ਕੰਸਾਸ, 20 ਜਨਵਰੀ (ਪੋਸਟ ਬਿਊਰੋ) : ਕੰਸਾਸ ਸਿਟੀ, ਮਿਸੂਰੀ ਦੀ ਪੁਲਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਇੱਕ ਬਾਰ ਦੇ ਬਾਹਰ ਚੱਲੀ ਗੋਲੀ ਕਾਰਨ ਦੋ ਵਿਅਕਤੀ ਮਾਰੇ ਗਏ ਜਦਕਿ 15 ਹੋਰ ਜ਼ਖ਼ਮੀ ਹੋ ਗਏ।
ਇਹ ਗੋਲੀਕਾਂਡ ਐਤਵਾਰ ਅੱਧੀ ਰਾਤ ਨੂੰ ਵਾਪਰਿਆ ਤੇ ਇਸ ਬਾਰੇ ਜਾਣਕਾਰੀ ਕੰਸਾਸ ਸਿਟੀ ਦੀ ਪੁਲਿਸ ਵੱਲੋਂ ਦਿੱਤੀ ਗਈ। ਕੈਪਟਨ ਡੇਵਿਡ ਜੈਕਸਨ ਨੇ ਨਿਊਜ਼ ਆਊਟਲੈਟਸ ਨੂੰ ਦੱਸਿਆ ਕਿ ਮੌਕੇ ੳੱੁਤੇ ਪੁਲਿਸ ਅਧਿਕਾਰੀਆਂ ਨੂੰ ਬੜਾ ਹੀ ਖਤਰਨਾਕ ਨਜ਼ਾਰਾ ਵੇਖਣ ਨੂੰ ਮਿਲਿਆ ਤੇ ਉਨ੍ਹਾਂ ਨੂੰ ਸ਼ਹਿਰ ਭਰ ਵਿੱਚੋਂ ਮਦਦ ਮੰਗਵਾਉਣੀ ਪਈ। ਇੱਕ ਪੁਰਸ਼ ਤੇ ਮਹਿਲਾ ਇੱਥੇ ਮ੍ਰਿਤਕ ਪਾਏ ਗਏ।
ਪੁਲਿਸ ਦਾ ਮੰਨਣਾ ਹੈ ਕਿ ਗੋਲੀਆਂ ਮ੍ਰਿਤਕ ਪਾਏ ਗਏ ਵਿਅਕਤੀ ਵੱਲੋਂ ਹੀ ਮਰਨ ਤੋਂ ਪਹਿਲਾਂ ਚਲਾਈਆਂ ਗਈਆਂ ਹੋਣਗੀਆਂ। ਬੁਲਾਰੇ ਨੇ ਦੱਸਿਆ ਕਿ ਸ਼ੂਟਰ ਨੇ ਉਨ੍ਹਾਂ ਵਿਅਕਤੀਆਂ ਉੱਤੇ ਗੋਲੀਆਂ ਚਲਾ ਦਿੱਤੀਆਂ ਜਿਹੜੇ ਬਾਰ ਵਿੱਚ ਦਾਖਲ ਹੋਣ ਦੀ ਕੋਸਿ਼ਸ਼ ਕਰ ਰਹੇ ਸਨ। ਪਰ ਗੋਲੀਆਂ ਚਲਾਏ ਜਾਣ ਦਾ ਮੰਤਵ ਅਜੇ ਤੱਕ ਸਪਸ਼ਟ ਨਹੀਂ ਹੋ ਸਕਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਸੂ਼ਟਰ ਨੂੰ ਹਥਿਆਰਬੰਦ ਸਕਿਊਰਿਟੀ ਗਾਰਡ ਵੱਲੋਂ ਗੋਲੀ ਮਾਰੀ ਗਈ।
ਜਾਂਚ ਦੌਰਾਨ, ਪੁਲਿਸ ਨੂੰ ਪਤਾ ਲੱਗਿਆ ਕਿ ਘੱਟੋ ਘੱਟ 15 ਲੋਕਾਂ ਨੂੰ ਜ਼ਖ਼ਮੀ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ। ਇਨ੍ਹਾਂ ਵਿੱਚੋਂ ਤਿੰਨ ਵਿਅਕਤੀਆਂ ਦੀ ਹਾਲਤ ਨਾਜ਼ੁਕ ਦੱਸੀ ਜਾਂਦੀ ਹੈ। ਇਹ ਘਟਨਾਕ੍ਰਮ ਅਮਰੀਕਾ ਦੇ ਹਾਈਵੇਅ 40 ਲਾਗੇ ਵਾਪਰਿਆ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਬਾਰ ਦਾ ਨਾਂ ਨਾਈਨ ਅਲਟਰਾ ਲਾਊਂਜ ਦੱਸਿਆ ਜਾ ਰਿਹਾ ਹੈ।