* ਸ਼ਿਵ ਸੈਨਾ ਨੇ ਬਿਆਨ ਤੋਂ ਪੱਲਾ ਝਾੜਿਆ
ਮੁੰਬਈ, 19 ਜਨਵਰੀ (ਪੋਸਟ ਬਿਊਰੋ)- ਕੁਝ ਸਮੇਂ ਤੋਂ ਮੀਡੀਆ 'ਚ ਵੀਰ ਸਾਵਰਕਰ ਬਾਰੇ ਜਾਰੀ ਬਿਆਨਬਾਜ਼ੀ ਵਿੱਚ ਕਾਂਗਰਸ ਸੇਵਾ ਦਲ ਦੇ ਬੁਕਲੈਟ ‘ਵੀਰ ਸਾਵਰਕਰ ਕਿਤਨੇ ਵੀਰ’ ਵਿੱਚ ਕੀਤੇ ਦਾਅਵੇ ਪਿੱਛੋਂ ਸਾਵਰਕਰ ਬਾਰੇ ਕਈ ਤਰ੍ਹਾਂ ਦੇ ਬਿਆਨ ਆ ਰਹੇ ਹਨ। ਸ਼ਿਵ ਸੈਨਾ ਆਗੂ ਸੰਜੇ ਰਾਊਤ ਨੇ ਕਿਹਾ ਹੈ ਕਿ ਜਿਹੜੇ ਵਿਅਕਤੀ ਸਾਵਰਕਰ ਨੂੰ ਭਾਰਤ ਰਤਨ ਦੇਣ ਦਾ ਵਿਰੋਧ ਕਰਦੇ ਹਨ, ਉਨ੍ਹਾਂ ਨੂੰ ਅੰਡੇਮਾਨ ਦੀ ਸੈਲੂਲਰ ਜੇਲ੍ਹ 'ਚ ਦੋ ਦਿਨ ਬਿਤਾਉਣ ਭੇਜਣਾ ਚਾਹੀਦਾ ਹੈ। ਉਨ੍ਹਾਂ ਨੂੰ ਉਥੇ ਜਾ ਕੇ ਸਮਝ ਆ ਜਾਏਗੀ, ਜਿੱਥੇ ਸਾਵਰਕਰ ਨੰ ਕੈਦ ਕਰ ਕੇ ਰੱਖਿਆ ਗਿਆ ਸੀ।
ਰਾਊਤ ਨੇ ਕਿਹਾ ਕਿ ਜਿਹੜੇ ਵਿਅਕਤੀ ਵੀਰ ਸਾਵਰਕਰ ਦਾ ਵਿਰੋਧ ਕਰਦੇ ਹਨ, ਉਹ ਕਿਸੇ ਵੀ ਵਿਚਾਰਧਾਰਾ ਜਾਂ ਪਾਰਟੀ ਨਾਲ ਸੰਬੰਧਤ ਹੋ ਸਕਦੇ ਹਨ, ਜਦੋਂ ਉਹ ਦੋ ਦਿਨਾਂ ਤੱਕ ਅੰਡੇਮਾਨ ਦੀ ਜੇਲ੍ਹ 'ਚ ਰਹਿਣਗੇ ਤਾਂ ਉਨ੍ਹਾਂ ਨੂੰ ਸਾਵਰਕਰ ਦੇ ਦੇਸ਼ ਲਈ ਬਲੀਦਾਨ ਅਤੇ ਯੋਗਦਾਨ ਦਾ ਅਹਿਸਾਸ ਹੋਵੇਗਾ।
ਵਰਨਣ ਯੋਗ ਹੈ ਕਿ ਇਸ ਤੋਂ ਪਹਿਲਾਂ ਰਾਹੁਲ ਗਾਂਧੀ ਨੇ ਇੱਕ ਵਾਰ ਕਿਹਾ ਸੀ ਕਿ ਮੇਰਾ ਨਾਂਅ ਰਾਹੁਲ ਗਾਂਧੀ ਹੈ, ਰਾਹੁਲ ਸਾਵਰਕਰ ਨਹੀਂ। ਇਸ ਉਤੇ ਰਾਊਤ ਨੇ ਕਿਹਾ ਸੀ ਕਿ ਹਿੰਦੂਤਵ ਦੇ ਵਿਚਾਰਧਾਰਕ ਆਗੂ ਪ੍ਰਤੀ ਸ਼ਰਧਾ ਬਾਰੇ ਕੋਈ ਸਮਝੌਤਾ ਨਹੀਂ ਕੀਤਾ ਜਾ ਸਕਦਾ। ਅਸੀਂ ਮਹਾਤਮਾ ਗਾਂਧੀ ਤੇ ਪੰਡਿਤ ਨਹਿਰੂ ਦਾ ਸਤਿਕਾਰ ਕਰਦੇ ਹਾਂ। ਸਾਵਰਕਰ ਦਾ ਵੀ ਕਿਸੇ ਨੂੰ ਅਪਮਾਨ ਨਹੀਂ ਕਰਨਾ ਚਾਹੀਦਾ। ਜੋ ਸਿਆਣਾ ਹੁੰਦਾ ਹੈ, ਉਸ ਨੂੰ ਇਸ ਬਾਰੇ ਦੱਸਣ ਦੀ ਲੋੜ ਨਹੀਂ। ਆਪਣੇ ਅਧਿਕਾਰਤ ਟਵਿੱਟਰ ਅਕਾਊਂਟ ਉੱਤੇ ਰਾਊਤ ਨੇ ਕਿਹਾ ਸੀ ਕਿ ਵੀਰ ਸਾਵਰਕਰ ਸਿਰਫ ਮਹਾਰਾਸ਼ਟਰ ਦੇ ਨਹੀਂ, ਪੂਰੇ ਦੇਸ਼ ਦੇ ਦੇਵਤਾ ਹਨ। ਸਾਵਰਕਰ ਦੇ ਨਾਂਅ 'ਚ ਰਾਸ਼ਟਰ ਦਾ ਮਾਣ ਹੈ। ਨਹਿਰੂ ਅਤੇ ਗਾਂਧੀ ਵਾਂਗ ਸਾਵਰਕਰ ਨੇ ਵੀ ਦੇਸ਼ ਦੀ ਆਜ਼ਾਦੀ ਲਈ ਆਪਣਾ ਬਲੀਦਾਨ ਦਿੱਤਾ ਸੀ।
ਰਾਹੁਲ ਗਾਂਧੀ ਨੇ ਦਿੱਲੀ 'ਚ ਕਾਂਗਰਸ ਦੀ ‘ਭਾਰਤ ਬਚਾਓ ਰੈਲੀ’ 'ਚ ਕਿਹਾ ਸੀ ਕਿ ਮੈਂ ਰਾਹੁਲ ਗਾਂਧੀ ਹਾਂ, ਇਸ ਲਈ ਸੱਚ ਬੋਲਣ ਦੀ ਕਦੇ ਮੁਆਫੀ ਨਹੀਂ ਮੰਗਾਂਗਾ। ਭਾਜਪਾ ਨੇ ਰਾਹੁਲ ਨੂੰ ਆਪਣੇ ਇੱਕ ਬਿਆਨ ‘ਰੇਪ ਇਨ ਇੰਡੀਆ' ਦੀ ਮੁਆਫੀ ਮੰਗਣ ਨੂੰ ਕਿਹਾ ਸੀ। ਕਾਂਗਰਸ ਅੱਜਕੱਲ੍ਹ ਮਹਾਰਾਸ਼ਟਰ ਵਿੱਚ ਸ਼ਿਵ ਸੈਨਾ ਦੀ ਅਗਵਾਈ ਵਾਲੀ ਸਰਕਾਰ 'ਚ ਸ਼ਾਮਲ ਹੈ। ਸ਼ਿਵ ਸੈਨਾ ਨੇ ਸੰਜੇ ਰਾਊਤ ਦੇ ਬਿਆਨ ਤੋਂ ਪੱਲਾ ਝਾੜ ਲਿਆ ਹੈ। ਮਹਾਰਾਸ਼ਟਰ ਦੇ ਇੱਕ ਮੰਤਰੀ ਅਤੇ ਯੁਵਾ ਸੈਨਾ ਦੇ ਮੁਖੀ ਆਦਿੱਤਿਆ ਠਾਕਰੇ ਨੇ ਕਿਹਾ ਕਿ ਬੀਤੇ ਸਮੇਂ 'ਚ ਡੁਬਕੀ ਲਾਉਣ ਦੀ ਕੋਈ ਲੋੜ ਨਹੀਂ।