ਬ੍ਰਾਸੀਲੀਆ, 19 ਜਨਵਰੀ (ਪੋਸਟ ਬਿਊਰੋ)- ਇੱਕ ਵਿਵਾਦ ਗ੍ਰਸਤ ਵੀਡੀਓ ਆਉਣ ਪਿੱਛੋਂ ਬਰਾਜ਼ੀਲ ਦੇ ਰਾਸ਼ਟਰਪਤੀ ਜੇਯਰ ਬੋਲਸੋਨਾਰੋ ਨੇ ਆਪਣੇ ਸੱਭਿਆਚਾਰ ਮੰਤਰੀ ਰੋਬਰਟੋ ਅਲਵਿਮ ਨੂੰ ਕੱਢ ਦਿੱਤਾ ਹੈ। ਵੀਡੀਓ ਵਿੱਚ ਉਹ ਹਿਟਲਰ ਦੇ ਪ੍ਰਚਾਰ ਮੰਤਰੀ ਡਾ: ਜੋਸਫ ਗੋਏਬਲਸ ਦਾ ਹਵਾਲਾ ਦਿੰਦੇ ਹੋਏ ਬਰਾਜੀਲ ਦੀ ਕਲਾ ਅਤੇ ਸੱਭਿਆਚਾਰ 'ਤੇ ਭਾਸ਼ਣ ਦਿੰਦੇ ਦਿਖਾਈ ਦੇ ਰਹੇ ਹਨ, ਜਿਸ ਤੋਂ ਵਿਵਾਦ ਛਿੜ ਗਿਆ ਹੈ।
ਬੋਲਸੋਨਾਰੋ ਦੇ ਦਸਤਖਤਾਂ ਨਾਲ ਜਾਰੀ ਇੱਕ ਬਿਆਨ ਵਿੱਚ ਕਿਹਾ ਗਿਆ, ਇਹ ਠੀਕ ਹੈ ਕਿ ਰੋਬਰਟੋ ਅਲਵਿਮ ਨੇ ਮੁਆਫੀ ਮੰਗ ਲਈ ਹੈ, ਪਰ ਉਨ੍ਹਾਂ ਦਾ ਬਿਆਨ ਕਿਸੇ ਕੀਮਤ 'ਤੇ ਸਵੀਕਾਰ ਨਹੀਂ ਕੀਤਾ ਜਾ ਸਕਦਾ। ਉਨ੍ਹਾਂ ਨੂੰ ਮੰਤਰਾਲੇ ਤੋਂ ਹਟਾਉਣ ਦਾ ਐਲਾਨ ਕੀਤਾ ਜਾਂਦਾ ਹੈ। ਬੀਤੇ ਦਿਨੀਂ ਅਧਿਕਾਰਤ ਸੋਸ਼ਲ ਮੀਡੀਆ ਚੈਨਲ 'ਤੇ ਪਾਏ ਗਏ ਫੁਟੇਜ ਵਿੱਚ ਅਲਵਿਮ ਰਾਸ਼ਟਰੀ ਕਲਾ ਇਨਾਮ ਦਾ ਪ੍ਰਚਾਰ ਕਰਦੇ ਦਿਖਾਈ ਦੇ ਰਹੇ ਹਨ, ਪਰੰਤੂ ਇਸ ਦੌਰਾਨ ਉਹ ਜੋਸਫ ਗੋਏਬਲਸ ਦੀਆਂ ਕਈ ਗੱਲਾਂ ਦਾ ਜ਼ਿਕਰ ਕਰਦੇ ਹਨ। ਉਨ੍ਹਾਂ ਦਾ ਇਹ ਵੀਡੀਓ ਆਉਣ ਪਿੱਛੋਂ ਸੋਸ਼ਲ ਮੀਡੀਆ 'ਤੇ ਲੋਕ ਨਾਰਾਜ਼ ਹੋ ਗਏ ਸਨ। ਕਈ ਯੂਜ਼ਰਜ਼ ਨੇ ਕਿਹਾ ਕਿ ਸੱਭਿਆਚਾਰ ਬਾਰੇ ਮੰਤਰੀ ਆਪਣੇ ਦਾਇਰੇ ਤੋਂ ਬਾਹਰ ਜਾ ਚੁੱਕੇ ਹਨ ਅਤੇ ਇਹ ਸਵੀਕਾਰ ਕਰਨ ਯੋਗ ਨਹੀਂ। ਪ੍ਰੈਜ਼ੀਡੈਂਟ ਆਫ ਦ ਚੈਂਬਰਸ ਆਫ ਡਿਪਟੀਜ਼ ਰੋਡਰਿਗੋ ਮਿਯਾ ਨੇ ਕਿਹਾ ਕਿ ਬਰਾਜ਼ੀਲ ਦੀ ਸਰਕਾਰ ਨੂੰ ਉਨ੍ਹਾਂ ਨੂੰ ਤੁਰੰਤ ਅਹੁਦੇ ਤੋਂ ਹਟਾ ਦੇਣਾ ਚਾਹੀਦਾ ਹੈ। ਵਰਕਰਜ਼ ਪਾਰਟੀ ਦੇ ਪ੍ਰਧਾਨ ਅਤੇ ਸਾਬਕਾ ਰਾਸ਼ਟਰਪਤੀ ਲੂਲਾ ਡੀ ਸਿਲਵਾ ਨੇ ਵੀ ਉਨ੍ਹਾਂ ਦੀ ਆਲੋਚਨਾ ਕੀਤੀ।
ਡਾ: ਜੋਸਫ ਗੋਏਬਲਸ 1933 ਤੋਂ 1945 ਤੱਕ ਨਾਜ਼ੀ ਜਰਮਨੀ ਦੇ ਪ੍ਰਚਾਰ ਮੰਤਰੀ ਹੁੰਦਾ ਸੀ। ਉਸ ਦਾ ਜਨਮ 1897 ਵਿੱਚ ਹੋਇਆ ਸੀ। ਗੋਏਬਲਸ ਨੇ ਕਿਹਾ ਸੀ ਕਿ ਇੱਕ ਝੂਠ ਨੂੰ ਕਈ ਵਾਰ ਦੁਹਰਾਇਆ ਜਾਏ ਤਾਂ ਉਹ ਸੱਚ ਬਣ ਜਾਂਦਾ ਹੈ। ਗੋਏਬਲਸ ਨੂੰ ਉਸ ਦੀ ਜੋਸ਼ੀਲੀ ਭਾਸ਼ਣ ਕਲਾ ਅਤੇ ਯਹੂਦੀ ਵਿਰੋਧ ਲਈ ਜਾਣਿਆ ਜਾਂਦਾ ਸੀ।