਇਆ ਜਾਵੇਗਾ ਉਨ੍ਹਾਂ ਵਿੱਚ ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ, ਰੇਨੀ ਰਿਵਰ ਡਿਸਟ੍ਰਿਕਟ ਸਕੂਲ ਬੋਰਡ, ਸਿਮਕੋਅ ਕਾਊਂਟੀ ਡਿਸਟ੍ਰਿਕਟ ਸਕੂਲ ਬੋਰਡ, ਨੀਅਰ ਨੌਰਥ ਸਕੂਲ ਡਿਸਟ੍ਰਿਕਟ ਸਕੂਲ ਬੋਰਡ, ਗ੍ਰੈਂਡ ਐਰੀ ਡਿਸਟ੍ਰਿਕਟ ਸਕੂਲ ਬੋਰਡ, ਟ੍ਰਿਲੀਅਮ ਲੇਕਲੈਂਡਜ਼ ਡਿਸਟ੍ਰਿਕਟ ਸਕੂਲ ਬੋਰਡ ਤੇ ਹੇਸਟਿੰਗਜ਼ ਐਂਡ ਪ੍ਰਿੰਸ ਐਡਵਰਡ ਡਿਸਟ੍ਰਿਕਟ ਸਕੂਲ ਬੋਰਡ ਸ਼ਾਮਲ ਹਨ।
ਓਨਟਾਰੀਓ ਦੀ ਐਲੀਮੈਂਟਰੀ ਟੀਚਰਜ਼ ਫੈਡਰੇਸ਼ਨ ਵੱਲੋਂ ਵੀ ਗ੍ਰੈਂਡ ਐਰੀ ਤੇ ਟ੍ਰਿਲੀਅਮ ਲੇਕਲੈਂਡਜ਼ ਬੋਰਡਜ਼ ਅਤੇ ਰੈਨਫ੍ਰਿਊ ਕਾਊਂਟੀ ਡਿਸਟ੍ਰਿਕਟ ਸਕੂਲ ਬੋਰਡ ਤੇ ਸੁਪੀਰੀਅਰ ਗ੍ਰੀਨਸਟੋਨ ਡਿਸਟ੍ਰਿਕਟ ਸਕੂਲ ਬੋਰਡ ਵੀ ਹੜਤਾਲ ਕਰ ਰਹੇ ਹਨ।