ਢਾਕਾ, 20 ਜਨਵਰੀ (ਪੋਸਟ ਬਿਊਰੋ)- ਬੰਗਲਾ ਦੇਸ਼ ਦੀ ਇਕ ਅਦਾਲਤ ਨੇ ਅੱਜ ਸੋਮਵਾਰ ਨੂੰ ਪਾਬੰਦੀ ਸ਼ੁਦਾ ਅੱਤਵਾਦੀ ਸੰਗਠਨ ਹਰਕਤ-ਉਲ-ਜਿਹਾਦ-ਅਲ-ਇਸਲਾਮੀ (ਹੁਜੀ) ਦੇ 10 ਮੈਂਬਰਾਂ ਨੂੰ ਮੌਤ ਦੀ ਸਜ਼ਾ ਸੁਣਾਈ ਹੈ। ਉਨ੍ਹਾਂ ਉੱਤੇ 2001 ਵਿਚ ਇਕ ਰਾਜਨੀਤਕ ਰੈਲੀ ਉੱਤੇ ਧਮਾਕੇ ਕਰਨ ਦਾ ਦੋਸ਼ ਸੀ।
ਮੀਡੀਆ ਰਿਪੋਰਟਾਂ ਮੁਤਾਬਕ ਢਾਕਾ ਦੀ ਤੀਸਰੀ ਐਡੀਸ਼ਨਲ ਮੈਟਰੋਪਾਲੀਟਨ ਸੈਸ਼ਨ ਅਦਾਲਤ ਦੇ ਜੱਜ ਮੁਹੰਮਦ ਰਬੀਉਲ ਇਸਲਾਮ ਨੇ ਇਹ ਫੈਸਲਾ ਸੁਣਾਉਂਦੇ ਹੋਏ ਇਸ ਕੇਸ ਵਿਚ 2 ਜਣਿਆਂ ਨੂੰ ਬਰੀ ਕਰ ਦਿੱਤਾ ਤੇ ਹਰੇਕ ਮੌਤ ਦੀ ਸਜ਼ਾ ਦੇ ਦੋਸ਼ੀ ਉੱਤੇ ਬੰਗਲਾ ਦੇਸ਼ੀ ਟਕਾ 20,000 (281 ਅਮਰੀਕੀ ਡਾਲਰ) ਦਾ ਜ਼ੁਰਮਾਨਾ ਵੀ ਲਾਇਆ ਹੈ।
ਵਰਨਣ ਯੋਗ ਹੈ ਕਿ 20 ਜਨਵਰੀ 2001 ਨੂੰ ਦੇਸ਼ ਦੀ ਰਾਜਧਾਨੀ ਢਾਕਾ ਦੇ ਪਲਟਨ ਮੈਦਾਨ ਵਿਚ ਕਮਿਊਨਿਸਟ ਪਾਰਟੀ ਆਫ ਬੰਗਲਾ ਦੇਸ਼ (ਸੀ ਪੀ ਬੀ) ਦੀ ਰੈਲੀ ਵਿਚ ਹੋਏ ਧਮਾਕਿਆਂ ਵਿਚ 8 ਲੋਕਾਂ ਦੀ ਮੌਤ ਹੋ ਗਈ ਤੇ 50 ਜ਼ਖਮੀ ਹੋਏ ਸਨ। 12 ਅਪ੍ਰੈਲ 2017 ਨੂੰ ਸਿਲਹਟ ਵਿਚ ਸਾਬਕਾ ਬ੍ਰਿਟੇਨ ਦੇ ਦੂਤ ਅਨਵਰ ਚੌਧਰੀ ਉੱਤੇ ਗ੍ਰੇਨੇਡ ਹਮਲੇ ਦੇ ਇਕ ਕੇਸ ਦੇ ਮੁਖ ਦੋਸ਼ੀ ਹੂਜੀ ਦੇ ਪ੍ਰਮੁੱਖ ਮੁਫਤੀ ਅਬਦੁਲ ਇੰਨਾਨ ਨੂੰ ਫਾਂਸੀ ਦਿੱਤੀ ਗਈ ਸੀ। ਇਸ ਦੇ 13 ਦੋਸ਼ੀਆਂ ਵਿਚੋਂ 4 ਅੱਜ ਸੋਮਵਾਰ ਅਦਾਲਤ ਵਿਚ ਮੌਜੂਦ ਸਨ। ਮੌਤ ਦੀ ਸਜ਼ਾ ਪਾਏ 6 ਹੋਰ ਦੋਸ਼ੀ ਹਾਲੇ ਫਰਾਰ ਹਨ। ਉਸ ਹਮਲੇ ਦੇ ਬਾਅਦ ਵਿਚ ਸੀ ਪੀ ਬੀ ਦੇ ਓਦੋਂ ਦੇ ਪ੍ਰਧਾਨ ਮਨਜੁਰੂਲ ਅਹਿਸਾਨ ਖਾਨ ਨੇ ਇਸ ਘਟਨਾ ਦੇ ਸੰਬੰਧ ਵਿਚ ਅਣਪਛਾਤੇ ਲੋਕਾਂ ਉੱਤੇ ਦੋਸ਼ ਲਾ ਕੇ ਕੇਸ ਕੀਤਾ ਸੀ। ਜਾਂਚ ਅਧਿਕਾਰੀ ਸੀ ਆਈ ਡੀ ਇੰਸਪੈਕਟਰ ਮ੍ਰਿਨਾਲ ਕਾਂਤੀ ਸਾਹਾ ਨੇ 27 ਨਵੰਬਰ 2013 ਨੂੰ ਢਾਕਾ ਦੀ ਮੁੱਖ ਮੈਟਰੋਪਾਲੀਟਨ ਕੋਰਟ ਵਿਚ ਦੋ ਦੋਸ਼ ਪੱਤਰ ਪੇਸ਼ ਕੀਤੇ ਸਨ। ਮੁਕੱਦਮੇ ਦੌਰਾਨ ਅਦਾਲਤ ਨੇ ਸ਼ਿਕਾਇਤ ਸਮੇਤ ਸਰਕਾਰੀ ਪੱਖ ਦੇ 46 ਗਵਾਹਾਂ ਦੇ ਬਿਆਨ ਦਰਜ ਕੀਤੇ। ਫਿਰ 1 ਦਸੰਬਰ 2019 ਨੂੰ ਸੁਣਵਾਈ ਦੇ ਬਾਅਦ ਜੱਜ ਰਬੀਉਲ ਇਸਲਾਮ ਨੇ ਕੇਸਾ ਦਾ ਫੈਸਲਾ ਦੇਣ ਦੀ ਤਰੀਕ 20 ਜਨਵਰੀ ਮਿਥੀ ਸੀ।