ਅੰਮ੍ਰਿਤਸਰ, 19 ਜਨਵਰੀ (ਪੋਸਟ ਬਿਊਰੋ)- ਇੰਟਰਨੈੱਟ ਆਜ਼ਾਦੀ ਬਾਰੇ ਕਰਾਏ ਗਏ ਇੱਕ ਕੌਮਾਂਤਰੀ ਸਰਵੇਖਣ ਵਿੱਚ ਪਾਕਿਸਤਾਨ ਨੂੰ ਦੁਨੀਆ ਦੇ ਸਭ ਤੋਂ ਪਛੜੇ ਦੇਸ਼ਾਂ 'ਚ ਸ਼ਾਮਲ ਕੀਤਾ ਗਿਆ ਹੈ।
ਪੰਜ ਸਟੈਂਡਰਡਜ਼ ਉੱਤੇ ਆਧਾਰਤ ਇਸ ਸਰਵੇਖਣ ਨੂੰ ਦੁਨੀਆ ਦੇ 181 ਦੇਸ਼ਾਂ ਨੂੰ ਸ਼ਾਮਲ ਕੀਤਾ ਗਿਆ ਸੀ, ਜਿਸ ਵਿੱਚ ਪਾਕਿਸਤਾਨ ਨੂੰ ਬੇਲਾਰੂਸ, ਤੁਰਕੀ, ਓਮਾਨ, ਯੂ ਏ ਈ ਅਤੇ ਏਰੀਟਰੀਆ ਨਾਲ ਇੰਟਰਨੈਟ ਦੀ ਆਜ਼ਾਦੀ ਦੇ ਮਾਮਲੇ ਵਿੱਚ ਸਭ ਤੋਂ ਮਾੜੇ ਦੇਸ਼ਾਂ 'ਚ ਸ਼ਾਮਲ ਕੀਤਾ ਗਿਆ ਹੈ। ਵਰਨਣ ਯੋਗ ਹੈ ਕਿ ਤਕਨੀਕੀ ਖੋਜ ਕੰਪਨੀ ਕੰਪੇਰੀਟੈਕ ਦੁਆਰਾ ਕਰਵਾਏ ਗਏ ਸਰਵੇਖਣ ਵਿੱਚ ਟੋਰੇਂਟ, ਅਸ਼ਲੀਲਤਾ, ਨਿਊਜ਼ ਮੀਡੀਆ, ਸੋਸ਼ਲ ਮੀਡੀਆ ਅਤੇ ਵੀ ਪੀ ਐਨ ਨੂੰ ਮਿਆਰ ਮੰਨਿਆ ਗਿਆ ਸੀ ਅਤੇ ਇਸ ਆਧਾਰ ਉਤੇ 181 ਦੇਸ਼ਾਂ ਵਿੱਚ ਇੰਟਰਨੈੱਟ ਦੀ ਆਜ਼ਾਦੀ ਬਾਰੇ ਸਰਵੇਖਣ ਕੀਤਾ ਗਿਆ ਸੀ। ਇਸ ਵਿੱਚ ਪਾਕਿਸਤਾਨ ਨੂੰ 10 'ਚੋਂ ਸੱਤ ਪੁਆਇੰਟ ਮਿਲੇ। ਪਾਕਿਸਤਾਨ ਤੋਂ ਇਲਾਵਾ ਬੇਲਾਰੂਸ, ਤੁਰਕੀ, ਓਮਾਨ, ਯੂ ਏ ਈ ਅਤੇ ਏਰੀਟਰੀਆ ਨੂੰ 10 'ਚੋਂ ਸੱਤ 'ਚੋਂ ਸੱਤ ਪੁਆਇੰਟ ਮਿਲੇ। ਸੈਂਸਰਸ਼ਿਪ ਪੈਮਾਨੇ 'ਚ ਇਹ ਨੰਬਰ ਇੰਟਰਨੈੱਟ ਦੀ ਆਜ਼ਾਦੀ ਦੇ ਮਾਮਲੇ ਵਿੱਚ ਮਾੜੀ ਸਥਿਤੀ ਦਾ ਸੰਕੇਤ ਕਰਦਾ ਹੈ। ਪਾਕਿਸਤਾਨ ਤੋਂ ਇਲਾਵਾ ਉੱਤਰੀ ਕੋਰੀਆ ਨੇ 10 'ਚੋਂ 10, ਚੀਨ ਨੇ 9, ਰੂਸ, ਤੁਰਕਮੇਨਿਸਤਾਨ ਅਤੇ ਈਰਾਨ ਦੇ ਸੈਂਸਰਸ਼ਿਪ ਸਕੇਲ 'ਚ ਅੱਠ ਪੁਆਇੰਟ ਹਨ।