ਬਰੈਂਪਟਨ, (ਡਾ. ਝੰਡ) -ਪਿਛਲੇ ਕਈ ਦਿਨਾਂ ਤੋਂ ਆਸਟ੍ਰੇਲੀਆ ਵਿਚ ਕਈ ਥਾਂਵਾਂ 'ਤੇ ਲੱਗੀ ਅੱਗ ਵਿਚ ਭਾਰੀ ਜਾਨੀ ਤੇ ਮਾਲੀ ਨੁਕਸਾਨ ਹੋਇਆ ਹੈ। ਇਸ ਅਤੀ-ਦੁਖਦਾਈ ਕੁਦਰਤੀ ਵਾਰਦਾਤ ਵਿਚ ਜਿੱਥੇ ਬਹੁਤ ਸਾਰੀਆਂ ਅਣਮੁੱਲੀਆਂ ਮਨੁੱਖੀ ਜਾਨਾਂ ਗਈਆਂ ਹਨ, ਉੱਥੇ ਲੱਖਾਂ ਹੀ ਨਹੀਂ, ਸਗੋਂ ਕਰੋੜਾਂ ਦੀ ਗਿਣਤੀ ਵਿਚ ਜੰਗਲੀ ਪਸ਼ੂ-ਪੰਛੀ ਅਤੇ ਜਾਨਵਰ ਇਸ ਭਿਆਨਕ ਅੱਗ ਦਾ ਸਿ਼ਕਾਰ ਹੋਏ ਹਨ। ਇਹ ਵੀ ਸੁਣਨ ਵਿਚ ਆ ਰਿਹਾ ਹੈ ਕਿ ਪਸ਼ੂ-ਪੰਛੀਆਂ ਦੀਆਂ ਕਈ ਪੂਰਨ ਜਾਤੀਆਂ ਹੀ ਇਸ ਭਿਆਨਕ ਅੱਗ ਦੀ ਲਪੇਟ ਵਿਚ ਆ ਕੇ ਖ਼ਤਮ ਹੋ ਗਈਆਂ ਹਨ। ਦੇਸ਼-ਵਿਦੇਸ਼ ਤੋਂ ਕਈ ਸਮਾਜ-ਸੇਵੀ ਸੰਸਥਾਵਾਂ ਅੱਗ-ਪੀੜਤਾਂ ਦੀ ਸਹਾਇਤਾ ਲਈ ਅੱਗੇ ਆਈਆਂ ਹਨ ਅਤੇ ਉਹ ਦਿਲ ਖੋਲ੍ਹ ਕੇ ਇਸ ਵਿਚ ਆਪਣਾ ਯੋਗਦਾਨ ਪਾ ਰਹੀਆਂ ਹਨ।
ਇਸ ਸਿਲਸਿਲੇ ਵਿਚ ਬੀਤੇ ਐਤਵਾਰ 19 ਜਨਵਰੀ ਨੂੰ ਟੀ.ਪੀ.ਏ.ਆਰ. ਕਲੱਬ ਦੇ 18 ਮੈਂਬਰਾਂ ਵੱਲੋਂ ਇਸ ਚੱਲ ਰਹੇ ਠੰਡੇ-ਯੱਖ਼ ਬਰਫ਼ੀਲੇ ਮੌਸਮ ਵਿਚ ਬਰੈਂਪਟਨ ਦੇ ਚਿੰਗੂਜ਼ੀ ਪਾਰਕ ਵਿਚ ਇਕੱਠੇ ਹੋ ਕੇ 5 ਕਿਲੋਮੀਟਰ ਦੌੜ ਦਾ ਸਫ਼ਲ ਆਯੋਜਨ ਕੀਤਾ ਗਿਆ। ਮੈਂਬਰਾਂ ਨੇ ਮਿਲ ਕੇ ਚਿੰਗੂਜ਼ੀ ਪਾਰਕ ਦੇ ਦੋ ਚੱਕਰ ਲਗਾਏ ਅਤੇ ਸਫ਼ਲਤਾ ਪੂਰਵਕ ਪੰਜ ਕਿਲੋਮੀਟਰ ਪੈਂਡਾ ਤੈਅ ਕੀਤਾ। ਇਸ ਦੌੜ/ਵਾੱਕ ਤੋਂ ਬਾਅਦ ਕਲੱਬ ਦੇ ਸਰਗ਼ਰਮ ਮੈਂਬਰ ਸੰਜੂ ਗੁਪਤਾ ਜੋ ਇਸ ਈਵੈਂਟ ਦਾ ਮੁੱਖ ਆਯੋਜਕ ਵੀ ਸੀ , ਵੱਲੋਂ ਸਾਰੇ ਮੈਂਬਰਾਂ ਨੂੰ ‘ਬੰਬੇ ਬੇਕਰਜ’਼ ਰੈਸਟੋਰੈਂਟ ਵਿਚ ਚਾਹ/ਕਾਫ਼ੀ ਤੇ ਵੈਜੀਟੇਬਲ ਰੈਪਸ ਦਾ ਸਾ਼ਨਦਾਰ ਲੰਚ ਕਰਵਾਇਆ ਗਿਆ। ਇਸ ਦੌਰਾਨ ਪ੍ਰਤੀ ਮੈਂਬਰ 50 ਡਾਲਰ ਦੇ ਹਿਸਾਬ ਨਾਲ ਇਕੱਤਰ ਹੋਈ 900 ਡਾਲਰ ਦੀ ਰਕਮ ਵਿਚ ਕੁਝ ਹੋਰ ਪਾ ਕੇ 1000 ਆਸਟ੍ਰੇਲੀਅਨ ਡਾਲਰ ਦਾ ਚੈੱਕ ਆਸਟ੍ਰੇਲੀਆ ਦੇ ਅੱਗ-ਪੀੜਤਾਂ ਦੀ ਸਹਾਇਤਾ ਲਈ ਭੇਜਿਆ ਗਿਆ।
ਕਲੱਬ ਦੇ ਇਸ ਸ਼ਲਾਘਾਯੋਗ ਕਦਮ ਦੀ ਬਰੈਂਪਟਨ ਵਿਚ ਹਰ ਪਾਸੇ ਚਰਚਾ ਹੋ ਰਹੀ ਹੈ। ਇਸ ਸ਼ੁਭ-ਕਾਰਜ ਲਈ ਕਲੱਬ ਦੇ ਚੇਅਰਪਰਸਨ ਸੰਧੂਰਾ ਸਿੰਘ ਬਰਾੜ, ਪ੍ਰਧਾਨ ਹਰਭਜਨ ਸਿੰਘ ਗਿੱਲ, ਸਕੱਤਰ ਡਾ. ਜੈ ਪਾਲ ਸਿੱਧੂ, ਈਸ਼ਰ ਸਿੰਘ, ਸੰਜੂ ਗੁਪਤਾ ਅਤੇ ਹੋਰ ਸਾਰੇ ਮੈਂਬਰ ਵਧਾਈ ਦੇ ਪਾਤਰ ਹਨ।