ਨਵੀਂ ਦਿੱਲੀ, 20 ਜਨਵਰੀ (ਪੋਸਟ ਬਿਊਰੋ)- ਜੰਮੂ ਕਸ਼ਮੀਰ ਦੇ ਮੁੱਦੇ ਬਾਰੇ ਪਿਛਲੇ ਲੰਬੇ ਸਮੇਂ ਤੋਂ ਭਾਰਤ ਵਿਰੋਧੀ ਰੁੱਖ ਅਪਣਾ ਰਹੇ ਮਲੇਸ਼ੀਆਂ ਦੇ ਪ੍ਰਧਾਨ ਮੰਤਰੀ ਮਹਾਤੀਰ ਮੁਹੰਮਦ ਦੇ ਪੈਰ ਪਿੱਛੇ ਖਿਸਕਣ ਲੱਗੇ ਹਨ।
ਅੱਜ ਸੋਮਵਾਰ ਮਹਾਤੀਰ ਮੁਹੰਮਦ ਨੇ ਕਿਹਾ ਕਿ ਉਹ ਭਾਰਤ ਵਿਰੁੱਧ ਕੋਈ ਵੀ ਜਵਾਬੀ ਕਾਰਵਾਈ ਨਹੀਂ ਕਰਨਗੇ। ਅਸਲ ਵਿੱਚ ਦੁਨੀਆ ਭਰ ਵਿਚ ਖੁਰਾਕੀ ਤੇਲ ਦੇ ਸੱਭ ਤੋਂ ਵੱਡੇ ਖਰੀਦਦਾਰ ਭਾਰਤ ਨੇ ਇਸੇ ਮਹੀਨੇ ਮਲੇਸ਼ੀਆ ਤੋਂ ਤੇਲ ਲੈਣ ਉੱਤੇ ਰੋਕ ਲਾ ਦਿੱਤੀ ਸੀ। ਇਸ ਫ਼ੈਸਲੇ ਨੂੰ ਮਹਾਤੀਰ ਦੀ ਭਾਰਤ ਵਿਰੋਧੀ ਨੀਤੀ ਦੇ ਜਵਾਬ ਨਾਲ ਜੋੜ ਕੇ ਵੇਖਿਆ ਜਾ ਰਿਹਾ ਹੈ। ਮਹਾਤੀਰ ਮੁਹੰਮਦ ਕਸ਼ਮੀਰ ਮੁੱਦੇ ਅਤੇ ਨਾਗਰਿਕਤਾ ਸੋਧ ਕਾਨੂੰਨ ਬਾਰੇ ਭਾਰਤ ਸਰਕਾਰ ਦੀ ਆਲੋਚਨਾ ਕਰ ਚੁੱਕੇ ਹਨ। ਉਨ੍ਹਾਂ ਨੇ ਆਪਣੇ ਦੇਸ਼ ਵਿਚ ਪੱਤਰਕਾਰਾਂ ਨਾਲ ਗੱਲਬਾਤ ਵਿੱਚ ਕਿਹਾ ਕਿ ਸਾਡਾ ਦੇਸ਼ ਭਾਰਤ ਵਿਰੁੱਧ ਕਾਰਵਾਈ ਕਰਨ ਲਈ ਬਹੁਤ ਛੋਟਾ ਹੈ। ਸਾਨੂੰ ਸਮੱਸਿਆ ਦੇ ਹੱਲ ਲਈ ਦੂਜੇ ਤਰੀਕਿਆਂ ਅਤੇ ਸਾਧਨਾਂ ਦੀ ਵਰਤੋਂ ਕਰਨੀ ਹੋਵੇਗੀ। ਫਿਰ ਵੀ ਮਹਾਤੀਰ ਮੁਹੰਮਦ ਨੇ ਨਾਗਰਿਕਤਾ ਕਾਨੂੰਨ ਬਾਰੇ ਇਕ ਵਾਰ ਫਿਰ ਦੋਹਰਾਇਆ ਕਿ ਇਹ ਨਾਜਾਇਜ਼ ਹੈ।
ਵਰਨਣ ਯੋਗ ਹੈ ਕਿ ਭਾਰਤ ਪਿਛਲੇ ਪੰਜ ਸਾਲਾਂ ਵਿਚ ਮਲੇਸ਼ੀਆ ਤੋਂ ਖੁਰਾਕੀ ਤੇਲ ਦਾ ਸਭ ਤੋਂ ਵੱਡਾ ਖਰੀਦਦਾਰ ਦੇਸ਼ ਹੈ, ਪਰ ਦੋਵਾਂ ਦੇ ਸੰਬੰਧ ਖਰਾਬ ਹੋਣ ਪਿੱਛੋਂ ਮਲੇਸ਼ੀਆ ਦੇ ਲਈ ਤੇਲ ਵੇਚਣਾ ਮੁਸ਼ਕਿਲ ਹੋ ਗਿਆ ਹੈ। ਮਲੇਸ਼ੀਆ ਦੀ ਅਰਥ ਵਿਵਸਥਾ ਵਿਚ ਤੇਲ ਦੀ ਵਿਕਰੀ ਦਾ ਵੱਡਾ ਹਿੱਸਾ ਹੈ। ਉਸ ਦੇ ਖੁਰਾਕੀ ਤੇਲ ਦੀਆਂ ਕੀਮਤਾਂ ਵਿਚ ਪਿਛਲੇ ਹਫ਼ਤੇ ਲਗਭਗ 10 ਫ਼ੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ, ਜੋ ਪਿਛਲੇ 11 ਸਾਲਾਂ ਦੀ ਸਭਾ ਤੋਂ ਵੱਡੀ ਵੀਕਲੀ ਗਿਰਾਵਟ ਹੈ। ਮਲੇਸ਼ੀਆ ਨੇ ਵਿਵਾਦਤ ਇਸਲਾਮਿਕ ਧਰਮ ਗੂਰੂ ਜਾਕਿਰ ਨਾਇਕ ਦਾ ਸਥਾਨਕ ਵਾਸੀ ਦਾ ਦਰਜਾ ਖਤਮ ਕਰਨ ਤੋਂ ਵੀ ਇਨਕਾਰ ਕਰ ਦਿੱਤਾ ਹੈ। ਉਸ ਦੇ ਇਸ ਫ਼ੈਸਲੇ ਤੋਂ ਵੀ ਭਾਰਤ ਖਫਾ ਹੈ।